جاس وسپىرىمدەر وليمپياداسىندا قازاقستاندىق سپورتشىلار ءوز رەكوردىن جاسادى

None
None
استانا. قازاقپارات - قازاقستاندىق جاس سپورتشىلار بۋەنوس-ايرەستە جاس وسپىرىمدەر وليمپياداسى تاريحىندا ءوز رەكورتتارىن جاڭارتتى، دەپ حابارلايدى قازاقپارات.

بيىل ءۇشىنشى مارتە وتكەن ءتورتجىلدىق دودادا وتانداستارىمىز 4 التىن، 3 كۇمىس، 3 قولا (10) مەدالمەن جالپى كوماندالىق ەسەپتە 15-ورىنعا يە بولدى. بۇل جاس وسپىرىمدەرىمىزدىڭ وليمپيادا ويىندارىنداعى ازىرگە ەڭ جوعارعى جەتىستىگى.

ايتالىق، ەڭ العاشقى جاس وسپىرىمدەر وليمپياداسى 2010-جىلى سينگاپۋردە ءوتتى. اتالعان الەمدىك دوداعا سپورتتىڭ 17 تۇرىنەن 47 قازاقستاندىق سپورتشى قاتىسقان بولاتىن. وندا سپورتشىلارىمىز قازاقستان قورجىنىنا 2 التىن، 2 كۇمىس جانە 2 قولا مەدال سالىپ، جالپى ەسەپتە 18-ورىننان كورىنگەن ەدى.

ال اراعا ءتورت جىل سالىپ، ياعني 2014-جىلى ەكىنشى جاس وسپىرىمدەر وليمپياداسى قىتايدىڭ نانكين قالاسىندا ءوتتى. وعان الەمنىڭ 201 مەملەكەتىنەن ەڭ تاڭداۋلى سپورتشىلار باق سىنادى. نانكيندەگى Ⅱ جاس وسپىرىمدەر وليمپياداسىنا قازاقستاننان 51 سپورتشى 17 سپورت تۇرىنەن سايىسقا ءتۇستى. ناتيجەسىندە ەل قورجىنى 3 التىن، 1 كۇمىس جانە 4 قولا مەدالمەن تولىعىپ، جالپى ەسەپتە 21-ورىنعا تابان تىرەدى.

مىنە، بيىل 4 التىن، 3 كۇمىس، 3 قولا (10) مەدالمەن العاش رەت العاشقى 15 ەلدىڭ قاتارىنا كىردى.

بيىلعى وليمپيادادا العاشقى التىن مەدالدى دزيۋدوشى بەكارىس ءسادۋاقاس سالدى. ول ەرلەر اراسىندا 100 كەلىگە دەيىنگى سالماق دارەجەسىندە قارسىلاس شاق كەلتىرمەي، وليمپيادا چەمپيونى اتاندى. ەكىنشى التىندى كانوە ەسۋدەن دياس باحريددين جەڭىپ السا، ءۇشىنشى التىنعا ۆەلوسپورتتان قازاقستان ەرلەر كومانداسى قول جەتكىزدى. ال ءتورتىنشى باس جۇلدەنى بوكسشى ايبەك ورالباي جەڭىپ الدى.

ءۇش كۇمىستىڭ ءبىرىن دزيۋدودان ايەلدەر اراسىندا 78 كەلى سالماقتا سىنعا تۇسكەن مارگاريتا گريتسەنكو قانجىعاسىنا بايلاسا، ەكىنشى جانە ءۇشىنشى كۇمىس جۇلدەنى بوكسشىلار دامير تويباي مەن تالعات شايكەن قانجىعاسىنا بايلادى.

ال ءۇش قولا مەدالدىڭ العاشقىسىن بايداركا ەسۋدەن ستەللا سۋحانوۆا جەڭىپ الدى. ەكىنشى قولا مەدالعا بوكستان ايەلدەر اراسىندا سىنعا تۇسكەن نادەجدا ريابەتس يە بولسا، ءۇشىنشى سوڭعى قولا مەدال جارىستىڭ سوڭعى كۇنى كارەتاشى ءابىلمانسۇر باتىرعاليعا بۇيىردى.

بيىلعى بۋەنوس-ايرەستە وتكەن جاس وسپىرىمدەر وليمپياداسىندا رەسەي قۇراماسى توپ جاردى. ولاردىڭ ەنشىسىندە 29 التىن، 18 كۇمىس، 12 قولا (59) مەدال بار. ەكىنشى ورىنعا 18 التىن، 9 كۇمىس، 9 قولا (36) مەدال يەلەنگەن قىتاي سپورتشىلارى جايعاستى. ۇزدىك ۇشتىك 15 التىن، 12 كۇمىس، 12 قولا (39) مەدال ەنشىلەگەن جاپونيالىقتارعا بۇيىردى.

ايتا كەتەيىك، 3-جازعى جاس وسپىرىمدەر وليمپياداسى 6-18- قازان ارالىعىندا ءوتتى. وعان 206 مەملەكەتتەن 4 مىڭ سپورتشى قاتىستى. جارىستار باعدارلاماسىنا سپورتتىڭ ءداستۇرلى 28 تۇرىنەن بولەك، سپورتتىق بيلەر (برەيك-دانس)، كاراتە، تاۋعا ورمەلەۋ، روليكپەن سىرعاناۋ قوسىلدى.

بايراقتى دودادا ەل نامىسىن 58 سپورتشى قورعادى.

اۆتور: كۇنسۇلتان وتارباي

 

سوڭعى جاڭالىقتار