ۇشاق جانىندا ەرەكشە سەلفي جاساعاسى كەلگەن ارۋلار مەرت بولدى

 استانا. قازاقپارات - مەكسيكادا ەرەكشە سەلفي جاساعاسى كەلگەن ەكى بويجەتكەن ۇشاقتىڭ قاناتىنا سوعىلىپ قازا تاپتى.

قىزدار اۋە كەمەسى قونار تۇستا وعان جاقىنداي بەرگەن دەپ حابارلايدى Oxu.Az سايتىنا سىلتەمە جاساعان NUR. KZ.

قۇقىق قورعاۋ ورگاندارى تاراتقان مالىمەتكە سايكەس، 17 جانە 18 جاستاعى قىزدار چيناپاس قالاسىندا ءوتىپ جاتقان سپورتتىق جارىسقا كەلگەن. سايىستىڭ وتەتىن ورنى اۋەجاي جانىندا بولىپتى.

ەكى ارۋ جارىس اياقتالعان سوڭ ۇشۋ جولاعىنا شىعىپ، سۋرەتكە تۇسپەك بولادى. ال اسپاننان ەندى عانا قونىپ كەلە جاتقان ۇشاقتى كورگەندە وعان جاقىنداپ، ەرەكشە سەلفي جاساۋدى ۇيعارعان.

ناتيجەسىندە ۇشاقتىڭ قاناتى مەكسيكالىق قىزداردىڭ باسىنا ءتيىپ، ولار اۋىر جاراقاتتان كوز جۇمادى.

ۇشاق پيلوتىنىڭ ايتۋىنشا، ول الدىندا ادام تۇرعانىن بايقاعانىمەن، قايعىلى وقيعانىڭ الدىن الۋ قولىنان كەلمەپتى.

اتالمىش ىسكە قاتىستى تەرگەۋ امالدارى جۇرگىزىلۋدە.