قىزدار دا ات باپتاي الادى - ايگەرىم عۇماروۆا
- ايگەرىم، ات باپتاۋ ونەرى تۋرالى نە ايتار ەدىڭ، ونى كىمنەن ۇيرەندىڭ، الدىمەن وسىعان توقتالساڭ؟
- مەن سىرىم اۋدانى ارالتوبە اۋىلىندا تۋىپ-ءوستىم. وسى اۋىلدا بايگە اتتارىن ۇستايتىن، مەن ءوزىم اتا دەيتىن ءمۇتالى تورەعاليەۆتى اق جايىق ءوڭىرى جاقسى بىلەدى. قازاقى سايگۇلىكتى دايىنداۋدى جاقسى مەڭگەرگەن سول كىسىنىڭ اتتارىنا ءمىنىپ، بايگەگە العاش قوسىلعان بولاتىنمىن. اتا-بابامىزدان قالعان وسىناۋ ونەردى دە ۇيرەتكەن سول كىسى. بالا كەزىمنەن اتقا شاۋىپ، شاباندوز اتانسام، قازىر اتبەگىلىك قىرىممەن دە كورىنىپ كەلەمىن.
- جىلقىنى ادەتتە ەر ادامداردىڭ ۇستاپ، باعاتىنى بەلگىلى. قىز بالاعا قيىن ەمەس پە، قالاي ويلايسىڭ؟
- بابىن تابا بىلسە، قيىن ەمەس دەپ ەسەپتەيمىن. ەكى جىلدان بەرى اسىل تۇقىمدى جىلقىلاردى بايگەگە دايىنداۋدى ۇيرەندىم. قازاقى جىلقىعا قاراعاندا، تازا قاندى جىلقى كوپ كۇتىمدى قاجەت ەتەدى. قازاقستاندىق بەلگىلى اتبەگى اعالارمەن بايلانىسقا شىعىپ، سولاردان ءبىراز نارسەگە كوز جەتكىزدىم. تازا قاندى جىلقى نازىكتەۋ كەلەدى. اسىرەسە، اياقتارى وسالداۋ. ەل-جۇرتتى قيقۋلاتقان جارىستا اياقتارى سىنىپ، جاراقات الىپ جاتادى. سونى قالاي ەمدەۋ كەرەكتىگىن دە ۇيرەندىم.
ات باپتاۋ ونەرى ادامنان اۋەلى شىدامدىلىقتى تالاپ ەتەدى. بايگەگە قوسىلار تۇلپاردى ءبىر جىل بويى دايىنداۋ قاجەت. مىسالى، قىس مەزگىلىندە جىلىك مايى تولعانشا جاقسىلاپ سەمىرتۋ كەرەك. اتتىڭ جاقسى شابۋى وسى قىستاعى ازىرلىگىنە بايلانىستى. جىلدىڭ ءتورت مەزگىلىندە ات دۇرىس باپتالسا، جاقسى ناتيجەگە قول جەتكىزۋگە بولادى.
ات باپتاۋدىڭ ادامعا بەرەرى كوپ. ول ادامدى تازالىققا، ەڭبەكقورلىققا، جان-جاقتى بولۋعا، ىزدەنىسكە جەتەلەيدى.
بۇل ونەر قىز بالاعا قيىندىق كەلتىرمەگەنىمەن، بار ىنتا-كۇشىمىزدى اتقا ارنايتىندىقتان، ءۇي شارۋاسىنا كەلگەندە، ۋاقىت تاپشى بولىپ جاتادى. اكەم عابدىلماقات (قازىر جۇمىسسىز، دەگەنمەن اعاسى ەكەۋىنىڭ شاعىن قوجالىقتارى بار) پەن انام، باستاۋىش سىنىپ مۇعالىمى اقبىلەك زينەشوۆا - قاراپايىم اۋىل ادامدارى، ماعان ۇنەمى تىلەكشى بولىپ وتىرادى.
- ايگەرىم، جۋىردا سىرىم اۋدانى بۇلدىرتى اۋىلىندا كۇنباتىس الاشورداسىنىڭ 100 جىلدىعىنا ارنالعان ايتۋلى دودادا سايگۇلىگىڭ ءبىرىنشى كەلدى، دەمەك، ناتيجە دە بار دەگەن ءسوز؟
- ءيا، مۇنىڭ سىرى مىنادا. ءمۇتالى اتا جازدا اقتوبە قالاسىنان ءوزى تاڭداپ، ماعان دايىنداۋعا ات اكەلىپ بەردى. ەسىمىن حانتورە قويدىم. قازاقى بيە مەن اعىلشىن تۇقىمداس ايعىردان تۋعان جارتىلاي تازا قاندى جىلقى ەكەن. ءتورت جاستا، بۇرىن بايگەگە قوسىلماعان.
جاز بويى باپتاپ، تامىز ايىندا قاراتوبە اۋدانىنىڭ 90 جىلدىعىنا ارنالعان تويدا 27 شاقىرىمدىق الامان بايگەگە قوستىم. ورىنعا ىلىكپەسە دە، جاقسى شاۋىپ كەلدى.
سودان كەيىن اقجايىق اۋدانى جامبىل اۋىلىندا كەڭەس وداعىنىڭ باتىرى ميحايل ابدولوۆتىڭ 100 جىلدىعىنا ارنالعان توپ بايگەدە (16 شاقىرىم) 32 اتتىڭ ىشىنەن جەكەدارا كەلدى.
بۇلدىرتىدا تازا قاندى اتتار الامانىنان تاعى دا مارەگە ءبىرىنشى بولىپ جەتتى.
بۇيىرسا، تاعى ءبىر بايگەگە قوسۋدى جوسپارلاپ وتىرمىز.
- ۇلتتىق سپورت تۇرلەرىن دامىتۋ باعىتىندا نە ىستەۋ كەرەك دەپ ويلايسىڭ؟
- ارينە، ۇلتتىق سپورت تۇرلەرىن دامىتۋ كەرەك- اق. ول ءۇشىن وسى باعىتتا وقىتاتىن مەكتەپتەر اشىپ، جارىستاردى ءجيى ۇيىمداستىرۋ قاجەت. ەلىمىزدە فۋتبولعا قانداي جاعداي جاسالىپ جاتىرعانىن كوپشىلىك بىلەدى. مىنە، ۇلتتىق سپورت تۇرلەرىن دە قالتارىستا قالدىرماي، بەتبۇرىس بولسا دەيمىز.
- سوڭعى ساۋال. الداعى جىلدى ەلباسى جاستار جىلى دەپ جاريالاعانى بەلگىلى، وسىعان وراي نە ايتار ەدىڭ؟
- قازاقستاندا جاستاردىڭ جان-جاقتى ءبىلىم الىپ، جانى قالاعان ماماندىعىن مەڭگەرىپ، سۇيىكتى ىسىمەن اينالىسۋىنا تولىق جاعداي جاسالعان. وسى مۇمكىندىكتى پايدالانىپ، ەلىمىزدىڭ ودان ءارى ءوسىپ-وركەندەۋىنە ءوز ۇلەسىمىزدى قوسۋىمىز كەرەك دەپ ويلايمىن. الداعى جىل بارشا حالىق، سونىڭ ىشىندە ءبىز سياقتى جاستار ءۇشىن جەمىستى دە جەڭىستى بولسىن دەگەن تىلەك ايتار ەدىم.
- راحمەت.
اۆتور: ەلجان ەرالى