قازاقستاندا مال باسى ساناعى نەگە جۇرگىزىلمەي قالدى
ونىڭ سەبەبىن بۇگىن سەنات قابىرعاسىندا وتكەن وتىرىستا ق ر ۇلتتىق ەكونوميكا مينيسترلىگى ستاتيستيكا كوميتەتىنىڭ ءتوراعاسى نۇربولات ايداپكەلوۆ ايتىپ بەردى، دەپ حابارلايدى قازاقپارات ءتىلشىسى.
«قازاقستان رەسپۋبليكاسىنىڭ مەملەكەتتىك ستاتيستيكا تۋرالى زاڭناما قۇجاتتارىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانعان وتىرىستا سەناتورلار كوميتەت ءتوراعاسىنا قازاقستانداعى مال باسىنا نەلىكتەن ساناق جۇرگىزىلمەيتىنى تۋرالى ساۋال قويىلدى.
«وتە دۇرىس ايتاسىز. بۇل ساناقتى 2016 -جىلى ءبىزدىڭ وتكىزۋىمىز كەرەك ەدى. ءبىراق، بۇعان اۋىل شارۋاشىلىعى مينيسترلىگى قارسى بولدى. دەگەنمەن، اۋىل شارۋاشىلىعى ساناعى ون جىل سايىن جۇرگىزۋ ماسەلەسى بۇل ءبىزدىڭ زاڭدا عانا ەمەس، اۋىل شارۋاشىلىعى تۋرالى زاڭدا دا كورسەتىلگەن. سونىڭ وزىندە قىرۋار قارجى كەتەدى دەپ، ولار (ا ش م - اۆت. ) اقشانى ودان دا سۋبسيدياعا بەرەمىز دەپ، 2016 -جىلى ساناقتى بلوكتاپ تاستاعان. سونىمەن ساناق وتكەن جوق. قازىر كۇندەلىكتى مال باسىنىڭ سانى نەمەسە ەگىن ماسەلەسى دە دۇرىس ەمەس دەيدى. بۇكىل الەمدىك وركەنيەتتى مەملەكەتتەردىڭ ءبارى دە قانشا جەردە ءوزىنىڭ تەحنولوگياسىن دامىتسا دا، ون جىلدا ءبىر رەت ناقتىلاۋ جۇمىسىن جۇرگىزەدى» ، - دەيدى نۇربولات ايداپكەلوۆ.
كوميتەت ءتوراعاسىنىڭ ايتۋىنشا، مىسالى رەسەيدە ون جىلدا ءبىر رەت اۋىل شارۋاشىلىعى ساناعى جۇرگىزىلسە، بەس جىلدا ءبىر رەت مال باسىنىڭ 30 پايىزىن قامتيتىن كىشىگىرىم ساناق جۇرگىزىلەدى.
«ءبىز ودان قالىپ جاتىرمىز. بىزدە سوڭعى اۋىل شارۋاشىلىعى ساناعى 2006 -جىلى جۇرگىزىلگەن. حالىق سانى جاعىنان ءبىز ەندى دۇرىس باعىتتا كەلە جاتىرمىز. سيفرلاندىرۋ جۇمىسى بويىنشا حالىق ساناعى كەلەسى جىلدا بىزدە ەكى جولمەن جۇرگىزىلەتىن بولادى. بىرىنشىدەن، ينتەرنەت ارقىلى، ەكىنشىدەن پلانشەتكە تىركەۋ ارقىلى وتكىزىلەدى. ول دا پروگرەس دەپ ەسەپتەيمىز» ، - دەيدى ول.
ەسكە سالا كەتسەك، بۇگىن پارلامەنت سەناتىنىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ مەملەكەتتىك ستاتيستيكا تۋرالى زاڭناما قۇجاتتارىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلاندى. زاڭ جوباسىن قورعاعان نۇربولات ايداپكەلوۆتىڭ ايتۋىنشا، جاڭا زاڭ جوباسى ءبىرقاتار مىندەتتەردى شەشۋگە باعىتتالعان. اتاپ ايتقاندا، زاڭ جوباسى بويىنشا مەملەكەتتىك ستاتيستيكا سالاسىنداعى قۇقىقتى رەتتەۋدى جەتىلدىرۋ، مەملەكەتتىك ستاتيستيكا ورگاندارى قىزمەتىنىڭ اشىقتىق دەڭگەيىن ارتتىرۋ، جينالاتىن دەرەكتەردىڭ ساپاسىن ارتتىرۋ جانە رەسمي ستاتيستيكا اقپاراتىنىڭ ساپاسىن قامتاماسىز ەتۋ، رەسپوندەنتتەرمەن جانە پايدالانۋشىلارمەن كەرى بايلانىستى قامتاماسىز ەتۋ، قايتالاناتىن كورسەتكىشتەردى جيناۋ سەكىلدى جۇمىستاردى رەتتەۋ قاراستىرىلعان.