تۇركيادا «كوك تۋ» قازاق مادەني قوعامى قۇرىلدى

None
None
 استانا. قازاقپارات - انادولى توپىراعىندا قازاقتىڭ مادەنيەتى ۇلىقتالاتىن تاعى ءبىر ورتالىق اشىلدى، دەپ حابارلايدى «حابار 24» ارناسىنىڭ ءتىلشىسى.

 تۇرىك ەلىندەگى قازاق قوعامداستىقتارىنىڭ سانى انكارادا قۇرىلعان «كوك تۋ» مادەني قوعامىمەن تولىقتى. سۋ جاڭا قوعام وكىلدەرى باۋىرلاس ەلدە قازاقتىڭ ۇلتتىق مادەنيەتى مەن سالت- ءداستۇرىن ناسيحاتتاپ، وزگە ۇلت وكىلدەرىمەن بايلانىس ورناتۋدى كوزدەيدى.


 قازاقستاننىڭ تۇركيا رەسپۋبليكاسىنداعى ەلشىلىگىندە وتكەن القالى شاراعا ساياسي جانە قوعام قايراتكەرلەرى، زيالى قاۋىم وكىلدەرى مەن تۋىس ەلدە ءبىلىم الۋشى جاستار قاتىستى.

 ابزال ساپاربەك ۇلى، قازاقستاننىڭ تۇركياداعى ەلشىسى:

 - انكاراداعى ساياسي، قوعامدىق، ونەر قاۋىمداستىعىنىڭ وكىلدەرىنە وسى قوعامىمىمزدى تانىتايىق دەپ وسىنداي ءىس- شارا ۇيىمداستىرىپ وتىرمىز. جالپى تۇركيا جەرىندە بۇل ىسپەتتەس قوعامدىق ۇيىمدار بار. ءبىراق ولاردىڭ باسىم كوپشىلىگى ىستامبۇل قالاسىندا ورنالاسقان. ءبىراق انكارا تورىندە قوعامداستىق العاشقى رەت قۇرىلىپ وتىر. جالپى، انادولى جەرىنە العاش XX عاسىردا كوش تۇزەگەن قازاقتاردىڭ ءتۇرلى قوعامدارى بار. ال تاۋەلسىزدىك العاننان كەيىن كەلگەن قانداستارىمىزدىڭ باسىن بىرىكتىرەتىن مەملەكەتتىك ەمەس ۇيىم بولماعان.

 تۇركيا پرەزيدەنتىنىڭ باس كەڭەسشىسى يالچىن توپچۋنىڭ پىكىرىنشە، مۇنداي بىرلەستىكتەر ءتۇبى ءبىر تۇركى جۇرتىنىڭ ىنتىماقتاستىعىن ودان ءارى ارتتىرادى.

 يالچىن توپچۋ، تۇركيا پرەزيدەنتىنىڭ باس كەڭەسشىسى:

- تۇركى دۇنيەسىندە مەملەكەتتىك ەمەس ۇيىمداردىڭ سانىن كوبەيتۋىمىز كەرەك. سەبەبى، بۇل سىندى قوعامدار ەلدەگى دەموكراتيانىڭ جوعارى كورسەتكىشى بولىپ تابىلادى. «كوك تۋ» قازاق قوعامىنىڭ ماقساتى - تۇركيادا ءومىر سۇرەتىن قازاق دياسپوراسى عانا ەمەس، وندا قىزمەت ەتەتىن جەرلەستەرىمىز بەن ءتۇرلى ءبىلىم وردالارىندا ءبىلىم الاتىن جاستاردى ءبىر شاڭىراق استىنا ۇيىستىرۋ.

ءلاززات مۋلازيموعلۋ، «كوك تۋ» قازاق قوعامىنىڭ ءتورايىمى:



 - بولاشاقتاعى جوسپارىمىز - قوعامىمىزدىڭ اتى «كوك تۋ» قازاق مادەنيەتى قوعامى بولعاندىقتان، قازاقستاننىڭ مادەنيەتىن جاڭعىرتۋ، مادەنيەتىن تانىستىرۋ، ەكى ەلدىڭ اراسىنداعى مادەني ۇقساستىقتارى بولسىن، بىرگە جۇمىس جاساۋ. ەكى ەل اراسىنداعى قارىم- قاتىناستى كۇشەيتۋ.

 شارا سوڭىندا «وسمانلى مۇراعاتىنداعى دەرەكتەر بويىنشا قازاق- تۇرىك قاتىناستارى» اتتى كورمە ۇيىمداستىرىلىپ، قازاقستاننان ارنايى شاقىرىلعان «حانىم» ءسان ءۇيىنىڭ ۇلتتىق كيىمدەر دەفيلەسى ءوتتى.

www.24.kz

سوڭعى جاڭالىقتار