ەلباسى تاپسىرماسى بويىنشا قازاقستاندا تىكەلەي ينۆەستيتسيالار قورى قۇرىلادى

None
None
استانا. قازاقپارات - تىكەلەي ينۆەستيتسيالار قورىن قۇرۋ ماسەلەسى پىسىقتالۋدا. بۇل تۋرالى بۇگىن ۇكىمەت وتىرىسىندا ق ر ينۆەستيتسيالار جانە دامۋ ءمينيسترى جەڭىس قاسىمبەك ايتتى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، ەلگە ينۆەستيتسيا تارتۋ جوعارى باسەكەگە قابىلەتتى نارىققا بايلانىستى بولادى. ينۆەستيتسيالىق پرەفەرەنتسيالاردى نەمەسە ينفراقۇرىلىمدى قولداۋدى ۇسىنۋ جەتكىلىكتى بولا بەرمەيدى.

«وسىعان وراي، مەملەكەت باسشىسىنىڭ تاپسىرماسىنا سايكەس تىكەلەي ينۆەستيتسيالار قورىن قۇرۋ ماسەلەسى پىسىقتالۋدا. بۇل قور اناعۇرلىم پەرسپەكتيۆالى جوبالار مەن سۇرانىسقا يە نىسانالى دا ناقتى ينۆەستيتسيالاردى جۇزەگە اسىراتىن بولادى»، - دەدى ول.

ونىڭ سوزىنە قاراعاندا، ينۆەستيتسيا تارتۋدا الەۋەتتى ينۆەستورلار ءۇشىن قاجەتتى بارلىق اقپاراتتى قامتىعان ساپالى ينۆەستيتسيالىق پورتال ماڭىزدى رولگە يە.

«ۇكىمەتتە ءبىرقاتار وتىرىستار وتكىزىلىپ، ولاردا ماڭىزدى ماسەلەلەر، سونىڭ ىشىندە ينۆەستپورتال تۋرالى ايتىلدى. قازىرگى ۋاقىتتا ءبىرقاتار وڭىرلەردە ينۆەستيتسيالىق پورتالداردى تولتىرۋ تۋرالى ماسەلەسىندەگى بارلىق ەسكەرتۋلەر جويىلدى. قالعانى بيىل جىلدىڭ سوڭىنا دەيىن اياقتالادى»، - دەدى جەڭىس قاسىمبەك.

ەسكە سالا كەتسەك، ەلباسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى حالىققا جولداۋىندا «ءىرى ءارى سەرپىندى جوبالاردى جۇزەگە اسىرۋ ءۇشىن شەتەلدىك ينۆەستورلارمەن بىرلەسىپ ينۆەستيتسيا سالۋ قاعيداتى بويىنشا جۇمىس ىستەيتىن شيكىزاتتىق ەمەس سەكتورعا بولىنەتىن تىكەلەي ينۆەستيتسيا قورىن قۇرۋ ماسەلەسىن قاراستىرۋ قاجەت»، - دەلىنگەن بولاتىن.

سوڭعى جاڭالىقتار