سىعاناق قالاشىعى تۋريستىك نىسان رەتىندە اشىلدى

قىزىلوردا. قازاقپارات - قىزىلوردا وبلىسى جاڭاقورعان اۋدانىندا ورنالاسقان سىعاناق قالاشىعى تۋريستىك نىسان بولىپ اشىلدى، دەپ حابارلايدى قازاقپارات ءتىلشىسى.

قايتا قالپىنا كەلتىرۋ شارالارى جۇرگىزىلگەن سىعاناق ەندى الىس جانە جاقىننان كەلەتىن جيھانكەزدەردى تارتاتىن تاريحي-مادەني ورتالىققا اينالماق. وبلىستىق ءماسليحات حاتشىسى ناۋرىزباي بايقاداموۆ كونە قالانىڭ تۋريزم نىسانى رەتىندە اشىلۋ سالتاناتىندا وسىلاي دەدى.

«سىعاناق ءبىزدىڭ تاريحىمىزدا ايرىقشا ورىن الادى. سوندىقتان ءبىزدىڭ حالقىمىز بۇل شاھاردى ەرەكشە قۇرمەت تۇتادى. بۇل شارا وتكەن تاريحتى باعالاي وتىرىپ، ونى ۇرپاق ساناسىنا سىڭىرۋدە ءوز سەپتىگىن تيگىزەدى»، - دەدى ن. بايقاداموۆ.

وبلىستىق تاريحي جانە مادەني ەسكەرتكىشتەردى قورعاۋ ورتالىعىنىڭ ماماندارىنىڭ ايتۋىنشا، كونە قالا ورنىندا ارحەولوگيالىق قازبا شارالارى جۇرگىزىلدى.

سونىمەن قاتار، وندا 3 كەزەڭدىك قايتا قالپىنا كەلتىرۋ جۇزەگە اسپاق. العاشقى كەزەڭى بويىنشا ساۋىردەن تامىزعا دەيىن قاجەتتى جۇمىستار جاسالدى. قۇم استىنداعى قازىنالارعا ءجىتى نازار اۋدارعان زەرتەتۋشىلەر بۇل قالادا VI- VII عاسىرلاردا تىرشىلىك قايناپ تۇرعانىن ايتادى. سونداي-اق، بۇرىننان ايتىلىپ جۇرگەن اق وردانىڭ ورتالىعى بولعان تۇستا وندا تەڭگە سوعىلعان دەگەن دەرەك تە تولىق دالەلدەنە باستادى.

سىعاناق قالاشىعىنداعى شىعىس قاقپاسىنىڭ ەكى جاق ۇلكەن قامالى بار. قايتا قالپىنا كەلتىرۋ شارالارى بارىسىندا سول قامال 3 مەترگە دەيىن كوتەرىلىپ، قاقپانىڭ ءوزىن 1,5 مەترگە دەيىن بيىكتەتىلدى.

رەستاۆراتسيالىق شارالارعا جانە ارحەولوگيالىق قازبا جۇمىستارىنا رەسپۋبليكالىق جانە وبلىستىق بيۋجەتتەن قارجى ءبولىندى.

الداعى ۋاقىتتا  قىزىلوردا وبلىسىندا ورنالاسقان سىعاناقپەن بىرگە شىرىك-رابات، جانكەنت شاھارلارىنا سەرۆيستىك ينفراقۇرىلىم جۇرگىزىلەدى. بۇل شاھارلار ەجەلگى تۇركى تايپالارىنىڭ استانالارى رەتىندە تۋريستىك كلاستەر جاسالادى.

ەستەرىڭىزگە سالا كەتەلىك، بۇدان بۇرىن سىعاناق قالاشىڭىنىڭ ورتاق بولىگى قالپىنا كەلتىرىپ جاتقانىن حابارلاعان ەدىك. سونداي- اق، اتالمىش شاھاردىڭ ەتنوتۋريزم ورتالىعىنا اينالاتىنى جونىندە ايتقان بولاتىنبىز.

اۆتور: ءادىلجان ۇمبەت