اتىراۋدا «جايىق جاعاسىندا - كاسپي كۋبوگى» حالىقارالىق تۋرنيرى ءوتتى
ماحامبەت اۋدانى المالى اۋىلىندا «جايىق جاعاسىندا - كاسپي كۋبوگى» حالىقارالىق ءتۋرنيرى ءوتتى. جوعارى دەڭگەيدەگى سپورتتىق شارالارعا 7 مەملەكەتتەن 300 گە جۋىق سپورتشى قاتىستى. ون سپورت تۇرىنەن جارىستار ۇيىمداستىرىلدى. سپورتتىق شارا اتىراۋ وبلىسى اكىمىنىڭ باستاماسىمەن جۇزەگە استى.
ۇيىمداستىرۋشىلار - وبلىستىق دەنە شىنىقتىرۋ جانە سپورت باسقارماسى، سونىمەن قاتار، ۇلتتىق سپورت تۇرلەرى فەدەراتسياسى. تۋرنيرگە قۇرمەتتى قوناقتار - ق ر ۇلتتىق سپورت تۇرلەرى اسسوتسياتسياسىنىڭ قۇرمەتتى پرەزيدەنتى قايرات ساتىبالدى ۇلى، سونداي-اق، ق ر پارلامەنت ءماجىلىسىنىڭ دەپۋتاتى، قازاقستاندىق ۇلتتىق سپورت فەدەراتسياسىنىڭ پرەزيدەنتى بەكبولات تىلەۋحان كەلدى.
«قازاقستاننىڭ باتىسىندا ۇلتتىق سپورت تۇرلەرىنىڭ قارقىندى دامىپ جاتقانى قۋانتادى. سپورتتىق كلۋبتار، ۇيىرمەلەر، سەكتسيالار اشىلىپ جاتىر. بۇل قاتتى قۋانتادى. بۇگىندە ەتنيكالىق قازاقتار تۇراتىن ءبىرقاتار مەملەكەتتەردە كوكپاردان، بايگەدەن، ساداق اتۋدان جارىستار وتۋدە.
مىسالى، قىتايدا اۋدارىسپاقتان تۋرنير ءوتتى، بۇل - ۇلتتىق سپورت تۇرلەرىنىڭ ولمەگەنىنىڭ دالەلى. قاي جەردە تۇرعانىنا قاراماستان، ۇلتتىق سپورتقا دەگەن ماحاببات ءار قازاقتىڭ قانىندا بار. مەن اتىراۋدا ءوڭىر باسشىسىنىڭ ۇلتتىق سپورت تۇرلەرىنىڭ دامۋىنا ايرىقشا كوڭىل بولەتىنىنە قۋانىشتىمىن»، - دەدى بەكبولات تىلەۋحان.
تۋرنير اياسىندا ۇلتتىق سپورت جانە سپورت تۇرلەرىنەن: كوكپار، اۋدارىسپاق، قىز قۋۋ، تەڭگە ءىلۋ، جامبى اتۋ، الامان بايگە، توپ بايگە جانە ۇشقىر بايگە، جورعا جارىس، تازى جارىسى ءوتتى. تۋرنيردىڭ جالپى جۇلدە قورى 43 ميلليون تەڭگەنى قۇرادى.
«بۇگىندە اسسوتسياتسيا الدىندا ەكى مىندەت تۇر - قازاقستاننان تىس جەرلەردە ۇلتتىق سپورت تۇرلەرىنىڭ تانىمالدىعىن ارتتىرۋ، سونداي-اق، ۇلتتىق ءداستۇردى قازاقستاننىڭ بارلىق وڭىرىندە، ءتىپتى شاعىن ەلدى مەكەنىندە ناسيحاتتاۋ.
7 مەملەكەتتەن سپورتشىلار جيناپ، استانانىڭ 20 جىلدىعىنا وراي ۇيىمداستىرىلىپ وتىرعان سايىس اتىراۋ وبلىسىندا وتكەنىنە قۋانامىن. وبلىس باسشىلىعى تاراپىنان ۇلتتىق سپورت تۇرلەرىن دامىتىپ جانە ولاردى الەمدىك ارەنادا ناسيحاتتاۋدا ۇلكەن قولداۋ كورسەتىلۋدە»، - دەيدى ق ر ۇلتتىق سپورت تۇرلەرى اسسوتسياتسياسىنىڭ قۇرمەتتى پرەزيدەنتى قايرات ساتىبالدى ۇلى.
شارا اياسىندا ۇيىمداستىرۋشىلار 30 كيىز ءۇي تىكتى. ءارقايسىسىنىڭ الدىندا ۇلتتىق تاعامدار دايىندالىپ، تۋرنير كورەرمەندەرىنە تەگىن تاراتىلدى. ۇيىمداستىرۋشىلاردىڭ ايتۋىنشا، باستى ماقسات - اتىراۋ وبلىسىندا ۇلتتىق سپورت تۇرلەرىن دامىتىپ، ءوڭىر تۇرعىندارى اراسىندا سالاۋاتتى ءومىر سالتىن ناسيحاتتاۋ.
«بۇگىنگى شارا قازاقستاندىقتارعا ءوز تاريحىن، ءتۇپ-تامىرىن، مادەنيەتى مەن ءداستۇرىن ەسكە تۇسىرەدى. ۇلتتىق سپورتتىق ويىندار - بۇل ءبىزدىڭ حالقىمىزدىڭ داستۇرلەرىنەن ويىپ ورىن الاتىن ءبىر ەرەكشەلىك. ءبىزدىڭ مىندەتىمىز - وسىنىڭ ءبارىن ساقتاپ، ۇرپاققا جەتكىزۋ. ەگەر ولار ءوز تاريحىن، ونىڭ تامىرلارىن ەسكە تۇسىرسە، ۇلت باسەكەگە قابىلەتتى بولادى. بۇگىندە قازاقستاندى بۇكىل الەم قاۋىمداستىعى مويىندايدى، ءبىزدىڭ پرەزيدەنتىمىزدىڭ سارابدال ساياساتىن مويىندايدى، دەمەك، ءبىز دۇرىس باعىتتا كەلە جاتىرمىز»، - دەدى اتىراۋ وبلىسىنىڭ اكىمى نۇرلان نوعايەۆ.
ايتا كەتەيىك، «كوكپار» ويىنىندا جەڭىمپاز اتانعان ۇزدىك كوكپارشىعا «التىن قامشى» سىيلىعى بەرىلدى. 31 شاقىرىم قاشىقتىقتا سىنعا ءتۇسىپ، الامان بايگەدە العاش كەلگەن قاتىسۋشىعا ەڭ ۇلكەن اقشالاي جۇلدە - 5 ميلليون تەڭگە بۇيىردى.