راحىمجاننىڭ بالاسى بولۋ - ماڭدايعا بىتكەن باقىت - ەرمەرەي وتاربايەۆ
ءوزىنىڭ قالامگەرلىگىنە سونشالىقتى جاۋاپكەرشىلىكپەن قاراعان ەڭبەكقور جازۋشى راحىمجان وتاربايەۆ تۋرالى ءالى تالاي ەستەلىكتەر ايتىلار. ءبىراق ونىڭ وتباسىنداعى ازاماتتىق بولمىسى مەن اكەلىك بەينەسى تۋرالى اكە مەيىرىمىن مولىنان سەزىنگەن ۇلى ەرمەرەيمەن كەزدەسىپ سۇراعان ەدىك. ۇلى دا اكەسى سەكىلدى سالماقتى، ءسوزىن سارالاپ سويلەيتىن تەكتىنىڭ تۇياعى ەكەن.
«انا ءتىلى» گازەتى وسى نومىردەن باستاپ «اكەسى جاقسى قانداي- دى...» اتتى جاڭا ايدار اشىپ وتىر. الداعى كەزەڭدەردە ەلىمىزگە ءمالىم تۇلعالاردىڭ ۇل- قىزدارىنىڭ اسەرلى سۇحباتتارىمەن تانىس بولاسىزدار. بۇگىنگى ءسوز ەرمەرەي راحىمجان ۇلى وتاربايەۆتا.
ءومىربايان
راحىمجان قاسىمعالي ۇلى وتاربايەۆ اتىراۋ وبلىسى قۇرمانعازى اۋدانىندا 1956 -جىلعى 19 - قازان كۇنى تۋعان. 1977 -جىلى ا. پۋشكين اتىنداعى ورال پەداگوگيكالىق ينستيتۋتىن بىتىرگەن. «قازاق ادەبيەتى» گازەتى مەن «جالىن» جۋرنالىندا ءبولىم مەڭگەرۋشى، كەيىنگى جىلدارى قازاقستاننىڭ قىرعىزستان رەسپۋبليكاسىنداعى ەلشىلىگىندە اتتاشە، ماڭعىستاۋ وبلىستىق تەلەراديوكومپانياسىندا ءتوراعا، اتىراۋ وبلىستىق قازاق دراما تەاترىندا ديرەكتور، قازاقستان رەسپۋبليكاسى پرەزيدەنتى اكىمشىلىگىندە سەكتور مەڭگەرۋشىسى بولىپ ەڭبەك ەتتى. 2009-2010 -جىلدار ارالىعىندا استاناداعى ۇلتتىق اكادەميالىق كىتاپحانانىڭ باس ديرەكتورى قىزمەتىن اتقاردى.
«اق جايىق» جۋرنالىنىڭ باس رەداكتورى بولدى.
جازۋشىنىڭ ءار جىلدارى «شەر»، «جۇلدىزدار قۇلاعان جەر»، «جايىق جىرى»، «قاراشا قازدار قايتقاندا»، «داۋىسىڭدى ەستىدىم»، «ءبىزدىڭ اۋىلدىڭ امازونكالارى»، «زلاتو زارىتوگو كلادا»، «وتۆەرجەننىي مير» جانە تاڭدامالى شىعارمالارىنىڭ 2 تومدىعى جارىق كورگەن.
قىتايدىڭ «ۇلتتار» باسپاسىنان قىتاي، قازاق تىلدەرىندە 2 تومدىعى، رەسەيدىڭ «حۋدوجەستۆەننايا ليتەراتۋرا» باسپاسىنان ورىس تىلىندە 1 تومدىعى جانە اراب، قىرعىز تىلدەرىندە كىتاپتارى جارىق كورگەن. جەكەلەگەن شىعارمالارى تۇرىك، اراب، اعىلشىن، فرانسۋز، يتاليان، بولگار، تىلدەرىندە باسىلعان.
