قازاقستان قىرعىزستانعا بەنزين ەكسپورتىن باستايدى

استانا. قازاقپارات - قازاقستان قىرعىزستانعا بەنزين ەكسپورتىن باستايدى. بۇل تۋرالى بۇگىن ۇكىمەت وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرگەن ق ر ەنەرگەتيكا ءمينيسترى قانات بوزىمبايەۆ ايتتى، دەپ حابارلايدى قازاقپارات ءتىلشىسى.

«قازىرگى ۋاقىتتا ءبىز ءوز تاراپىمىزدان قىرعىزستانعا بەنزين ەكسپورتىنا قاتىستى ءتيىستى قۇجاتتاردى ازىرلەپ، ارىپتەستەرىمىزگە جىبەردىك. وسى اپتادا مەنىڭ ورىنباسارىم نە بولماسا دەپارتامەنت باسشىسى قىرعىزستانعا بارادى. قىرعىز تاراپىنان وزگەرىستەر بولاتىن بولسا، ونى قارايمىز. قىرعىزستانعا بەنزين ەكسپورتى ماسەلەسى 2-3 اپتا ىشىندە شەشىلەدى. كورشى ەلدىڭ نارىعىندا بەنزين قانداي باعادا بولسا سونداي باعامەن جىبەرەمىز. بەنزين كەزەڭ-كەزەڭىمەن، شامامەن 10 مىڭ توننادان جونەلتىلىپ وتىرادى»، - دەدى قانات بوزىمبايەۆ.

سونىمەن ول ب ا ق وكىلدەرىنىڭ «جانارماي ەكسپورتقا شىعارىلعاننان كەيىن ىشكى نارىقتاعى بەنزين باعاسى جازعى ۋاقىتتا ليترىنە 200 تەڭگەگە جەتۋى مۇمكىن» دەگەن قاۋپىن دە سەيىلتتى.

«ول مۇمىكن ەمەس. بەنزين باعاسى وسى جىلدىڭ باسىندا 160-165 تەڭگە بولدى. ال قازىر قاراساڭىزدار اي-92 باعاسى وڭىرلەردە 150-155 تەڭگە شاماسىندا. ياعني، ءبىر ليترى 10 تەڭگەگە ارزانداعان. ءۇش مۇناي وڭدەۋ زاۋىتىن جاڭعىرتۋ جۇمىستارى قولعا الىنىپ، بەنزين ارتىعىمەن ءوندىرىلىپ جاتىر. ەگەر بەنزيندى ەكسپورتقا شىعارار بولساق، وندا ونى كەزەڭ- كەزەڭىمەن، كۆوتامەن جونەلتەمىز»، - دەدى مينيستر.

بۇعان دەيىن قانات بوزىمبايەۆ الداعى ۋاقىتتا كورشى ەلدەرمەن قاجەتتى كەلىسىمشارتتار جاسالعاننان كەيىن ارتىق بەنزين ەكسپورتقا شىعارىلاتىندىعىن ءمالىم ەتكەن بولاتىن.