استانا ىرگەسىندەگى اۋىلداردا جاڭا مەكتەپتەر قاشان سالىنادى
ايتا كەتسەك، بۇعان دەيىن پارلامەنت ءماجىلىسىنىڭ دەپۋتاتتارى استانا ماڭىنداعى اۋىلداردىڭ ماسەلەسىن كوتەرگەن بولاتىن. «اق جول» فراكسياسى دەپۋتاتتارىنىڭ ايتۋىنشا، استانا تۇبىنە شوعىرلانعان اۋىلداردا حالىقتىڭ سانى كۇرت ارتقان. انىقتالعانداي، ولاردىڭ كەيبىرىندە 900 ورىندىق مەكتەپتە شامامەن 2700 وقۋشى ءبىلىم الىپ جاتىر. ول مەكتەپتەردە تەك 1-سىنىپتىڭ 16-سى بار.
بۇل ماسەلەگە قاتىستى جاۋاپ بەرگەن پرەمەر- مينيستر ۇكىمەت قاۋلىسىنا سايكەس استانا اگلومەراتسياسىنىڭ قۇرامىنا استانا قالاسىنان بولەك، اقمولا وبلىسى اقكول اۋدانىنىڭ 4 اۋىلدىق وكرۋگى، ارشالى اۋدانىنىڭ 13 اۋىلدىق وكرۋگى، سەلينوگراد اۋدانىنىڭ 18 اۋىلدىق وكرۋگى، شورتاندى اۋدانىنىڭ 11 اۋىلدىق وكرۋگى، سونداي- اق قوسشى، قوياندى، قاراوتكەل، تالاپكەر سياقتى اۋىلدار كىرەتىنىن اتاپ ءوتتى.
«2018 -جىلى تسەلينوگراد اۋدانىنىڭ ماكسيموۆكا (300 ورىندىق)، قاراجار (120 ورىندىق)، قوياندى (1200 ورىندىق)، قاجىمۇقان (300 ورىندىق) اۋىلدىق ەلدىمەكەندەرىندە مەكتەپ سالۋ بويىنشا 4 جوبانى ىسكە اسىرۋعا جانە اقمول اۋىلىندا مەكتەپ سالۋ بويىنشا (600 ورىندىق) جوبالاۋ- سمەتالىق قۇجاتتامانى ازىرلەۋگە جالپى سوماسى 1,1 ميلليارد تەڭگە ءبولىندى. ول قاراجاتتىڭ 850 ميلليون تەڭگەسى رەسپۋبليكالىق بيۋدجەتتەن، 283 ميلليون تەڭگەسى جەرگىلىكتى بيۋدجەتتەن قاراستىرىلعان»، - دەيدى باقىتجان ساعىنتايەۆ.
ۇكىمەت باسشىسىنىڭ ايتۋىنشا، 2019-2020 -جىلدارى قاجىمۇقان، قوياندى، قوسشى اۋىلدارىندا 3 مەكتەپ سالۋعا رەسپۋبليكالىق بيۋدجەتتەن 2,5 ميلليارد تەڭگە ءبولۋ جوسپارلانعان. جوعارىدا كورسەتىلگەن جوبالاردى ىسكە اسىرۋ ءۇش اۋىسىممەن وقۋ جانە وقۋشى ورىندارىنىڭ تاپشىلىعى ماسەلەسىن شەشۋگە مۇمكىندىك بەرەدى.
«ال تالاپكەر، تايتوبە، قاراوتكەل، جايناق اۋىلدارىنداعى ەلدىمەكەندەردە مەكتەپتەر بىلىم بەرۋ جەلىلەرىنىڭ مەملەكەتتىك نورماتيۆىنە سايكەس كەلەدى»، - دەدى باقىتجان ساعىنتايەۆ.
ايتا كەتەيىك، ەلباسى نۇرسۇلتان نازاربايەۆ بيىلعى قازان ايىندا جاريالاعان «قازاقستاندىقتاردىڭ ءال- اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا ەلىمىزدەگى ءۇشاۋىسىمدىق مەكتەپتەر ماسەلەسىنە نۇكتە قويۋدى تاپسىرعان بولاتىن.
اۆتور: ايان بەكەن ۇلى