ۇكىمەت وتىرىسى: باقىتجان ساعىنتايەۆ اكىمدەرگە قانداي تاپسىرما بەردى؟

استانا. قازاقپارات - وبلىس اكىمدەرى جەكە ينۆەستيتسيا تارتۋ جۇمىستارىنا باسا نازار اۋدارۋلارى قاجەت.

بۇل تۋرالى بۇگىن ۇكىمەت وتىرىسىندا ق ر پرەمەر-ءمينيسترى باقىتجان ساعىنتايەۆ ايتتى، دەپ حابارلايدى قازاقپارات ءتىلشىسى.

«2018-جىلدىڭ 9 ايىنىڭ قورىتىندىسى بويىنشا ينۆەستيتسيا تارتۋدا بارلىق ءتيىمدى كورسەتكىشتەردىڭ وسكەنىن ءمينيستردىڭ بايانداماسىنان ەستىدىك. جاڭا كاسىپورىندار مەن جۇمىس ورىندارى قۇرىلدى. ينۆەستورلارعا بارلىق دەڭگەيدە مەملەكەتتىك قولداۋ شارالارى كورسەتىلۋدە. ينۆەستيتسيالار تارتۋدىڭ جاڭا تەتىكتەرى ەنگىزىلىپ جاتىر. دەگەنمەن، ءبىراز جاعدايعا نازارلارىڭىزدى اۋدارعىم كەلەدى. بىرىنشىدەن، ينۆەستورلارمەن جۇمىس ىستەۋ ءۇشىن قاجەتتى جاعداي جاسالدى. اكىمدەردىڭ ارنايى ورىنباسارلارى تاعايىندالدى. قازىر وڭىرلەردە قوسىمشا ورىنباسارلار ەلباسىنىڭ كەلىسىمىمەن تاعايىندالعان. ءار وڭىردە «قازاق ينۆەستىڭ» وكىلدىكتەرى مەن ينۆەستيتسيالىق كومەك كورسەتۋ ورتالىقتارى اشىلدى. وڭىرلىك ينۆەستيتسيالىق شتابتار قۇرىلدى. وسىلايشا وڭىرلەردە ينۆەستورلارمەن ءتيىمدى جۇمىس ىستەۋگە بارلىق جاعداي جاسالدى. سوندىقتان بارلىق اكىمدەر بۇل ماسەلەگە بارىنشا جاۋاپكەرشىلىكپەن قاراپ، جۇمىستى ۇيلەستىرۋى جانە ءىس-قيىلدى كۇشەيتۋى قاجەت»، - دەدى پرەمەر-مينيستر.

ۇكىمەت باسشىسى كەلەسى كەزەكتە وڭىرلەردە جەكە ينۆەستيتسيا تارتۋ جۇمىستارىنىڭ كوڭىل كونشىتپەيتىندىگىن باسا اتاپ ءوتتى.

«شىمكەنت قالاسىنىڭ اكىمى عابيدوللا ءابدىراحىموۆ ءوز بايانداماسىندا قالاعا سالىنعان جەكە ينۆەستيتسيا كولەمى و ق و ۇلەسىنەن تومەندىگى بيۋجەتتىك ينۆەستيتسيانىڭ وسۋىنە بايلانىستى دەپ ايتىپ كەتتى. مۇنداي بار، ونى قابىلداۋعا بولمايدى. ەگەر ءبىز وسىلاي قول قۋسىرىپ وتىراتىن بولساق، وندا بۇكىل جۇمىسىمىز بيۋدجەتكە قاراپ قالادى. جالپى ينۆەستيتسيا ءوسىمى شىمكەنتتە 275 پايىز، ال جەكە ينۆەستيتسيا ۇلەسى 65 پايىز. مۇنداي جاعدايلار س ق و، اقتوبە،  قىزىلوردا، استانا قالالارىندا بار. ياعني، جەكە ينۆەستيتسيا تارتۋ جۇمىسى جوق دەگەن ءسوز. بارلىق جۇمىس - بيۋجەتتەن، رەسپۋبليكادان اقشا الۋ، ترانسۇلتتىق كومپانيالاردىڭ ينۆەستيتسياسىن اكەلۋ. ال جەكە ينۆەستيتسيا تارتۋ، ولارعا جاعداي جاساۋ جوق. سول سەبەپتەن قۇرمەتتى اكىمدەر وسىعان باسا نازار اۋدارىڭىزدار»، - دەدى باقىتجان ساعىنتايەۆ.

سونىمەن قاتار ول ەلشىلىكتەردىڭ نەگىزگى جۇمىس ەلگە ينۆەستيتسيا تارتۋ ەكەندىگىن اتاپ ءوتتى جانە ءبىرىنشى ورىنباسارى اسقار مامينگە شەتەلدەن تارتىلعان ينۆەستيتسيالاردى قاي ەلدەن، قاي ەلشىلىكتىڭ كومەگىمەن كەلگەنىن سارالاۋدى تاپسىردى.

«ءبىز جالپى تۇردە بەرەمىز. ال مۇمكىن ونىڭ ىشىندە بەلگىلى ءبىر ەلشىلىكتەر عانا جۇمىس ىستەپ جاتقان شىعار؟ باسقا جەردەن قىزىعۋشىلىق بولعانىمەن جۇمىس جوق شىعار؟ قارايىق، جۇمىس بولسا ايتامىز، بولماسا قاجەتتى كومەك كورسەتىپ، كۇش سالايىق»، - دەدى ۇكىمەت باسشىسى.

اۆتور: مارلان جيەمباي