قوجا احمەت ياساۋي كەسەنەسى جايلى كىتاپ جارىق كوردى
جاڭا كىتاپتىڭ تۇساۋكەسەرى «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ 40 جىلدىعىنا وراي ۇيىمداستىرىلعان عىلىمي-پراكتيكالىق كونفەرەنسياسى بارىسىندا ءوتتى.
اتالعان شارادا سونداي-اق، «جەتپىس حيكمەت» كىتابىنىڭ لاتىن الىپبيىندەگى نۇسقاسى تانىستىرىلدى. مادەنيەت جانە سپورت مينيسترلىگى «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ مەرەيتويىنا وراي مۋزەي قورىنداعى قۇندى جادىگەرلەر نەگىزىندەگى شىعارىلعان البوم-كاتالوگتار «تۇركىستان جازيراسىنىڭ قىش ىدىستارى» مەن «زەرگەرلىك بۇيىمدار توپتاماسى»، «ازىرەت سۇلتان» قورىق-مۋزەيىنىڭ 40 جىلدىق دامۋ تاريحىنداعى مۇراعاتتار قامتىلعان «40 جىلدىق البوم» اتتى كىتاپتاردىڭ جارىق كورۋىنە قولعابىس ەتتى.
ايتا كەتەيىك، «100 اڭىز» كىتابى دەرەكتىلىگىمەن، بۇرىن سوڭدى جاريالانباعان تىڭ مالىمەتتەرىمەن قۇندى سانالادى. جيناق عالىم-ماماندارعا، وقىتۋشىلارعا، جوعارى وقۋ ورنىنىڭ ستۋدەنتتەرى مەن جالپى كوپشىلىك قاۋىمعا ارنالادى. ال، «جەتپىس حيكمەت» كىتابىندا اۋليەلەردىڭ سۇلتانى قوجا احمەت ياساۋيدىڭ سوڭىندا قالعان تەلەگەي-تەڭىز مۇراسى قامتىلعان. سول رۋحاني قازىنادان الىنعان جەتپىس حيكمەت «ازىرەت سۇلتان» قورىق-مۋزەيىنە كەلۋشىلەر مەن جالپى وقىرماندارعا لاتىن الىپبيىندە باسىلىپ وتىر.
سونداي-اق، «تۇركىستان جازيراسىنىڭ قىش ىدىستارى» اقپاراتتىق عىلىمي تانىمدىق البوم - كاتالوگ رەتىندە جارىق كورىپ وتىر. وندا «ازىرەت سۇلتان» مەملەكەتتىك تاريحي-مادەني قورىق مۋزەيى قورىنا 40 جىلدان استام ۋاقىت بويى جيناقتالعان، تۇركىستان ايماعىنداعى كونە قالالار مەن قونىستار ورىندارىندا جۇرگىزىلگەن ارحەولوگيالىق زەرتتەۋ-قازبا جۇمىستارى بارىسىندا تابىلعان قىش ىدىستاردىڭ ەرەكشە ۇلگىلەرى بەرىلگەن. «زەرگەرلىك بۇيىمدار توپتاماسى» جيناعى اتالعان تاريحي-مادەني قورىق-مۋزەيى قورىندا ساقتالعان زەرگەرلىك اشەكەي بۇيىمدار توپتاماسى بەرىلگەن.