سەگىز قىرلى، ءبىر سىرلى: وتاندىق ونەرلى شەنەۋنىكتەر تۋرالى نە بىلەمىز؟
الايدا ولاردىڭ جۇرت بىلمەيتىن ەرەكشە ونەرلەرى دە جوق ەمەس ەكەن. NUR. KZ نازارلارىڭىزعا قازاقستان شەنەۋنىكتەرىنىڭ كوپشىلىك بىلە بەرمەيتىن ەرەكشە قىرلارىن ۇسىنادى.
ءتىزىمنىڭ كوش باسىندا الماتى قالاسىنىڭ اكىمى باۋىرجان بايبەك تۇر.
وڭتۇستىك استانانىڭ جاس اكىمى كۇلاش بايسەيىتوۆا اتىنداعى مۋزىكا مەكتەبىن ءتامامداعانىن ءبىرى بىلسە، ەندى ءبىرى بىلە بەرمەيدى. سونداي-اق، گەرمانياداعى جوعارى مۋزىكا مەكتەبىن بىتىرگەن.
فورتەپيانو سىنىبىن بىتىرگەن شاھار باسشىسى اتالعان اسپاپتا كەرەمەت ويناي بىلەدى ەكەن.
اتىراۋ وبلىسىنىڭ اكىمى نۇرلان نوعايەۆ تا ونەردەن قۇر الاقان ەمەس. ول دومبىرادا كۇي تارتىپ، كوپشىلىكتى تالاي رەت تاڭ قالدىرعان ەدى.
اكىم بۇدان بولەك، اۋىل-ايماققا جول تۇسە قالسا بولعانى، جەرگىلىكتى كاسىپكەرلەردەن قازاقتىڭ كيەلى اسپابىن ساتىپ الادى ەكەن.
سول سياقتى قىزىلوردا وبلىسىنىڭ اكىمى قىرىمبەك كوشەربايەۆتىڭ دا دومبىرا ويناي بىلەتىنىن كوپشىلىك بىلە بەرمەيدى.
اكىمنىڭ دومبىرا تارتىپ وتىرعان سۋرەتى ب ا ق بەتتەرىندە تالاي رەت جاريالانعان ەدى.
شىمكەنتتىڭ «زىڭ» اكىمى دە ونەرگە جاقىن بولىپ شىقتى. شەنەۋنىكتىڭ جاستارمەن بىرگە بيلەپ تۇرعان ۆيدەوسى وسىدان ءبىراز ۋاقىت بۇرىن جەلىدە تاراپ كەتكەن بولاتىن.
مينيسترلەردىڭ اراسىندا ساكسوفوندا ويناپ، دجاز ستيلىندەگى اندەردى ايتاتىن - ءومىرزاق شۇكەيەۆ بولىپ شىقتى. اۋىل شارۋاشىلىعى ءمينيسترى ءبىر سۇحباتىندا اسپاپتا ويناپ، تىنىعاتىنىن ايتقان.
قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ تا دومبىرانىڭ قۇلاعىندا وينايتىن شەنەۋنىكتەردىڭ قاتارىنان ەكەن.
ءمينيستردىڭ قازاقتىڭ ايگىلى «بالبىراۋىن» كۇيىن تارتىپ وتىرعان ۆيدەوسى وسىدان ءبىراز جىل بۇرىن جەلىدە تاراپ كەتكەن.
«سامۇرىق قازىنا» ۇلتتىق ءال-اۋقات قورىنىڭ باسشىسى احمەتجان ەسىموۆتىڭ دە ونەرگە جانى جاقىن ەكەنىن كوپشىلىك بىلە بەرمەيدى.
ەكس-اكىم دومبىرامەن بىرگە باسقا دا اسپاپتاردا ويناي الادى.
سونداي-اق، ەسىموۆ مىرزا ءان دە ايتا الاتىن كورىنەدى.