قازاق دالاسىن زەرتتەگەن فرانسۋزدىق تاريحشىنىڭ ەڭبەكتەرى قايتا باسىپ شىعارىلادى

استانا. قازاقپارات - قازاق دالاسىن زەرتتەپ، عىلىمي مۇرالار قالدىرعان فرانسۋزدىق تاريحشى يوسيف كاستانەنىڭ ەڭبەكتەرىن قايتا باسىپ شىعارۋ جوسپارلانۋدا.

بۇل تۋرالى حالىقارالىق تۇركى اكادەمياسىنىڭ (TWESCO) باسشىسى دارحان قىدىرالىنىڭ فرانسيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى فيليپپ مارتينەمەن كەزدەسۋى بارىسىندا ايتىلدى، دەپ حابارلايدى قازاقپارات.

TWESCO سايتىندا ءمالىم ەتىلگەندەي، كەزدەسۋ بارىسىندا د. قىدىرالى اكادەميا اتقارىپ جاتقان جۇمىستار تۋرالى ايتىپ بەردى.

بۇگىندە TWESCO بەدەلدى حالىقارالىق ۇيىمعا اينالىپ وتىر. اكادەميا يۋنەسكو، يسەسكو سىندى ءبىرقاتار ۇيىمدارمەن تىعىز قارىم-قاتىناس ورناتقان. ۇيىم جەتەكشىسى ءوز سوزىندە بيىلعى ءساۋىر ايىندا TWESCO قازاقستان پرەزيدەنتىنىڭ «رۋحاني جاڭعىرۋ» باعدارلاماسى اياسىندا يۋنەسكونىڭ پاريج قالاسىنداعى شتاب-پاتەرىندە «رۋحاني جاڭعىرۋ جانە مۇرانى ناسيحاتتاۋ: جويىلۋ قاۋپىندەگى تۇركى تىلدەرى» اتتى حالىقارالىق فورۋم وتكىزگەنىن اتاپ ءوتتى.

ءوز كەزەگىندە فيليپپ مارتينە فرانسيا تاراپى اكادەميا جۇمىسىنا قىزىعۋشىلىق تانىتىپ وتىرعانىن تىلگە تيەك ەتتى.

سونداي-اق تاراپتار تۇركى اكادەمياسى مەن فرانسياداعى INALCO (شىعىس تىلدەرى مەن وركەنيەتىنىڭ ۇلتتىق ينستيتۋتى) عىلىمي مەكەمەلەرى اراسىندا بايلانىس ورناتۋ، ىنتىماقتاستىقتى دامىتۋ جانە ورتاق جوبالار جاساۋ، بىرىككەن جوبالار اياسىندا كىتاپتار شىعارۋ سياقتى ءبىرقاتار جايتتاردى تالقىلادى.

اتاپ وتىلگەندەي، بىرگە ۇيىمداستىرىلاتىن ورتاق جوبالار اراسىندا ي. كاستانە سياقتى قازاق دالاسىن شارلاپ، كوپتەگەن عىلىمي مۇرالار قالدىرعان بەلگىلى تۇلعالاردىڭ ەڭبەكتەرىن قايتا باسىپ شىعارۋ دا بار.