استانالىقتار وليمپيادادان ورالعان سپورتشىلاردى قوشەمەتپەن كۇتىپ الدى
ق ر ۇلتتىق وليمپيادا كوميتەتىنىڭ حابارلاۋىنشا، ۇزاق جولدان شارشاعانىنا قاراماستان، جاس اتلەتتەر تۋىستارى مەن جاقىندارىنىڭ قۇتتىقتاۋىنا ريزا بولىپ، ب ا ق وكىلدەرىنە ەمەن-جارقىن سۇحبات بەردى.
«قازىرگى كوڭىل-كۇيىمدى سوزبەن جەتكىزە المايمىن. ءتۇن جارىمىنا قاراماستان، ءبىزدى كۇتىپ الۋعا قانشاما ادام كەلگەن! ءتىپتى، كوزىمە جاس الدىم. بىزگە قولداۋ كورسەتىپ، ءبىز ءۇشىن تاقىم قىسقان بارشا اعايىنعا راحمەت! جانكۇيەرلەردىڭ سەنىم ۇدەسىنەن شىعا العانىمىز - ۇلكەن باقىت»، - دەيدى وليمپيادا چەمپيونى، ۆەلوسپورتشى گلەب برۋسەنسكي.
«ءدال وسىلاي قارسى العانى ءۇشىن راحمەت! ارينە، ءبىزدى كۇتىپ الاتىنىن بىلدىك. ءبىراق تاپ وسىنشا كوپ ادام جينالادى دەپ ويلاماعان ەك. كوپ راحمەت!»، - دەيدى گلەبتىڭ كوماندالاسى ەۆگەني فەدوروۆ.
«ەلگە ورالدىق. كۇتىپ العان كىسىلەرگە كوپ راحمەت. جەڭىستى كۇندەرىمىز كوپ بولسىن»، - دەيدى دزيۋدودان التىن جۇلدەگەر اتانعان بەكارىس ءسادۋاقاس.
قازاقستان قۇراما كومانداسى ساپىنداعى ەڭ جاس سپورتشىلاردىڭ ءبىرى روزا ابيتوۆا حالىقارالىق كوماندا ساپىندا وليمپيادانىڭ كۇمىس جۇلدەگەرى اتاندى. ول وزىنە قولداۋ كورسەتكەن جانكۇيەرلەرگە العىسىن ايتىپ، ريزاشىلىعىن ءبىلدىردى.
«جىراقتا ءجۇرىپ جەڭىپ العان مەدالدىڭ قانشالىقتى باعالى ەكەنىن ەلگە كەلگەن سوڭ تۇسىنەسىڭ. مۇنداي ساتتەردە كورسەتىلگەن قولداۋ وتە ماڭىزدى. ەلىمىزدە ءبىز ءۇشىن قۋاناتىن ادامدار كوپ. مىنە، سول جاندار ءۇشىن دە جەڭىسكە جەتكىم كەلەدى»، - دەپ اعىنان جارىلدى دزيۋدودان جاس وسپىرىمدەر وليمپياداسىنىڭ كۇمىس جۇلدەگەرى مارگاريتا گريتسەنكو.
جاس وسپىرىمدەر وليمپياداسىنىڭ قولا جۇلدەگەرى ستەللا سۋحانوۆا دا كوماندالاستارىنىڭ تىلەگىنە قوسىلىپ، جانكۇيەرلەرگە العىسىن جەتكىزدى.
ەستەرىڭىزگە سالا كەتەيىك، بۋەنوس-ايرەستە قازاقستان سپورتشىلارى ءتورت التىن، ءۇش كۇمىس جانە ءۇش قولا مەدالمەن جالپى ەسەپتە 15-ورىنعا قول جەتكىزگەن بولاتىن. بۇل جاس وسپىرىمدەرىمىزدىڭ وليمپيادا ويىندارىنداعى ازىرگە ەڭ جوعارعى جەتىستىگى. ودان بولەك، حالىقارالىق كوماندا ساپىندا جاس سپورتشىلارىمىز 1 كۇمىس جانە 1 قولا مەدال يەلەندى.
التىن جۇلدەگەرلەر: بەكارىس ءسادۋاقاس (دزيۋدو)، دياس باحراددين (ەسكەك ەسۋ)، گلەب برۋسەنسكي مەن ەۆگەني فەدوروۆ (ۆەلوسپورت)، ايبەك ورالباي (بوكس).
كۇمىس جۇلدەگەرلەر: دامير تويباي (بوكس)، تالعات شايكەن (بوكس)، مارگاريتا گريتسەنكو (دزيۋدو).
قولا جۇلدەگەرلەر: نادەجدا ريابەتس (بوكس)، ستەللا سۋحانوۆا (ەسكەك ەسۋ)، ءابىلمانسۇر باتىرعالي (كاراتە).
حالىقارالىق كوماندا ساپىندا روزا ابيتوۆا (كوركەم گيمناستيكا) كۇمىس، بەكارىس ءسادۋاقاس (دزيۋدو) قولا مەدال جەڭىپ الدى.
3-جازعى جاس وسپىرىمدەر وليمپياداسى 6-18 قازان ارالىعىندا ءوتتى. وعان 206 مەملەكەتتەن 4 مىڭ سپورتشى قاتىستى. جارىستار باعدارلاماسىنا سپورتتىڭ ءداستۇرلى 28 تۇرىنەن بولەك، سپورتتىق بيلەر (برەيك-دانس)، كاراتە، تاۋعا ورمەلەۋ، روليكپەن سىرعاناۋ قوسىلدى.
بايراقتى دودادا ەل نامىسىن 58 سپورتشى قورعادى.
اۆتور: كۇنسۇلتان وتارباي