استاناداعى جولاۋشىلار جول اقىسىن قولداعى بىلەزىكپەن تولەيتىن بولادى

None
None
 استانا. قازاقپارات - Astana LRT كومپانياسى جول اقىسىن تولەۋ ءۇشىن كولىك كارتالارىن بىلەزىك تۇرىندە شىعارۋدى كوزدەپ وتىر، دەپ حابارلايدى قازاقپارات ءتىلشىسى.

بۇل تۋرالى كومپانيادا وتكەن باسپا ءسوز ءماسليحاتىندا Astana LRT ج ش س تولەم جۇيەسى دەپارتامەنتى ديرەكتورى داۋرەن نۇراليەۆ ايتىپ بەردى.

«قازىرگى ۋاقىتتا وزدەرىڭىز بىلەتىندەي، ادامدار قوعامدىق كولىكتە تولەم جۇرگىزۋ ءۇشىن كولىكتىك كارتانى كوپتەپ پايدالانادى. ءبىراق، ءبىزدىڭ جولاۋشىلار ءارتۇرلى. اسىرەسە، جاستار، بالالار مەن ستۋدەنتتەر قولىنا بىلەزىك تاققىسى كەلەدى. قاراپايىم ءۇيدىڭ كىلتتەرىنە نەشە ءتۇرلى سالپىنشاقتاردى (برەلوك) ءىلىپ قويۋعا اسىرەسە جاستار قۇمار. ءبىز الداعى ۋاقىتتا كولىكتىك كارتانىڭ ءبىر ءتۇرىن - ءدال وسى بىلەزىك سەكىلدى ەتىپ شىعارۋدى كوزدەپ وتىرمىز. ول دا - كارتا. ءتۇرى بىلەزىككە ۇقساس دەمەسەڭىز، قاراپايىم ءتورت بۇرىش كارتادان ەشقانداي ايىرماشىلىعى جوق. ول بىلەزىكتىڭ ىشىندە دە چيپ بولادى» ، - دەدى داۋرەن نۇراليەۆ.

ونىڭ ايتۋىنشا، بىلەزىككە ۇقساس كولىكتىك كارتالار وسى جىلدىڭ اياعىنا دەيىن پيلوتتى جوبا رەتىندە شىعارىلادى. ەگەر ول حالىققا ۇناپ جاتسا، كومپانيا بىلەزىك كارتالاردى كوپتەپ شىعارۋدى كوزدەپ وتىر.

 ەسكە سالا كەتسەك، Astana LRT كومپانياسىندا وتكەن دوڭگەلەك ۇستەلدە Astana LRT باسقارما ءتوراعاسى بەكمىرزا يگەنبەردينوۆ كولىك كارتاسىن تولتىرۋدىڭ جاڭا ءادىسىن تانىستىرعان بولاتىن.

سونىمەن قاتار، جيىن بارىسىندا كومپانيانىڭ تولەم جۇيەسى دەپارتامەنتىنىڭ ديرەكتورى داۋرەن نۇراليەۆ ەكى رەت تولەم الىنبايتىنىن ءوز كارتاسىمەن دالەلدەدى.

سوڭعى جاڭالىقتار