نۇرلان نىعماتۋلين: جاستاردىڭ ءرولىن ارتتىرۋعا جاڭا سەرپىن بەرىلەدى

استانا. قازاقپارات - بۇگىن استانادا ءوتىپ جاتقان «ينۆەستيتسيا - جاستارعا. ەشكىمدى تىس قالدىرمايىق» حالىقارالىق كونفەرەنتسياسىندا ءماجىلىس ءتوراعاسى نۇرلان نىعماتۋلين جاستاردى قولداۋ شارالارىنا قاتىستى پىكىر ءبىلدىردى، دەپ حابارلايدى قازاقپارات.

بۇگىن ەلوردادا ءوتىپ جاتقان شارادا ن. نىعماتۋلين جاستار ماسەلەسىنىڭ ماڭىزدىلىعىنا توقتالدى.

«ارينە، ءاربىر مەملەكەتتە، ءاربىر قوعامدا جاستاردىڭ ورنى ەرەكشە. سەبەبى قوعامنىڭ، حالىقتىڭ، ۇلتتىڭ بولاشاعىن ايقىندايتىن - ول ءبىزدىڭ جاستار. سوندىقتان قازاقستان پرەزيدەنتى نۇرسۇلتان نازاربايەۆ تاۋەلسىزدىك العان كۇننەن باستاپ جاستار ماسەلەسىنە ۇلكەن كوڭىل ءبولىپ كەلەدى. بارلىق جاعداي جاسالىپ جاتىر. ولاردىڭ بارلىعىن زاڭ جاعىنان قولداۋ ءۇشىن پارلامەنتتە اتقارىلىپ جۇمىستار دا از ەمەس. مىسالى، «مەملەكەتتىك جاستار ساياساتى تۋرالى» جانە «ۆولونتەرلىك قىزمەت تۋرالى» زاڭدار قابىلداندى. ەلىمىزدە مەملەكەتتىك جاستار ساياساتىنىڭ 2020-جىلعا دەيىنگى باعدارلاماسى دا بار. بيىلعى ەلباسىنىڭ جولداۋىندا دا وسى ماسەلەگە ەرەكشە نازار اۋدارىلدى»، - دەدى.

ءماجىلىس ءتوراعاسى ەلباسى بيىلعى جولداۋىندا جاستارعا ەرەكشە ءمان بەرگەنىن جانە مەملەكەت باسشىسى 2019-جىلدى جاستار جىلى دەپ جاريالاعانىن ەسكە سالىپ ءوتتى.

«سونىمەن بىرگە، جاستار ساياساتىنا قاتىستى ءبىرقاتار ناقتى تاپسىرمالار بەردى. ولاردىڭ بارلىعى جاستاردىڭ ءرولىن ارتتىرۋعا، ءومىر ساپاسىن جاقسارتۋعا، باسەكەگە قابىلەتتىلىكتى كۇشەيتۋگە جاڭا سەرپىن بەرەتىنى ءسوزسىز. بۇگىندە قازاقستاندا 4 ميلليونعا جۋىق جاس ازامات بار. ولار حالىقتىڭ بەلسەندى بولىگى بولۋىمەن قاتار، ۇلتتىق باسەكەگە قابىلەتتىلىكتى ارتتىرۋدىڭ ماڭىزدى فاكتورى بولىپ وتىر. سوندىقتان جاستاردىڭ الەۋمەتتىك قۇقىقتارىن قامتاماسىز ەتۋ، شىعارماشىلىق الەۋەتىن دامىتۋ، ولاردىڭ تابىستى دامۋىنا جاعداي جاساۋ ءارقاشان مەملەكەت نازارىندا»، - دەپ اتاپ ءوتتى ءماجىلىس ءتوراعاسى.