كەرەمەت سەزىمدە ءجۇرمىن: توقتار سەرىكوۆ وتباسىلىق قۋانىشىمەن ءبولىستى

 استانا. قازاقپارات - جاقىندا ءتورتىنشى مارتە اكە اتانۋعا دايىندالىپ جۇرگەن توقتار سەرىكوۆ وتباسىلىق قۋانىشىمەن ءبولىستى. ءانشى جۇبايى بەيبىتتىڭ اي- كۇنى جاقىنداپ قالعانىن، سوعان وراي قاتتى تولقىپ جۇرگەنىن ايتتى.

سونداي- اق، ۇيدەگى ءۇش اتۇستارىنىڭ جەتىستىكتەرى مەن ءتاتتى قىلىقتارى تۋرالى بايانداپ بەردى.

«قۇداي قالاسا ۇلكەن قۋانىش كۇتىپ وتىرمىز. كىشكەنتايلى بولساق دەپ وتىرمىز. بەيبىتتىڭ ايى، كۇنى جەتىپ وتىر. سوندىقتان كوبىنەسە سىرتقا شىعا بەرمەيدى. وسى ايدىڭ سوڭى نە كەلەسى ايدىڭ باسى بوپ قالۋى كەرەك»، - دەيدى سەرىكوۆ.

ونەر يەسى بولاشاق ءسابيىنىڭ جىنىسىن بىلمەيدى. الدىن الا بولجاعىسى دا جوق. قازىر ول جارىمنىڭ جانى امان قالىپ، پەرزەنتىمدى باۋىرىما باسسام دەگەن تىلەكتە ءجۇر.

«اللا ءناسىپ قىلسا. ەشقانداي تەكسەرۋلەر جاساعان جوقپىز. مۇمكىن بەيبىت ءوزى ماعان ايتپاي جاساعان شىعار. كىم بولسا دا، 12 مۇشەسى ءبۇتىن اللا تاعالا پەرزەنت بەرسە دەپ وتىرمىز»، - دەيدى ءانشى.

بۇدان وزگە، توقتار سەرىكوۆ تۇڭعىشىنىڭ مەكتەپتەگى جەتىستىكتەرى مەن ەگىز ۇلدارىنىڭ ءتاتتى قىلىعى جايلى باياندادى.

«ءالحامدۋليللاح، ۇلدارىم شاپقىلاپ ءجۇر. بەكولجاس 5- سىنىپتا وقيدى. ۇزدىك وقۋشى، مەكتەپتىڭ ماقتانىشى. ءبىزدىڭ اتىمىزدى پايدالانىپ جۇرگەن جوق. قاي ءمۇعالىمى بولسا دا، بەكولجاستى سونداي رياسىز جاقسى كورىپ، ماقتايدى. سوعان قۋانىشتىمىن. دۇنيەدەگى ەڭ باقىتتى ساتتەردىڭ ءبىرى - بالاڭدى ۇستازى ماقتاپ، ماقتان تۇتاتىن بولسا - ول اتا- اناعا كەرەمەت ماقتان ەكەن. مەن قازىر سونداي كەرەمەت جاعدايدا ءجۇرمىن.

ەگىزدەرىم ءالى كىشكەنتاي، 3 جاسقا ەندى كەلەدى. قۇداي ءتىل- كوزدەن ساقتاسىن، ەكەۋى ەركە. بالاباقشاعا بارادى. ەكەۋى دە بۇزىق، قىزىق. سىرتقا شىقسام، سولارعا تارتىلىپ تۇرام، ساعىنىپ تۇرام. وزدەرىنىڭ ەرەكشە ءيىسى بار. اكەلىك ماحابباتىمدى وسى ەكەۋى ودان سايىن ارتتىرا تۇسۋدە. ءتورتىنشىسى قىز با، ۇل ما، قۇداي ءبىلسىن، ءبىراق قاتتى كۇتۋدەمىن»، - دەپ اعىنان جارىلدى توقتار سەرىكوۆ.

Stan.kz