قازاقستاندا ەڭ جوعارى سۇرانىسقا يە ماماندىقتار قانداي؟

استانا. قازاقپارات - قازاقستاندا قانداي ماماندىقتار ەڭ كوپ سۇرانىسقا يە؟ جۇمىس بەرۋشىلەر ولارعا قانداي مولشەردە ايلىق تولەۋگە دايىن وتىر؟

بۇل تۋرالى ەnergyprom.kz تەرەڭىرەك تالداۋ جۇرگىزدى، دەپ حابارلايدى قازاقپارات ءتىلشىسى.

ەلىمىزدەگى ەڭ جوعارى سۇرانىسقا يە ماماندىقتاردىڭ كوش باسىندا ءالى دە ەسەپشىلەر مەن زاڭگەرلەر تۇر. ولاردىڭ قازاقستانداعى ورتاشا ايلىق جالاقىسى 157 مىڭ تەڭگە. الايدا جۇمىس بەرۋشىلەر ولارعا ايىنا 283 مىڭ تەڭگە تولەۋگە دايار.

اتالمىش سالالارداعى قىزمەتتىڭ دەڭگەيى العاشقى جارتى جىلدىقتىڭ قورىتىندىسى بويىنشا 58 پايىزعا وسكەن.

جارتى جىلدىڭ قورتىندىسى بويىنشا ەسەپشىلىك پەن زاڭگەرلىك سالادا قازاقستاندىقتارعا 51,9 ميلليارد تەڭگەنىڭ قىزمەتى كورسەتىلگەن. بۇل - وتكەن جىلمەن سالىستىرعاندا 57,6 پايىزعا ارتىق كورسەتكىش.

كورسەتىلگەن قىزمەتتەردىڭ سانى جاعىنان الماتى قارجى ورتالىعى (ق ر- داعى قىزمەتتەردىڭ 71,5 پايىزى) كوش باستاپ تۇر. سونىمەن بىرگە، جالپى قىزمەتتەردىڭ 18,6 پايىزىن استانالىق ەسەپشىلەر مەن زاڭگەرلەر كورسەتكەن.

كورسەتىلگەن قىزمەتتەردىڭ ىشىندە ەڭ سۇرانىسى جوعارى - اۋديتورلاردىڭ قىزمەتى. جالپى، قىزمەتتەردىڭ 32,2 پايىزىن (16,7 ميلليارد تەڭگە) اۋديتورلار كورسەتكەن. سونىمەن بىرگە، قىزمەتتەردىڭ 24,1 پايىزى شوت قۇرۋ مەن بۋحالتەرلىك ەسەپ قىزمەتىنە تيەسىلى. ال 10,4 ميلليارد تەڭگەنىڭ زاڭگەرلىك كەڭەسىن جۇرگىزگەن ادۆوكاتتارعا جالپى قىزمەتتەردىڭ 20 پايىزى كەلىپ وتىر.

جالپى، قازاقستانداعى جۇمىس بەرۋشىلەردىڭ جارتىسىنا جۋىعى (49,6 پايىزى) الەۋەتتى قىزمەتكەردىڭ كەم دەگەندە ءبىر جىلدىق ءوتىلى بولعانىن قالايدى. HeadHunter پورتالىنىڭ تالداۋىنا سۇيەنسەك، جۇمىس الدىنداعى ساۋالناماعا كوپ جاعدايدا 3 جىلدىق ءوتىلى بار، تولىق جۇمىس كۇنىندە ەڭبەك ەتە الاتىن ادامداردى شاقىرادى. جۇمىس ءوتىلى 3 جىلدان 6 جىلعا دەيىنگى مامانداردى ۇجىمداعى HR- مامانداردىڭ 26 پايىزى كورگىسى كەلەدى. بۇرىن ەش جەردە ەڭبەك ەتپەگەن ادامدى جۇمىسقا الۋعا جۇمىس بەرۋشىلەردىڭ 18 پايىزى نيەتتى.