قايرات نۇرتاس، قاراقات ءابىلدينا، يبراگيم ەسكەندىر «دەنساۋلىق ەلشىسى» اتاندى
جۇزدەسۋ بارىسىندا ولارعا «دەنساۋلىق ەلشىسى» اتاعى بەرىلدى، دەپ حابارلايدى قازاقپارات ءتىلشىسى.
«جاقىندا ەلباسى ءوز جولداۋىندا بۇگىندە حالىقتى مازالاپ وتىرعان ەڭ باستى ماسەلە دەنساۋلىق ساقتاۋ سالاسى مەن مەديتسينالىق قىزمەتتىڭ ساپاسى ەكەندىگىن اتاپ وتكەن بولاتىن. ارينە، ءبىزدىڭ مەديتسينا سالامىزدا ماسەلە كوپ. ءبىراق، ءار ادام دەنساۋلىعىنىڭ 50 پايىزى ونىڭ سالاۋاتتى ءومىر سۇرۋىنە تىكەلەي بايلانىستى ەكەندىگى عىلىمي تۇرعىدا دالەلدەنگەن. قازاقتا «اۋىرىپ ەم ىزدەگەنشە، اۋىرمايتىن جول ىزدە» دەگەن ءسوز بار. سوندىقتان ءبىزدىڭ مينيسترلىكتىڭ ستراتەگياسىندا اۋرۋلاردىڭ الدىن الۋ ايرىقشا باسىمدىققا يە باعىت»، - دەدى ول كەزدەسۋ بارىسىندا.
سونىمەن قاتار ەلجان ءبىرتانوۆ سوڭعى جىلدارى ەلىمىزدە سپورتپەن اينالىسىپ، دۇرىس تاماقتانۋعا دەن قويعان حالىقتىڭ ۇلەسى دە ارتىپ كەلە جاتقانىن باسا ايتتى.
«وسى ورايدا ءبىز بۇل جۇمىستارعا ەسىمى ەلگە تانىمال ازاماتتاردى دا تارتقىمىز كەلەدى. حالىق سىيلايتىن، قۇرمەتتەيتىن سىزدەرمەن بىرگە جۇمىس ىستەۋ ويىمىزدا بار. ۇسىنىمىزدى قولداعاندارىڭىز ءۇشىن ريزاشىلىعىمدى بىلدىرەمىن. دەنساۋلىق ەلشىلەرى - ونەر، سپورت، ەسترادا الەمىنىڭ بەلگىلى تۇلعالارى ءوز قىزمەتتەرى اياسىندا سالاۋاتتى ءومىر سالتىن قالىپتاستىرۋعا ەلەۋىل ۇلەس قوسا الادى»، - دەدى مينيستر.
سوىنمەن ەلىمىزدىڭ ەڭ العاشقى «دەنساۋلىق ەلشىسى» اتاعى ءانشى، قازاقستاننىڭ ەڭبەك سىڭىرگەن قايراتكەرى قاراقات ءابىلديناعا، اكتەر نۇرلان ءالىمجانوۆقا، ءانشى قايرات نۇرتاسقا، ءانشى، كاسىپقوي بوكسشى يبراگيم ەسكەندىرگە بەرىلدى.
«ءاربىر پەندە دەنى ساۋ ۇرپاق تىلەيدى. وكىنىشكە وراي، قاراگوز بالالارىمىزدىڭ اراسىندا اۋىر ناۋقاسقا، جازىلماس دەرتكە شالدىققاندارى دا بار. بۇل دەگەنىڭىز جۇكتىلىك كەزدە ورىن العان قاتەلىكتەردىڭ سالدارى دەگەن ءسوز. ياعني، ءسابيدى جارىق دۇنيەگە اكەلەر انانىڭ دەنساۋلىعىنىڭ ناشارلاۋىمەن بايلانىستى. جالپى، بولاشاق انانىڭ الدىن الا دايىندىق جۇرگىزبەۋى، دەنساۋلىعىنا ەنجار قاراۋى ناتيجەسىندە كىناراتى بار بالالار دۇنيەگە كەلىپ جاتىر. بۇل دابىل قاعاتىن ماسەلە. سوندىقتان دۇنيەگە ءسابي اكەلۋدى ارمانداپ جۇرگەن انالار ەڭ الدىمەن وزدەرىنىڭ دەنساۋلىعىن كۇتكەنى دۇرىس. سوندا بىزدە مۇنداي پروبلەما بولماس ەدى»، - دەدى مينيسترمەن كەزدەسۋدەن كەيىن ب ا ق وكىلدەرىنە سۇحبات بەرگەن قاراقات ءابىلدينا.
اۆتور: مارلان جيەمباي