حالىقارالىق ايتىستىڭ باس جۇلدەگەرلەرى - رينات زايتوۆ پەن مۇحتار نيازوۆ

 استانا. قازاقپارات - كورگەن دە ارماندا، كورمەگەن دە ارماندا! استانا ءتورىن ەكى كۇن جىرعا بولەگەن ءدۇبىرلى ايتىس ءوتتى.

 قازاقستان رەسپۋبليكاسى مادەنيەت جانە سپورت مينيسترلىگىنىڭ ۇيىمداستىرۋمەن استانا قالاسىنىڭ 20 جىلدىعىنا ارنالعان «جىر ارقاۋى - استانا» اتتى حالىقارالىق اقىندار ايتىسى قالىڭ ەلدى شۋلاتىپ، حالىقتىڭ ءسوز ونەرىنە دەگەن ءشولىن ءبىر قاندىرىپ، قۇمارىن ءبىر تارقاتتى- اۋ!
ايتۋلى جىر دوداسىنا قىرعىزستان ەلىنەن اسىلبەك ماراتوۆ، مۋندۋزبەك ۋسۋپبەك، موڭعوليادان راشات ايدوس، قۋانتقان امانجول سىندى جۇلدەلى جۇيرىكتەر كەلسە، ەلىمىزدەگى تانىمال اقىندار ايبەك قاليەۆ، رينات زايتوۆ، مۇحتار نيازوۆ، رۇستەم قايىرتاي، ماقسات اقانوۆ، ديدار قاميەۆ، مەيىربەك سۇلتانحان جانە وزگە دە تانىمال اقىندار قاتىسقان بولاتىن. حالىقارالىق دوداعا ايتىس اقىندارى مەن جىرشى- تەرمەشىلەردىڭ حالىقارالىق وداعىنىڭ ءتوراعاسى، ايتىستىڭ اقساقالى ءجۇرسىن ەرمان، قازاقستان جازۋشىلار وداعىنىڭ ءتوراعاسى، اقىن ۇلىقبەك ەسداۋلەت، قازاقستاننىڭ حالىق اقىنى ءاسيا بەركەنوۆا، «ايقىن» گازەتىنىڭ باس رەداكتورى نۇرتورە ءجۇسىپ، بەلگىلى عالىم، الاشتانۋشى ديحان قامزابەك ۇلى جانە تۇركيادان كەلگەن عالىم، ءابدۋاقاپ قارا، موڭعوليادان كەلگەن اقىن، شىناي راحمەت ۇلى قازىلىق جاسادى.
سونىمەن، استانانىڭ 20  جىلدىعىنا وراي ۇيىمداستىرىلعان ايتىسقا كەلگەن 20 اقىننىڭ ىشىنەن كەلەسى كۇنگە 12 اقىن سۋرىلىپ شىقتى.
فينالدا اسپانبەك شۇعاتايەۆ پەن ايبەك قاليەۆ، رۇستەم قايىرتاي مەن ماقسات اقانوۆ، سەرىك قويشىعۇلوۆ پەن اسىلبەك ماراتوۆ، مەيىربەك سۇلتانحان مەن شۇعايىپ سەزىمحان، رينات زايتوۆ پەن ايدوس راشات، مۇحتار نيازوۆ پەن ديدار قاميەۆ ايتىستى.
شىنى كەرەك، ەكىنشى كۇنگى ايتىس ءسال قىسقالاۋ بولسا دا ءبىرىنشى كۇنگى ايتىستان باسىم بولعانداي. اقىندار بارىن سالدى. قازىلار كوبىنە تولىق ۇپاي كوتەرىپ وتىردى. التى جۇپ ايتىس اياقتاعاننان كەيىن قازىلار اقىلداسۋعا شىعىپ، وسىلاردىڭ ىشىنەن ۇزدىك شىققان رينات زايتوۆ پەن مۇحتار نيازوۆتى باس جۇلدە ءۇشىن شەشۋشى ايتىسقا جىبەردى.

ەكەۋى دە ەنتىكپەگەن ەكەن. ناعىز شاپپا- شاپ ايتىس جاسادى. شۋلاعان ەل بىرىنەن كەيىن بىرىنە اۋناپ زالدى جارىپ كەتەردەي شاتىرلاتىپ شاپالاق سوقتى. ول ايتىس تا اياقتادى. ەندىگى ماسەلە - باس جۇلدە كىمدىكى؟ باس بايگەنىڭ جۇلدەسى -  000 000 7 تەڭگە.
شىنىندا قازىلارعا قاتتى سوعار ماسەلە. وسى تۇستا قازىلاردىڭ قاسىنا مادەنيەت جانە سپورت ءمينيسترى ارىستانبەك مۇحامەدي ۇلى كەلدى. تاعى دا اقىلداستى. ءبىراز سويلەسىپ، ءبىر شەشىمگە كەلگەندەي بولدى.
اسىلبەك ماراتوۆ، ايدوس راشات، ديدار قاميەۆ، شۇعايىپ سەزىمحان، اسپانبەك شۇعاتايەۆ سىندى بەس اقىنعا ارنايى جۇلدە بەرىلىپ  500000 تەڭگەدەن سىياقى ۇلەستىرىلدى. جۇلدەلى ءۇشىنشى ورىندى ايبەك قاليەۆ، ماقسات اقانوۆ، سەرىك قويشىعۇلوۆ يەلەنىپ، ءار قايسىسى  000 1000 تەڭگەدەن قانجىعالادى.
ايتا كەتەرلىگى، سەرىك قويشىعۇلوۆقا بەرىلگەن جۇلدەنى قازاقستان رەسپۋبليكاسىنىڭ مادەنيەت، سپورت جانە اقپارات قىزمەتكەرلەرى سالالىق كاسىپوداعىنىڭ ءتورايىمى سۆەتلانا يمانقۇلوۆا تاعايىنداپتى.
جۇلدەلى ەكىنشى ورىندى رۇستەم قايىرتاي ۇلى مەن مەيىربەك سۇلتانحان يەلەنىپ، ءار قايسىسى  000 000 2  تەڭگەدەن ەنشىلەدى. ءسويتىپ، بۇل ايتىسقا ەكى باس جۇلدە بەرىلەتىن بولىپ شەشىم شىقتى. ءبىرىنشى ورىن جوق، ەكەۋىنە دە  000 7000 تەڭگەدەن بەردى!
ناعىز ايتىستىڭ شارپىسىن، ناعىز دودانىڭ تارتىسىن كورسەتكەن ەكى اقىنعا بىردەي جۇلدە بەرگەن قازىلارعا ريزا كوڭىلمەن قايتقان ايتىس سۇيەر قاۋىمنىڭ قۇلاق قۇرىشىندا قالعان اقىندار جىرى كوپكە دەيىن ۇمىتىلماستاي بولدى.

ۇلاربەك نۇرعالىم ۇلى، «ەگەمەن قازاقستان»