اعىلشىن تىلىندە ەركىن سويلەيتىن ەلدەر قاي ءتىلدى ۇيرەنىپ ءجۇر؟

استانا. قازاقپارات - الەم اعىلشىن تىلىندە سويلەۋگە ۇلكەن قىزىعۋشىلىق تانىتۋدا. ءبىرى مەكتەپ كەزىنەن باستاسا، ەندى ءبىرى ورتا جاستان اسسا دا، ءتىل ۇيرەنۋدى قولعا الۋدا. بۇل الەمدەگى اقپارات قورىنىڭ باسىم بولىگى اعىلشىن تىلىندە بولۋىمەن تىعىز بايلانىستى.

 «اعىلشىن كەڭەسىنىڭ» مالىمەتىنە سۇيەنسەك، الەمدە اعىلشىن ءتىلىن 1,75 ميلليارد ادام بىلەدى. ياعني، ءاربىر ءتورتىنشى ادام اعىلشىن تىلىندە سويلەي الادى. ال، 2020 -جىلى بۇل ساندىق كورسەتكىش 2 ميلليارد ادامعا دەيىن ءوسۋى مۇمكىن دەگەن بولجام بار. دەگەنمەن، بۇل اعىلشىن ءتىلى انا ءتىلى سانالاتىن ەلدەر وزگە تىلدەردى ۇيرەنبەيدى دەگەندى بىلدىرمەيدى.  ۇلى بريتانيادا حالىقتىڭ قىزىعۋشىلىقپەن ۇيرەنەتىن تىلدەرىنىڭ ىشىندە كوش باستاپ تۇرعان -  فرانسۋز ءتىلى. بۇنى فرانسيامەن گەوگرافيالىق جاقىندىعىن جانە فرانسۋزداردىڭ اعىلشىن تىلىنە دەگەن بەيقامدىعىمەن بايلانىستىرادى. ەكىنشى ورىنعا نەمىس ءتىلى ىلىككەن. نەمىس ءتىلى لەكسيكالىق نورما بويىنشا، سوزدەردى قولدانۋى مەن ءسوز تىركەسى ارقىلى اعىلشىن تىلىنە كوبىرەك ۇقسايدى. ال، ءۇشىنشى ورىندا -  يسپان ءتىلى. يسپانيا اعىلشىندىقتار ءجيى دەمالىپ باراتىن تۋريستتىك ەل رەتىندە ءبىرىنشى ورىنعا شىققان. تىلگە قىزىعۋشىلىقتىڭ جوعارى بولۋىن وسىمەن بايلانىستىرادى. اۋستراليا كوپ ءتىلدى مەملەكەت بولعانىنا قاراماستان، ەكىنشى ءتىلدى مەڭگەرگەن ادامدار سانىمەن ماقتانا المايدى. 1960 -جىلدارى 12 سىنىپ وقۋشىلارى اراسىندا شەت ءتىلىن مەڭگەرگەندەر كورسەتكىشى %40 بولسا، بۇگىندە ول كورسەتكىش نەبارى - % 10-12.

 EducationHQ ءبىلىم پلاتفورماسىنىڭ مالىمەتىنە سۇيەنسەك، اۋستراليالىقتاردىڭ اراسىندا كەڭىنەن تانىمال شەت ءتىلىن ەكى توپقا جىكتەۋگە بولادى: شىعىس جانە ەۋروپا تىلدەرى. شىعىس تىلدەرىنە: جاپون، قىتاي جانە يندونەزيا تىلدەرى جاتادى. ونى ەلدىڭ گەوپوليتيكالىق قىزىعۋشىلىعىمەن تۇسىندىرۋگە بولادى. سونىمەن قاتار، ءبىلىم مەن مادەنيەت سالاسىندا ءوزارا قىزمەت پەن ستۋدەنتتەردىڭ الماسۋ ارقىلى ءبىلىم الۋىن قامتاماسىز ەتىپ وتىرعان اۋستراليا بيلىگىمەن دە بايلانىستىرا الامىز.

 ال، ەۋروپا تىلدەرىنىڭ اراسىندا كەڭىنەن تانىمال: يتاليان، فرانسۋز جانە نەمىس تىلدەرى. بۇنى حالىقتىڭ تاريحي وتكەنىمەن بايلانىستىرادى. ا ق ش- تا مەملەكەتتىك ءتىلدىڭ جوق ەكەندىگىنە قاراماستان، ونى اعىلشىن ءتىلدى مەملەكەتتەر قاتارىنا جاتقىزادى. تاريحي تۇرعادان حالىقتىڭ باسىم كوپشىلىگى اعىلشىن تىلىندە سويلەگەندىكتەن، نەگىزگى ءتىل دە اعىلشىن ءتىلى رەتىندە قاراستىرادى. ولاردىڭ شەت ءتىلىن ۇيرەنۋ مۇمكىندىگىن ساراپتاۋ قيىن. ويتكەنى، ا ق ش- تا اعىلشىن ءتىلىن كەرىسىنشە ەكىنشى شەت ءتىلى رەتىندە ۇيرەنىپ جۇرگەندەر سانى كوپ. ال، وزگە ءتىلدى ۇيرەنۋگە كەلگەندە امەريكالىقتار سالقىنقاندىلىق تانىتادى. امەريكا زاماناۋي تىلدەر اسوتسياتسياسىنىڭ زەرتتەۋىنە سۇيەنسەك، 2013 -جىلدان 2016 -جىلعا دەيىن يسپان ءتىلىن ۇيرەنۋشىلەر سانى% 9,8، فرانسۋز ءتىلى %11,1، نەمىس ءتىلى %2,3 ازايعان.

Massaget.kz