تۇركىستان وبلىسىندا ءيت توبەلەسى كىسى ولىمىمەن اياقتالدى
بۇل تۋرالى وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى ءابدۋالى قوسمۇراتوۆ مالىمدەدى، دەپ حابارلايدى قازاقپارات ءتىلشىسى.
ايتا كەتەيىك، تۇركىستاندىق تۇرعىنداردىڭ ءبىرى كەشكىسىن ءوز ۇيىندە ءيت توبەلەسىن ۇيىمداستىرعان. يتتەردىڭ توبەلەسىن تاماشالاۋعا كەلگەندەردىڭ اراسىندا جانجال شىعىپ، سوڭى كىسى ولىمىمەن اياقتالدى. ەكى تۇرعىن سول جەرگە كەلگەن ءبىر جىگىتكە جابىلىپ، سوققىعا جىققان. تاياق جەگەن تۇرعىن دا قاراپ تۇرماي ولارعا سۋىق قارۋدان وق اتقان. سونىڭ سالدارىنان وق جاراقاتىن العان قالا تۇرعىنى ءجانتاسىلىم ەتتى. ال، سۋىق قارۋ قولدانعان كۇدىكتى سول كۇنى-اق قولعا ءتۇسىپ، قاماۋعا الىندى.
تۇركىستان وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى ءابدۋالى قوسمۇراتوۆتىڭ ايتۋىنشا، ادام ءولتىردى دەپ كۇدىك كەلتىرىلىپ وتىرعان ادامدى ۋاقىتشا تەرگەۋ اباقتىسىنا قاماۋ تۋرالى سوت سانكتسياسى شىققان.
«كۇدىكتىگە قىلمىستىق كودەكستىڭ 99 -بابىنىڭ 2 -بولىگى، 9 -تارماعى («ادام ءولتىرۋ») بويىنشا ءىس قوزعالىپ، ەكى ايعا قاماۋ تۋرالى سوت سانكسياسى بەرىلدى»، - دەدى سۋديا.
قازىرگى تاڭدا ءوڭىردىڭ ءتارتىپ ساقشىلارى قىلمىستىق وقيعانىڭ ءمان- جايىن انىقتاپ، سوتقا دەيىنگى تەرگەپ- تەكسەرۋ امالدارىن جۇرگىزۋدە.