دارىندى بالانى قالاي تاربيەلەيمىز؟

استانا. قازاقپارات - ءار بالادا دارىندىلىق ۇشقىنى بار. اتا- انانىڭ ماقساتى -  سول دارىندى كورىپ، ونى اشۋعا كومەكتەسۋ. وكىنىشكە وراي، كوپشىلىك اتا- انا ءوز ارمانىنا بالاسى قول جەتكىزگەنىن قاراپ تۇرادى.

 كوپ جاعدايدا ادام "جاقسى الما ءوسىپ كەلە جاتىرسا دا، المۇرت شىعارۋعا تىرىساتىندىعى" راس. سوندىقتان اتا- انانىڭ مىندەتى -  وزىنە قانداي "جەمىستىڭ" ءتۇرى تاپ بولعانىن كورۋ، ونىڭ وسۋىنە قاجەتتى "تىڭايتقىش" نەمەسە ماتەريال بەرۋ جانە تەرەڭ تامىرىن جىبەرۋگە كومەكتەسۋ. سول كەزدە بىرەگەي قابىلەتى بار ادام شىعادى. وكىنىشكە وراي، ءقازىر ءبارىمىز ناقتى عىلىمعا سۇيەنەمىز. مىسالى، بالا تۋا سالىسىمەن نەمەسە 3 جاسىنان باستاپ فورتەپيانودا كەرەمەت ويناماسا، بالامىزعا ەرەكشە دارىن بەرىلمەگەن دەپ ويلايمىز. الايدا، بالاڭىز بارلىق ادامنىڭ ءتىلىن تاۋىپ، باسقالارمەن ەركىن سويلەسىپ كەتەتىن بولسا نەمەسە سىنىبىندا ەڭ تەز جۇگىرسە، كىشكەنتاي كەزىنەن باستاپ بىردەڭەنى قولدان جاساۋعا قىزىعۋشىلىق بىلدىرسە، ول دا دارىن ەكەنىن ۇمىتپاڭىز. كەز كەلگەن دارىندى ماحابباتپەن دامىتسا، ونىڭ قابىلەتى كۇشەيىپ، وسكەندە باقىتتى بولۋىنا سەپتىگى تيەدى. سەبەبى، سۇيىكتى ىسىڭمەن اينالىسۋ جانە اينالاڭدا سەنى قولدايتىن ادامداردىڭ بولۋى -  ناعىز باقىت.

دارىندى بالالارمەن نە ىستەۋگە بولمايدى؟ بالاڭىزدان قانداي دا ءبىر جوعارى قابىلەت بايقادىڭىز دەرلىك. مىسالى: ول كىشكەنتاي كەزىنەن باستاپ ماتەماتيكادان، فيزيكادان ەسەپتى جاقسى شىعارادى نەمەسە مۋزىكالىق اسپاپتاردا كەرەمەت وينايدى. ءتىپتى، وتە جاس كەزىندە ۋنيۆەرسيتەتكە وقۋعا تۇسەتىن بالالار دا بار. ول كەزدە نە ىستەۋ كەرەك؟ نە ىستەۋگە بولمايدى؟ تاريحقا ۇڭىلسەك، وكىنىشكە وراي، كوپتەگەن دارىندى ادامداردىڭ باقىتتى تاعدىرى بولماعانىن تۇسىنەمىز. ولاي بولۋ سەبەپتەرىنىڭ ءبىرى -  ونىڭ ارتىندا تۇرعان ەرەسەكتەر بالاسىنىڭ دارىندىلىعىنىڭ جەمىسىن جىلدام كورگىسى كەلۋى. بالاڭىزدىڭ دارىنى قانشالىقتى بىرەگەي بولسا دا، سىزگە قانداي اقىلدى كورىنسە دە، قانشاما فورمۋلانى جاتقا بىلسە دە، ءبىرىنشى كەزەكتە، ونىڭ بالا ەكەندىگىن ۇمىتپاڭىز. ونىڭ وتە جوعارى ينتەللەكتۋالدى قابىلەتى بار بولسا دا، ەموتسيالىق دەڭگەيدە ول بارلىق بالالارعا قاجەتتى نارسەلەرگە مۇقتاج بولادى. دارىندى (كىشكەنتايىنان باسقالارىنان ارتىقشىلىعى ايقىن كورىنىپ تۇراتىن) بالالارى ءوسىپ كەلە جاتقان كوپتەگەن اتا- انالار بالاعا كەدەرگى كەلمەس ءۇشىن كوپتەگەن زاتتارعا شەكتەۋ قويادى. ياعني، بالانى تولىقتاي وقۋعا وتىرعىزادى. اسىرەسە، قوعاممەن قاتىناسۋعا (سويلەسۋگە) شەكتەۋ قويادى. سول سەبەپتى بالا باقىتتى بولىپ ءوسۋى ءۇشىن كەز كەلگەن ادام ءۇشىن قاجەتتى مەيىرىمدى الۋدان قالادى. كىشكەنتايىنان باسقا بالالارمەن ارالاسىپ وسپەگەن بالا، ەسەيگەندە قالاسا دا، ولاردا ارالاسۋ يكەمى، باسقالارمەن ويناۋ يكەمى، بايلانىس يكەمى جانە باسقا قىزمەت سالاسىنا اۋىسۋ يكەمى جوق. بالا كوپتەگەن ەڭبەكپەن ءوز سالاسىندا ماقساتىنا جەتكەندە، ول ادام ويلانا باستايدى، ءارى قاراي نە ىستەيتىندىگىن بىلمەي قالۋى مۇمكىن. سوندىقتان بالادا جان- جاقسى اۋەسقويلىعى بولۋى كەرەك.

