استانا ىرگەسىندە بۇركىتشىلەردىڭ جارىسى ءوتىپ جاتىر

استانا. قازاقپارات - ەلوردا ىرگەسىندەگى قوياندى اۋىلىنىڭ اۋماعىندا ايگىلى قۇسبەگىشى كۇنتۋعان توقتىباي ۇلىن ەسكە الۋعا ارنالعان بۇركىتشىلەردىڭ حالىقارالىق تۋرنيرى ءوتىپ جاتىر، دەپ حابارلايدى قازاقپارات ءتىلشىسى.

وسىمەن 4-رەت وتكىزىلىپ وتىرعان حالىقارالىق تۋرنيرگە ەلىمىزدىڭ 10 وبلىسىنان كەلگەن 30 عا جۋىق بۇركىتشى قاتىسۋدا. ونىڭ ىشىندە موڭعوليا ەلىنەن كەلگەن 2 بۇركىتشى بار.

ايتۋلى باسەكەنىڭ جالپى جۇلدە 500 مىڭ تەڭگەنى قۇرايدى جانە ول بىرنەشە كەزەڭنەن تۇرادى، اتاپ ايتقاندا بۇركىتتى قولعا شاقىرۋ، ەركىن ۇشىرۋ جانە شىرعاعا سالۋ. ودان بولەك بۇركىتتى قويان مەن تۇلكىگە سالۋ. سونىمەن قاتار، قارشىعا مەن يتەلگىنى قولعا شاقىرۋ مەن كەپتەرگە سالۋ جانە دالبايعا ويناتۋدان باق سىناۋدا.

«الەمدە بويىنشا بۇركىت سالۋ سپورت ءتۇرى رەتىندە 3-4 ەلدە عانا تىركەلگەن، سونىڭ ءبىرى ءبىزدىڭ ەل. قۇسپەگىلىكتى سپورت تۇرىندە دامىتۋدىڭ باستى ماقساتى اتادان قالعان بۇركىت سالۋ ءداستۇرىن جوعالتپاي ساقتاۋ. بۇگىنگى جارىسقا كەلسەك، بۇندا ەلىمىزدىڭ ءار وڭىرىنەن ەڭ ۇزدىكتەرى قاتىسۋدا. ەكى كۇن بويى بولاتىن باسەكەنىڭ ناتيجەسىندە جەڭىمپاز اتانعان بۇركىتشىلەر ەلىمىزدىڭ اتىنان باسقا دا حالىقارالىق باسەكەگە قاتىساتىن بولادى»، - دەدى ق ر ۇلتتىق سپورت تۇرلەرى قاۋىمداستىعىنىڭ اتقارۋشى ديرەكتورى راحات جاقسىباي.

ر. جاقسىباي جىل سوڭىنا دەيىن تارازدا جاستار اراسىندا بۇركىتشىلەر بايقاۋى مەن الماتىدا 2-ازيا چەمپيوناتىنىڭ وتەتىنىن دە ايتىپ ءوتتى.

ەسكە سالساق، وتكەن جىلى اتالعان تۋرنيردە جامبىل وبلىسىنان كەلگەن جاس بۇركىتشى سەرىكبولسىن جالعاس ۇلى جەڭىمپاز اتانعان بولاتىن.

اۆتور: داۋلەت ىزتىلەۋ