بايقوڭىر عارىش ايلاعىنا جىل باسىنان مىڭنان استام ساياحاتشى ات باسىن بۇرعان
ماسەلەن، قىزىلوردا وبلىسىنىڭ «ايماقتى تۋريستەندىرۋ» كارتاسىنا 3 جوبا ەنگەن. ول نىسانداردىڭ ۇشەۋى دە «باتىس ەۋروپا - باتىس قىتاي» اۆتودالىزىنىڭ بويىندا ورنالاسقاندىقتان، جول بويىندا 50 شاقتى سەرۆيستىك كەشەن سالىنادى دەپ جوسپارلانىپ وتىر. بۇل باعىتتاعى جۇمىستار وزگە وبلىستاردا دا قارقىندى ءجۇرىپ جاتىر.
قىزىلوردا وبلىسىنىڭ «ايماقتى تۋريستەندىرۋ» كارتاسىنا «جاڭاقورعان» شيپاجايى مەن «بايقوڭىر» عارىش ايلاعى جانە قامباش كولىندەگى دەمالىس ورنى ەندى. ولار «باتىس ەۋروپا - باتىس قىتاي» اۆتودالىزىنىڭ بويىندا ورنالاسقاندىقتان، تۋريستەردىڭ كەلىپ- كەتۋىنە بارىنشا جاعداي جاسالعان. بۇگىندە جول بويىنان سالىنۋى ءتيىس 44 كولىكتىك- سەرۆيستىك ورتالىقتىڭ تەڭ جارتىسى جولاۋشىلارعا تۇراقتى قىزمەت ەتىپ تۇر. ال بايقوڭىر عارىش ايلاعىنا جىل باسىنان بەرى مىڭنان استام ساياحاتشى ات باسىن بۇردى. الداعى ۋاقىتتا وربيتا ارالىق زىمىران ۇشۋلارىن كوسمودرومعا كىرمەي- اق، تاماشالاۋعا بولادى. ول ءۇشىن بولاشاقتا ۇشۋ الاڭىنان 60-70 شاقىرىم جەردەن تۋريستىك ويىن- ساۋىق ورتالىعى بوي كوتەرەدى.
دىنمۇحاممەد ساعاتبەك ۇلى، وبلىستىق كاسىپكەرلىك جانە تۋريزم باسقارماسى باسشىسىنىڭ ورىنباسارى:
- بۇل ۇلكەن جوبا جەكە ينۆەستيتسيا ارقىلى جۇزەگە اسادى. قازىرگى تاڭدا «قازاق تۋريزم»، تۋريزم كوميتەتىمەن بىرلەسىپ جۇمىس جاساپ جاتىرمىز. بۇل ايماقتا الەمدىك تالاپقا ساي كەلەتىن قوناقجاي، مەيرامحانا، اكۆاپارك، عارىش اتتراكسيوندارى، بيلليارد، بوۋلينگ بولادى.
جامبىل وبلىسىندا «باتىس ەۋروپا - باتىس قىتاي» اۆتوماگيسترالىنىڭ بويىندا حالىقارالىق تالاپقا ساي قىزمەت كورسەتەتىن 9 سەرۆيستىك كەشەن سالىنادى. ونىڭ بەسەۋىنىڭ قۇرىلىسى بيىل اياقتالادى. بىرەۋى جۇمىس ىستەپ تۇر. قازىر قۇلان اۋىلدىق وكرۋگىندە تاۋلىگىنە 800 جولاۋشىعا قىزمەت كورسەتەتىن لوگيستيكالىق ورتالىق سالىنىپ جاتىر. كەشەننىڭ اۋماعى - 6 گەكتار. وندا مەيرامحانا، قوناق ءۇي، اۆتوتۇراق، جانار- جاعارماي قۇيۋ بەكەتى دە بولادى. جەر ءجانناتى - جەتىسۋدىڭ تۋريستىك الەۋەتى ەلىمىزدەگى وزگە وڭىرلەرگە قاراعاندا وتە زور. ويتكەنى مۇندا تاۋ دا، كول دە، كەرەك دەسەڭىز، ءشول دە بار. قازىر تۋريستىك نىسانداردىڭ ينفراقۇرىلىمىن جاقسارتۋ جۇمىستارى قىزۋ ءجۇرىپ جاتىر.
عالىمۇرات جۇكەل، الماتى وبلىسى اكىمىنىڭ باسپا ءسوز حاتشىسى:
- كولساي كولىنە، شارىن شاتقالىنا، سونىمەن قاتار بالقاش كولىنە جانە كوپتەگەن نىسانعا باراتىن جول قۇرىلىسى باستالدى. سۋى دەرتكە داۋا، جانعا شيپا بولعان ايدىندى الاكولدىڭ الماتى وبلىسىنداعى بولىگىنە بيىل 1 ميلليوننان استام ساياحاتشى كەلدى. استانا مەن الماتىدان ۇشاق قاتىناپ، پويىز ءجۇرىپ تۇر.
الايدا «الماتى- وسكەمەن» رەسپۋبليكالىق تاسجولىنىڭ جاعدايى سىن كوتەرگىسىز كۇيدە.
جانىبەك قالي، جۇرگىزۋشى:
- ءبىز ءۇشارال جاقتان كەلە جاتىرمىز. جولدىڭ ساپاسى ناشار.
ارداق ايبار ۇلى، ءتىلشى:
- تالدىقورعان - ءۇشارال باعىتىندا اينالما جول سالىنىپ جاتىر. ول وسى رەسپۋبليكالىق تاسجولدىڭ قۇرىلىسى قارقىن العان كەزدە تۇرعىنداردىڭ ەمىن- ەركىن ءجۇرىپ- تۇرۋى ءۇشىن قاجەت. قىتايلىق كومپانيالاردىڭ ءبىرى قولعا العان بۇل رەسپۋبليكالىق تاسجولدىڭ قۇرىلىسى 2021 -جىلى اياقتالۋى ءتيىس.
اۆتورلارى: ارداق ايبار ۇلى، ولجاس بايبوسىنوۆ
www.24.kz