اقتوبەدە كوشى-قون قىزمەتتەرىن كورسەتەتىن ورتالىق اشىلدى

None
None
اقتوبە. قازاقپارات - ەلباسىمىزدىڭ جولداۋىن ورىنداۋ جانە «اقتوبە - ادالدىق الاڭى» جوباسىن جۇزەگە اسىرۋ ماقساتىندا اقتوبە قالاسىندا كوشى-قون قىزمەتتەرىن كورسەتەتىن ورتالىق اشىلدى، دەپ حابارلايدى قازاقپارات.

ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى اقتوبە وبلىسى بويىنشا دەپارتامەنتىنىڭ مالىمەتىنشە، ەندى ەڭبەك ميگرانتتارىنا قاجەتتى مەملەكەتتىك قىزمەت تۇرلەرىن «ءبىر تەرەزە» قاعيداتى بويىنشا ءبىر جەردەن الۋعا مۇمكىندىك تۋىپ وتىر.

كوشى-قون ورتالىعى اقتوبە قالاسى، ساڭكىباي باتىر داڭعىلى، 249 مەكەنجايىندا ورنالاسقان. مەكەمە 13 جۇمىس ورنىمەن جابدىقتالعان.

«ورتالىقتىڭ باستى مىندەتى - كوشى-قون سالاسىنداعى قىزمەتتەردى الۋدى بارىنشا جەڭىلدەتۋ. بۇرىن ميگرانتتارعا ەڭبەك ەتۋ رۇقسات قۇجاتتارىن بەرۋ مەن ونى ۇزارتۋعا 3-5 كۇندەي ۋاقىت كەتەتىن ەدى، ەندى بۇل پروتسەسس كوشى-قون ورتالىعى ارقىلى 2 ساعات ىشىندە جۇزەگە اسىرىلۋدا. تاعى ءبىر تيىمدىلىگىن اتاپ وتەر بولساق، بۇرىن اتالمىش قىزمەت ءتۇرىن الۋ ءۇشىن ەڭبەك ميگرانتتارى مەديتسينالىق تەكسەرۋدەن، داكتيلوسكوپيادان ءوتۋ، ساقتاندىرۋ پوليستەرىن راسىمدەۋ مەن جەكە سايكەستەندىرۋ نومىرلەرىن الۋ ءۇشىن ءارتۇلى مەكەمەلەرگە جۇگىنەتىن. قازىر بۇل قىزمەتتەردى ءبىر عانا كوشى-قون ورتالىعىنان الۋعا جاعداي جاسالعان» دەلىنگەن حابارلامادا.

جالپى اقتوبە وبلىسىندا اعىمداعى جىلدىڭ 9 ايىندا جەرگىلىكتى اتقارۋشى ورگاندار 4510627 مەملەكەتتىك قىزمەت كورسەتكەن. ونىڭ ىشىندە %82 ەلەكتروندى تۇردە كورسەتىلگەن.

وسىلايشا، ەلباسىمىزدىڭ مەملەكەتتىك قىزمەتتەردى 2019-جىلعا دەيىن %80 ەلەكتروندىق فورماتقا كوشىرۋ بويىنشا تاپسىرماسى اقتوبە وبلىسىندا ورىندالدى. مەملەكەتتىك قىزمەتتەردى ەلەكتروندى تۇردە كورسەتۋ تۇرمىستىق سىبايلاس جەمقورلىقتى جويۋعا مۇمكىندىك بەرەدى.

سوڭعى جاڭالىقتار