قازاقستانعا شەتەلدىكتەردىڭ ساپارىن راسىمدەۋ ءتارتىبى جەڭىلدەيدى

None
None
استانا. قازاقپارات - قازاقستانعا شەتەلدىك تۋريستەر شاقىرتۋسىز كەلۋى مۇمكىن. بۇل تۋرالى بۇگىن «اتامەكەن» ۇكپ الاڭىندا قازاقستاندا ءتۋريزمدى دامىتۋدىڭ مەملەكەتتىك باعدارلاماسىنىڭ جوباسىن تانىستىرۋ كەزىندە ق ر مادەنيەت جانە سپورت ۆيتسە- ءمينيسترىنىڭ كەڭەسشىسى ەركەبۇلان حاسەنوۆ ءمالىم ەتتى، دەپ حابارلايدى قازاقپارات.

«ۇسىنىلعان كەلەسى شارا - ول ۆيزالىق رەجىمگە قاتىستى. بۇل رەتتە ەلەكتروندىق ۆيزانى الۋ اياسىندا شەتەلدىك تۋريستەر ءۇشىن شاقىرتۋ تارتىبىنەن باس تارتۋ ۇسىنىلادى. وسىعان دەيىن حابارلانعانداي، جىل سوڭىنا قاراي قازاقستاندا E-visa قاناتقاقتى جوباسى ىسكە قوسىلادى. وعان سايكەس، 128 ەلدىڭ ازاماتى ەلىمىزگە كەلۋگە رۇقساتتى ەلەكتروندىق تاسىلمەن الادى. ارينە، بۇل قادام وڭتايلى بولادى. الايدا شەتەلدىكتەر ءۇشىن شاقىرتۋ تارتىبىنەن باس تارتپاساق، اتالعان قاناتقاقتى جوبا تەك ۆيزانى الۋ پروتسەسىن اۆتوماتتاندىرۋ ماقساتىن عانا ورىندايدى. سوندىقتان ءبىز شاقىرتۋ رەجىمىن جويۋدى تالاپ ەتۋدەمىز. قۇقىق قورعاۋ ورگاندارى بۇل ۇسىنىسقا قارسىلىق تانىتۋدا. ەگەر دە «ە-hotel» اقپاراتتىق جۇيەسىن جاپپاي ەنگىزسەك، وندا قۇقىق قورعاۋ ورگاندارى شاقىرتۋ تارتىبىنەن باس تارتۋعا كەلىسىپ وتىر» ، - دەپ توقتالدى ە. حاسەنوۆ.

ونىڭ ايتۋىنشا، ۇكىمەت باسشىسىنىڭ ورىنباسارى اسقار جۇماعاليەۆ اتالعان ۇسىنىسقا قولداۋ بىلدىرگەن. وسى ورايدا ق ر اقپارات جانە كوممۋنيكاتسيالار مينيسترلىگىنە مادەنيەت جانە سپورت مينيسترلىگىمەن بىرلەسە «ە-hotel» جۇيەسىن ازىرلەۋدى پىسىقتاۋ تاپسىرماسى بەرىلدى. سونىمەن بىرگە، ينۆەستيتسيالار جانە دامۋ مينيسترلىگىنە شەتەل ازاماتتارى بويىنشا اۋە تاسىمالداۋشىلاردان مالىمەتتەر ۇسىنۋعا قاتىستى تاپسىرما بەرىلگەن. وسى مالىمەتتەر ۇلتتىق قاۋىپسىزدىكتى قامتاماسىز ەتۋ ءۇشىن قۇقىق قورعاۋ ورگاندارىنا قاجەت.

«ە-hotel ەنگىزىلسە، وندا ۇ ق ك مەن ىشكى ىستەر مينيسترلىگىندەگى ارىپتەستەر شەتەلدىكتەردىڭ تەك شاقىرتۋمەن كەلۋى تارتىبىنەن باس تارتۋعا ءازىر. بۇگىندە قازاقستانعا كەلۋ ءۇشىن كەز كەلگەن شەتەلدىك شاقىرتۋ الۋعا ءبىر ادامدى نەمەسە تۋروپەراتوردى تابۋى كەرەك. سايكەسىنشە، بۇل راسىمدەر بەلگىلى ءبىر ۋاقىتتى تالاپ ەتەدى. سونىڭ سالدارىنان تۋريستەر بۇل راسىمدەردەن قاشىپ، قازاقستانعا ساپارلاۋعا نيەتتى بولمايدى» ، - دەدى ە. حاسەنوۆ.

بۇدان بۇرىن حابارلانعانداي، قازاقستاننىڭ تۋريستىك جەرلەرىن جارنامالاۋعا قاجەتتى قارجى شەتەلدىك تۋريستەرگە سالىناتىن الىمنىڭ ەسەبىنەن وندىرىلەدى.

سوڭعى جاڭالىقتار