باتىرحان شۇكەنوۆتىڭ نوتاعا تۇسىرىلگەن اندەرىنىڭ قازاق تىلىندەگى جيناعى تانىستىرىلدى

None
None
الماتى. قازاقپارات - الماتىدا باتىرحان شۇكەنوۆ اتىنداعى قور بولات وتەمۇراتوۆتىڭ قورىنىڭ قارجىلاي قولداۋىمەن تانىمال ءانشىنىڭ نوتاعا تۇسىرىلگەن اندەرىنىڭ قازاق تىلىندەگى جيناعىنىڭ تانىستىرىلىمىن وتكىزدى، دەپ حابارلايدى قازاقپارات.

جيناقتا ءارتىستىڭ ءان جيناقتارىنداعى بارلىق تۋىندىلار جيناستىرىلعان. مۇنداعى ماقسات قازاق ءتىلى مەن وتاندىق انشىلەردى قالىڭ كوپشىلىككە ناسيحاتتاۋ.

باسىلىمنىڭ ەرەكشەلىگى ول گيتارادا ءان ايتۋشىلارعا دا ارنالعان. ويتكەنى وندا اككوردتار بار.

«ءبىز باسىلىمدى ورىنداۋشىلارعا بارىنشا قولجەتىمدى ەتۋگە تىرىستىق. «ساعىم دۇنيە» اتتى جيناق باتىردىڭ شىعارماشىلىق باعىتىن ايقىن كورسەتەدى. باسىلىم بۋىرقانىپ جاتقان دۇنيەنىڭ ۇنەمى قوزعالىستا ەكەنىن جانە ونىڭ بىرتە-بىرتە ماڭگىلىككە اتتانىپ كەتە باراتىن ساعىم دۇنيە ەكەندىگىن پاش ەتەدى. بۇل تارتىسقا تولى دۇنيەدە ورىندالماي قالىپ جاتاتىن تىلەكتەردىڭ مۇڭى ىسپەتتەس»، - دەيدى باتىرحان شۇكەنوۆ قورىنىڭ قامقورشىلىق كەڭەسىنىڭ ءتوراعاسى، ءانشىنىڭ اعاسى باۋىرجان شۇكەنوۆ.

نوتاعا تۇسىرىلگەن باسىلىمعا 14 تۋىندى ەنگەن. ونىڭ ىشىندە ايگىلى «وتان انا» دا بار. نوتالىق جيناققا ەنگەن تۋىندىلاردىڭ كوپشىلىگىنىڭ اۆتورلارى كەزىندە باتىرحان شۇكەنوۆپەن بىرگە تىعىز قارىم-قاتىناستا جۇمىس ىستەگەن كومپوزيتور قۋات شىلدەبايەۆ، تولەگەن مۇحامەدجانوۆ، نادجيب ۆيلدانوۆ، رينات گايسين سياقتى ازاماتتار.

وسىعان دەيىن  قىزىلوردا قالاسىندا باتىرحان شۇكەنوۆكە ەسكەرتكىش ورناتىلعاندىعىن حابارلاعان بولاتىنبىز. سونداي-اق باتىرحان شۇكەنوۆتىڭ ەش جەردە ورىندالماعان 13 ءانى تابىلعاندىعى جازىلدى.

سوڭعى جاڭالىقتار