ۇلكەن الماتى اينالما اۆتوموبيل جولى اقىلى بولادى

استانا. قازاقپارات - ۇلكەن الماتى اينالما اۆتوموبيل جولى اقىلى بولادى. بۇل تۋرالى بۇگىن ۇكىمەت وتىرىسىندا مەملەكەتتىك- جەكەشەلىك ارىپتەستىكتى دامىتۋ ماسەلەلەرى بويىنشا بايانداعان ق ر ينۆەستيتسيالار جانە دامۋ ءمينيسترى جەڭىس قاسىمبەك ايتتى، دەپ حابارلايدى قازاقپارات ءتىلشىسى.

جەڭىس قاسىمبەكتىڭ ايتۋىنشا، «ۇلكەن الماتى اينالما اۆتوموبيل جولىن سالۋ جانە پايدالانۋ» جوباسى بويىنشا 2018 -جىلدىڭ 7 - اقپانىندا مينيسترلىك «السيم الاركو - ماكيول - سك - كورەيان ەكسپرەسسۆەي» كونسورتسيۋمىمەن كەلىسىمشارتقا قول قويعان.

 «بۇگىنگى كۇنى تولىقتاي قۇرىلىسقا جەر ءبولۋ ماسەلەسى شەشىلدى. ۋچاسكەلەرگە تەحنيكا مەن جۇمىسشىلاردى جۇمىلدىرۋ تولىقتاي اياقتالدى، كارەرلەر راسىمدەلدى جانە اعىمداعى جىلدىڭ 31 - مامىردا قۇرىلىس جۇمىستارى باستالدى. 2021 -جىلى قۇرىلىس جۇمىستارىن اياقتاپ، جولدى اقىلى نەگىزدە پايدالانۋعا بەرۋ كوزدەلەدى»، - دەدى ول.

ءمينيستردىڭ دەرەگىنشە، قۇرىلىس كەزەڭىندە 3 مىڭعا جۋىق جۇمىس ورنى اشىلادى.

«جول تاۋلىگىنە 38 مىڭ اۆتوكولىك قۇرالىنىڭ قالا سىرتىنا شىعۋىنا مۇمكىندىك بەرەدى جانە قالانىڭ ەكولوگياسىنا وڭ اسەر ەتەدى»، - دەدى جەڭىس قاسىمبەك.

 جالپى ونىڭ دەرەگىنشە، ينۆەستيتسيالار جانە دامۋ مينيسترلىگى جەتەكشىلىك ەتەتىن سالالاردا مەملەكەتتىك- جەكەشەلىك ارىپتەستىك مەحانيزمى بويىنشا 18 جوبا پىسىقتالىپ، ىسكە اسىرىلىپ جاتىر. اتاپ ايتقاندا، 3 جوبا اۆتوموبيل جولدارى سالاسىندا، 1 جوبا تەمىرجول كولىگى سالاسىندا، 2 جوبا ازاماتتىق اۆياتسيا سالاسىندا، 12 جوبا تۇرعىن ءۇي- كوممۋنالدىق شارۋاشىلىعى جانە ەنەرگيا ۇنەمدەۋ سالالارىندا.

اۆتور: مارلان جيەمباي