جامبىل وبلىسىنىڭ كيەلى جەرلەرى تۋرالى سايت اشىلادى

تاراز. قازاقپارات - جامبىل وبلىسىندا تاريحي-مادەني ەسكەرتكىشتەر مەن كيەلى ورىندار تۋرالى سايت اشىلىپ، ۆيرۋتالدى ونلاين-كارتا جاسالادى، دەپ حابارلايدى قازاقپارات تاراز قالاسى اكىمىنىڭ رەسمي سايتىنا سىلتەمە جاساپ.

وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىبايەۆ وڭىرلىك كوممۋنيكاتسيالار قىزمەتىندە ءمالىم ەتكەندەي، «رۋحاني جاڭعىرۋ» باعدارلاماسى اياسىندا قازاقستاننىڭ كيەلى جەرلەرى كارتاسىنىڭ تىزىمىنە وبلىستان 8 تاريحي-مادەني ەسكەرتكىش، ال جەرگىلىكتى ماندەگى وڭىرلىك قاسيەتتى ورىندار كارتاسىنا 27 نىسان ەنگەن.

بۇگىنگى كۇنى جامبىل وبلىسىندا 3 مىڭنان استام تاريحي-مادەني ەسكەرتكىش تىركەۋگە الىنعان. ولاردىڭ 5 ەۋى - حالىقارالىق، 25  رەسپۋبليكالىق، 711  جەرگىلىكتى دارەجەدە، قالعانى الدىن-الا تىزىمگە الىنىپ وتىر. يۋنەسكونىڭ «بۇكىلالەمدىك مادەني مۇرا» تىزبەسىنە جامبىل وبلىسى اۋماعىنداعى ۇلى جىبەك جولى بويىندا ورنالاسقان اقتوبە (بالاساعۇن)، ورنەك، قۇلان، قوستوبە قالاشىقتارى مەن اقىرتاس ساراي كەشەنى ەنگىزىلگەن.

الداعى ۋاقىتتا «قازاقستاننىڭ كيەلى جەرلەرىنىڭ گەوگرافياسىنا» ىرىكتەلگەن نىسانداردىڭ فوتوسۋرەتتەرى، سىزبالارى، اەروفوتولارى، ارحيۆتىك قۇجاتتارى جانە اڭىز اڭگىمەلەرى جيناقتالىپ، «اۋليەاتانىڭ كيەلى جەرلەرى» اتتى ارنايى سايت اشىلادى. سونداي-اق ۆيرتۋالدى ونلاين-كارتا جاسالادى.

جوبانى جۇزەگە اسىرۋ ءۇشىن جامبىل وبلىسىنىڭ اۋماعىندا ورنالاسقان ەسكەرتكىشتەردى سارالاۋعا ەلىمىزدىڭ جەتەكشى عىلىمي-زەرتتەۋ ينستيتۋتتارىنىڭ، ۇلتتىق ۋنيۆەرسيتەتتەرى مەن جەرگىلىكتى جوو- لاردىڭ تاريحشى، ەتنوگراف، ولكەتانۋشى عالىمدارىنان ساراپشىلار كەڭەسى مەن جۇمىسشى توبى قۇرىلعان.

سونداي-اق ەكسپەديتسيا بارىسىندا عالىمداردان قۇرىلعان توپ كيەلى دەپ تانىلعان ەسكەرتكىشتەرگە قاجەتتىلىگىنە قاراي ارحەولوگيالىق عىلىمي-زەرتتەۋ جۇمىستارىن جۇرگىزەتىن بولادى. باسقارما باسشىسىنىڭ ايتۋىنشا، اشىلۋى جوسپارلانعان سايتتىڭ نەگىزگى ماقساتى - سيفرلىق اقپاراتتىق تەحنولوگيالاردى پايدالانا وتىرىپ، كيەلى جەرلەر جايلى اقپاراتقا عالامتور جەلىسى ارقىلى قولجەتىمدىلىكتى قامتاماسىز ەتۋ.

سايت ءۇش تىلدە اقپارات تاراتادى دەپ كۇتىلۋدە. «وسىنداي ناتيجەلى جۇمىستار ارقىلى قازاقستانداعى قاسيەتتى ورىنداردىڭ دارەجەسى زاڭدى تۇردە بەكىتىلەتىن بولادى. وبلىستا كيەلى بولىپ تانىلعان تاريحي-مادەني نىساندار تۋرالى كەڭىنەن اقپارات بەرىپ، قۇندىلىقتارىمىزدى بايىتۋداعى باستى ماقساتىمىز - تاريحى تەرەڭ ورىنداردى ساقتاپ قالۋ، ونى ۇرپاقتان-ۇرپاققا جەتكىزۋ، ءتۋريزمدى دامىتۋ ارقىلى بارلىق ەلدەرگە پاش ەتۋ»، - دەپ تۇيىندەدى دۇيسەنالى بىقىبايەۆ.