قازاقستاندىق سۋرەتشى كوزى بايلاۋلى كۇيدە سۋرەت سالىپ رەسەيلىكتەردى تاڭعالدىردى

 استانا. قازاقپارات - قازاقستاندىق سۋرەتشى رەنات ەلۋبايەۆ رەسەيلىك «ۋديۆيتەلنىە ليۋدي» باعدارلاماسىنا بارىپ، جۇرتتى تاڭعالدىردى.

ول ءبىر كورگەن كارتيناسىن كوزىن بايلاپ قويىپ، ايىنتپاي سالعان دەپ جازادى NUR. KZ.

باعدارلاماعا كەلگەن 35 جاستاعى استانالىق سۋرەتشىگە تەلەجۇرگىزۋشى پاسكال پراتت ەسىمدى سۋرەتشىنىڭ 9 بولىككە ءبولىنىپ، شاتاستىرىلىپ، ۇنەمى اينالىپ تۇراتىن پاززل سۋرەتىن تاپسىرما رەتىندە بەرەدى.

ياعني سۋرتەشى ەكرانعا شىققان كارتينادان ەكى مينۋتتىڭ ىشىندە نە بەينەلەنگەنىن ءتۇسىنىپ، بەس مينۋت ىشىندە سالىپ شىعۋى ءتيىس. بۇل تاپسىرمانىڭ بارلىعىن رەنات كوزىن قارا ماتامەن بايلاپ قويىپ، ورىنداعان.

ال قازىلاردىڭ ءوزى بۇل سۋرەتتى سالماق تۇگىل نە بەينەلەنگەنىن ءتۇسىنۋ قيىنعا سوعاتىنىن ايتادى.

5 مينۋتتان كەيىن رەنات كورەرمەندەرگە دايىن سۋرەتىن پاش ەتكەندە جينالعان جۇرت ورنىنان تۇرىپ وتانداسىمىزعا قوشەمەت كورسەتتى.

باعدارلاما جۇرگىزۋشىسى «جۇمىسىڭا ريزاسىڭ با؟» دەگەندە رەنات قاتتى قوبالجىعانىن ايتىپ، «بۇدان جاقسى سالۋعا بولاتىن ەدى» دەپ كۇلدى.

«ماعان تۇستەردى جاقسى سەزەسىڭ دەپ ايتادى. ادام قابىلەتتەرى شەكسىز عوي. كوزىڭ جابىق بولعاندا شەكسىز مۇمكىندىكتەر اشىلادى»، - دەدى دارىندى سۋرەتشى.