استانادا «قارلىعاش ۇيا سالعاندا» تەلەسەريالىنىڭ تۇساۋكەسەر ءراسىمى ءوتتى

استانا. قازاقپارات - كەشە «حابار» اگەنتتىگىنىڭ تاپسىرىسىمەن تۇسىرىلگەن «قارلىعاش ۇيا سالعاندا» تەلەسەريالىنىڭ تۇساۋكەسەر ءراسىمى ءوتتى، دەپ حابارلايدى قازاقپارات ءتىلشىسى.

 جاڭا تۋىندىنى كورەرمەندەر «حابار» ارناسىنان 29 - قازاننان باستاپ دۇيسەنبى- بەيسەنبى كۇندەرى ساعات 19:15-تە تاماشالاي الادى. رومانتيكا مەن دراماعا نەگىزدەلگەن فيلم 12 سەريالدان تۇرادى.

 «قارلىعاش ۇيا سالعاندا» تەلەسەريالىنىڭ مازمۇنىنا كەلسەك، باستى كەيىپكەر قارلىعاش (كامشات جولدىبايەۆا) جاسى 32-دە، جۇمىسىندا تابىستى. جالعىز ءوزى ۇلكەن ۇيدە ءومىر سۇرەدى، سالاۋاتتى ءومىر سالتىن ۇستانىپ دۇرىس تاماقتانادى، ەڭ قىمبات دۇكەندەردەن كيىنەدى، الايدى جەكە ءومىرى ءساتسىز. بىردە ول كورشى ۇيدە زەرگەر سىمباتتى جىگىتتىڭ ءومىر سۇرەتىنىن بايقايدى. ال تاسقىن (ەركەبۇلان دايىروۆ) ايەلىنەن ەرتە ايرىلىپ، قىزدارىن جالعىز ءوسىرىپ جاتقان جالعىز باستى اكە. تاسقىن جۇمىس بارىسىندا جاراقات الىپ، ونىڭ جەدەل جاردەم الىپ كەتەدى. كورشىلەرى قارلىعاشقا بالالارعا قاراي تۇرۋدى سۇرايدى، باسىندا باس تارتقانىمەن كەيىن كەلىسەدى. وسىدان كەيىن ونىڭ ءومىرى وزگەرە باستايدى.

 «تەلەسەريالداعى نەگىزگى ماسەلە بۇگىنگى ءبىزدىڭ قوعامدا بار كارى قىز پروبلەماسى. ياعني فيلمدە قىزداردىڭ قىزمەت قۋىپ نەمەسە بارلىق جاعدايدى جاساپ الايىن تۇرمىسقا سوسىن شىعا جاتارمىن دەگەن ويلارى كورىنىس تابادى. سەريالدىڭ ىشىندە رومانتيكا، دراما، كومەديا ءبارى بار. مەنىڭ پروديۋسەر رەتىندە كورسەتكىم كەلگەنى قىزدار ءوز جاعدايىمدى جاساپ الايىن جىگىت سوسىن تابىلادى دەمەي، ۋاقىت سوزباي تۇرمىس قۇرىپ، شاڭىراقتى شاتتىققا بولەۋدى جيىرەك ويلاسا دەگەن وي. ەكىنشى ايتپاعىم كينودا كورسەتىلگەندەي تۇرمىسقا شىعۋ مىندەت، ايتەۋىر شىقسام بولدى دەگەن ويدان اۋلاق بولۋ كەرەك. ويتكەنى، ءومىردىڭ ءوز جوسپارى بار، ءار ادامنىڭ ءوزىنىڭ جۇبى مەن ومىرلىك باقىتى بار. ءبىر سوزبەن ايتقاندا بۇگىنگى قوعامدا بولىپ جاتقان دۇنيەنى كينو قىلىپ تۇسىردىك»، - دەدى تەلەسەريالدىڭ باس پروديۋسەرى گۇلنۇر ماماساريپوۆا.

 سونداي- اق، تەلەسەريالدىڭ تۇساۋكەسەرىنە كارتينادا باستى ءرولدى سومداعان كامشات جولدىبايەۆا مەن ەركەبۇلان دايىروۆ، فيلمنىڭ ءتۇسىرىلىم توبى جانە ب ا ق وكىلدەرى قاتىستى.

 «مەنىڭ كەيىپكەرىمنىڭ وزىمە ۇقساس بىرنەشە تۇستارى بار، اتاپ ايتقاندا جاس ەرەكشىلىگى، ومىردەگى ۇستانىمى مەن العا قويعان ماقساتى جانە مىنەزى. فيلمنىڭ نەگىزگى يدەياسى بۇگىنگى قوعامدى كورسەتۋ، ياعني قوعامدا ءومىر ءسۇرىپ جاتقان ادامداردىڭ ءومىرى ارقىلى، ادامنىڭ باقىتى - ول وتباسى مەن ونىڭ جاقىن جاندارى ەكەنىن مەڭزەدىك. كينوعا ءتۇسۋ بارىسىندا سونشالىقتى قيىندىقتار بولعان جوق، وعان سەبەپ كەيىپكەرىمنىڭ وزىمە ۇقساستىعى. جانە تاعى ءبىر ايتارىم وسى سەريال ارقىلى قازىر تۇرمىس قۇرماي جۇرگەن كارى قىزدار وزدەرىن كورە الادى دەپ ايتا الار ەدىم» - دەدى تەلەسەريالداعى قارلىعاشتىڭ ءرولىن سومداۋشى، بەلگىلى ءانشى كامشات جولدىبايەۆا.

 كامشات جولدىبايەۆا بۇعان دەيىن «حابار» اگەنتىگى تۇسىرگەن «تراكتورشىنىڭ ماحابباتى»، «وگەي جۇرەك» تەلەسەريالدارىندا، ال ەركەبۇلان دايىروۆ سيەۆاستوپول قالاسىندا حالىقارالىق لاۋرەات اتانعان «باۋىرجان مومىش ۇلى» فيلمىندە باستى ءرولدى سومداعان.

ايتا كەتسەك، بۇگىن «حابار» تەلەارناسى تۋعان كۇنىن اتاپ وتۋدە، 1995 -جىلى قۇرىلعان ەلىمىزدىڭ باستى ارناسىنا 23 جىل تولىپ وتىر.

وسىعان دەيىن 15 - قازاننان باستاپ كۇندە ساعات 22.20-دا «حابار» تەلەارناسىندا الەمدىك كينولاردىڭ كورسەتىلىمى باستالاتىندىعىن جازعان بولاتىنبىز.

اۆتور: داۋلەت ىزتىلەۋ