ءسوزسىز، ول باسقا بالالارعا قاراعاندا ماتەماتيكامەن تەرەڭىرەك اينالىسۋ كەرەك. ول ونى قالايدى، ول ونىڭ قولىنان كەلەدى جانە العا باسۋ بايقالادى. ءبىراق ودان باسقا بالانىڭ ءحوببيى جانە اۋەسى بولۋى كەرەك. دارىنىمەن بايلانىستى پانگە قاتىسى جوق باسقا اۋەسقويلىعى بولعانى ءجون. ءومىر تالابى -  جان- جاقتى ءارى يكەمدى ادام. ايتپەسە، ءوزىنىڭ تەك ءبىر جاعىن دامىتۋعا بۇكىل ءومىرىن ارناعان ادام، ەسەيگەندە ىشكى تۇنىسپەۋشىلىكپەن سوقتىعىسىپ، كۇيزەلىسكە ۇشىراۋى مۇمكىن. ەندەشە، مىنا ەرەجەلەردى ەسكەرىڭىز:

1. بالا ومىرىنەن باسقا پاندەر جوعالىپ كەتپەۋ كەرەك. وعان شىعارماشىلىقپەن نەمەسە سپورتپەن اينالىسۋعا مۇمكىندىك بەرۋ كەرەك.

 2. بالادا مىندەتتى تۇردە جەكە ۋاقىتى بولۋى كەرەك. اسىرەسە، بالالارمەن ارالاسۋعا، ويناۋعا ارنالعان ۋاقىت كەرەك. سەبەبى ول قانشالىقتى اقىلدى بولسا دا، قانشالىقتى ۇلكەن كورىنسە دە، بالالاردىڭ ءوز جاسىنا ارنالعان ويىندارمەن ويناۋى ماڭىزدى. بالا ۇيدە وتىرىپ، 9 جاسىندا ۋنيۆەرسيتەتتىڭ دەڭگەيىندەگى ەسەپتى شىعارىپ وتىرسا دا، ول اۋلاعا شىعىپ، باسقالارمەن بىرگە قۋىسپاق ويناعىسى كەلمەيدى دەگەن ءسوز ەمەس. كوبىنەسە، باسقالارىنان ەرەكشەلىگى ايقىن كورىنىپ تۇراتىن بالالارعا بىردەن ويناۋعا كىرىسىپ كەتۋ قيىنعا سوعادى. ولار تۇيىق بولۋى دا مۇمكىن. سول كەزدەگى اتا- انانىڭ ماقساتى -  بالاسىنا ۇنايتىن ورتا تابۋ، ىڭعايىن ىزدەۋ.

 3. بالاڭىزدىڭ قانداي دا ءبىر دارىنىن دامىتۋعا قانشاما كۇش سالساڭىز دا، ول ونىڭ ءومىرى، ەگەر ول ءبىر كۇنى بارلىعىن وزگەرتەمىن دەپ شەشسە، ونىڭ قۇقىعى بار ەكەنىن ۇمىتپاڭىز. سەبەبى كەيدە ەكى قادام العا جىلجۋ ءۇشىن ءبىر قادام ارتقا جاساعان دا دۇرىس. بالاڭىزدىڭ ارتقا قادام جاساۋىنا، دەمالىس جاساۋىنا مۇمكىندىك بەرىڭىز، ول بىردەڭەدەن قالىپ قويادى دەپ قورىقپاڭىز.

Massaget.kz