حاشوگگيدىڭ ءولىمى ساۋد ارابياسىن الەم الدىندا ىڭعايسىز كۇيگە قالدىردى

استانا. قازاقپارات - ساۋد ارابياسى بيلىگىنىڭ جۋرناليست دجامال حاشوگگيدىڭ ىستامبۇل قالاسىنداعى كونسۋلدىقتا قازا تاپقانىن مويىنداۋى حالىقارلىق قاۋىمداستىقتىڭ سىنىنا ۇشىرادى.

 ب ۇ ۇ تەز ارادا اشىق ءارى جان- جاقتى تەرگەۋ جۇرگىزۋدى تالاپ ەتتى.

 ا ق ش پرەزيدەنتى دونالد ترامپ «ساۋد ارابياسى -  جاقسى وداقتاس مەملەكەت، ءبىراق جۋرناليستىڭ ءولىمى كەرەعار ارەكەت» دەپ جەتكىزدى. ال اۆستراليا پرەمەر- ءمينيسترى سكوت پەين مەن كەي ەلدەردىڭ ساياساتكەرلەرى مەن بيزنەسمەندەرى ەر- ريادتا وتەتىن ءىرى ەكونوميكالىق فورۋمعا قاتىسۋدان باس تارتتى.

 ەسكە سالا كەتەيىك، كەشە ساۋد ارابياسىنىڭ ۇلتتىق تەلەارناسى باس پروكۋرورعا سىلتەمە جاساپ، حاشوگگيدىڭ وسى ەلدىڭ ىستامبۇل قالاسىنداعى كونسۋلدىعىندا ولگەنىن حابارلادى. اقپارعا قاراعاندا، حاشوگگي عيماراتتاعى ادامدارمەن سوزگە كەلىپ، توبەلەس شىعىپ، سوڭىندا جۋرناليست قازا تاپقان. وسى ىسكە قاتىستى كورولدىقتىڭ 18 ازاماتى تۇتقىنعا الىنىپ، 2 جوعارى لاۋازىمدى تۇلعا وتستاۆكاعا كەتتى.

ساۋد ارابياسى كورولى سالمان تاق مۇراگەرى حانزادا مۇحاممەد بين سالمان باسقاراتىن مينيسترلەر كابينەتىنە مەملەكەتتىك بارلاۋ قىزمەتىنىڭ جۇمىسىن قايتا قۇرۋدى بۇيىرعان. حانزادانىڭ ەكى جوعارى لاۋازىمدى كەڭەسشىسى قىزمەتتەرىنەن بوساتىلعان. ولاردىڭ ءبىرى - بارلاۋ قىزمەتى باسشىسىنىڭ ورىنباسارى، گەنەرال- مايور احمەد ءال- اسسيري. The New York Times باسىلىمىنىڭ دەرەگىنشە، ەل بيلىگى ونى جۋرناليستىڭ قازاسىنا ايىپتى دەپ اتاماقشى دا بولعان.

ساۋد ارابياسىنىڭ مەملەكەتتىك باسپا ءسوزى كورول سالماننىڭ تۇركيا پرەزيدەنتى رەجەپ ەردوعانمەن حاشوگگيدىڭ ءىسى جونىندە تەلەفونمەن سويلەسكەنى تۋرالى اقپارات تاراتتى دەپ حابارلادى بي-بي-سي.

ساۋديالىق وپپوزيتسيالىق جۋرناليست جامال حاشوگگي قازاننىڭ 2- كۇنى ساۋد ارابياسىنىڭ ستامبۋلداعى كونسۋلدىعىنا كىرگەننەن كەيىن جوعالىپ كەتكەن. تۇركيالىق تەرگەۋشىلەر حاشوگگيدى كونسۋلدىق تەرريتورياسىندا ولتىرگەن دەگەن بولجام جاساعان. ەل بيلىگىنىڭ قولىنا تۇسكەن تاسپادا تۇركياعا ارنايى ۇشىپ كەلگەن ادامداردىڭ كونسۋلدىقتا حاشوگگيدەن جاۋاپ الىپ، كەيىن ازاپتاپ ولتىرگەنىن دالەلدەيتىن داۋىستار جازىلىپ قالعان دەگەن اقپارات تاراعان.

الايدا ساۋد ارابياسى مەملەكەتتىك تەلەارنادان تاراتقان مالىمدەمەسىندە وپپوزيتسيالىق جۋرناليستىڭ قازاسىن العاش رەت رەسمي تۇردە مويىندادى.

حاشوگگيدىڭ ءولىمى ديپلوماتيالىق جانجالعا سەبەپ بولدى. جۋرناليست جوعالىپ كەتكەن سوڭ ەۋروپا وداعى مەن ا ق ش ساۋد ارابياسىنا قارسى سانكسيالار سالۋ مۇمكىندىكتەرىن تالقىلاۋعا كىرىسكەن. ا ق ش پرەزيدەنتى دونالد ترامپ ەگەر حاشوگگيدىڭ قازاسىنىڭ ارتىندا ساۋد ارابياسى بيلىگى تۇرعانى انىقتالسا، وندا ەر- ريادقا قارسى شارالار قولداناتىنى تۋرالى مالىمدەگەن.

www.24.kz