دراماتۋرگيا سالاسىندا دا ءونىمدى ەڭبەك ەتتى. ونىڭ «بەيبارىس سۇلتان»، «باس»، «ناشاقور جايلى نوۆەللا»، «نۇرجاۋعان - عۇمىر»، «سىرىم باتىر»، «مۇستافا شوقاي»، «ناركوم جۇرگەنوۆ»، «عابيت»، «مەن ءسىزدى ساتقان جوقپىن»، «امىرە» سىندى پەسالارى رەسپۋبليكالىق جانە شەتەل تەاترلارىندا ساحنالانعان.
راحىمجان وتاربايەۆ قازاقستان جازۋشىلار وداعى باسقارماسىنىڭ جانە قازاق پەن- كلۋبىنىڭ مۇشەسى.
رەسپۋبليكالىق ماحامبەت اتىنداعى سىيلىقتىڭ، حالىقارالىق ايتماتوۆ اكادەمياسىنىڭ اكادەميگى. قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى. پرەزيدەنت ستيپەندياسىنىڭ يەگەرى.
ح. دوسمۇحامەدوۆ اتىنداعى اتىراۋ ۋنيۆەرسيتەتىنىڭ، باتىس- قازاقستان وبلىسىنىڭ م. وتەمىسوۆ اتىنداعى قۇرمەتتى پروفەسسورى، اتىراۋ قالاسى، قۇرمانعازى اۋدانىنىڭ قۇرمەتتى ازاماتى.
سوربوننا ۋنيۆەرسيتەتىندە راحىمجان وتاربايەۆتىڭ تۆورچەستۆوسى تۋرالى ارنايى لەكسيا وقىلعان.
جۇبايى ساۋلە ەكەۋى ەرمەرەي ەسىمدى ۇل مەن قاراكوز، جانسايا، ايجامال اتتى ءۇش قىز تاربيەلەپ وسىرگەن.
**
- اكەمنىڭ دۇنيەدەن وزعانىنا از عانا ۋاقىت وتسە دە قاتتى ساعىنىپ ءجۇرمىن. اكەم سىرتتاي قاتال كورىنگەنمەن مىنەزى وتە جۇمساق ەدى. وتە بالاجان ەدى. مەنى «جالعىزىم» دەپ ءجيى ەركەلەتەتىن. ءۇش قارىنداسىمدى «ءۇش كوكەم» دەيتىن. ۇلكەن قىزى - قاراكوزدى «كوگوز»، كەنجە قىزدارى - جانسايا مەن ايجامالدى «ءجاشون»، «كەنجەبيكە» دەپ ەركەلەتەتىن. سۇراعان زاتىمىزدى الىپ بەرىپ ءوسىردى. بەتىمىزدەن قاققان جوق. بالا كەزىمىزدە انام كوبىنە ءۇي شارۋاسىمەن، اكەمىزدىڭ جاعدايىن جاساۋمەن، ۇل- قىزدارىنىڭ تاربيەسىمەن اينالىستى. اكەم دەمالىس كۇندەرى قاراكوز ەكەۋمىزدى مىندەتتى تۇردە پارككە اپارىپ قىدىرتىپ، بىزگە كوڭىلىن بولەتىن، بۇل ادەتى جانە بۇلجىمايتىن. «اناڭدى تىڭدا» دەپ سول كەزدىڭ وزىندە قۇلاعىمىزعا قۇيىپ وتىراتىن. ەسەيگەن سوڭ دا اكەم ەكەۋمىز ءارتۇرلى تاقىرىپتا ۇزاق اڭگىمەلەسەتىن ەدىك. كەيدە پىكىرىمىز كەلىسپەي قالاتىن ساتتەر دە بولاتىن. سونداي كەزدە «دۇرىس، ەكەۋمىزدىڭ ومىرگە، قوعامعا دەگەن كوزقاراسىمىز ءبىر نۇكتەدە ۇيلەسۋى مىندەتتى ەمەس، ءوزىڭنىڭ پايىم- بايلامىڭ بولۋ كەرەك» دەپ قوياتىن. ءتىپتى مەنىڭ بالاڭ ويلارىما كۇلىپ تە الاتىن. مۇمكىن، ىشىنەن: «ءاي، بالام- اي...» دەيتىن بولار. قازىر وڭاشا قالعاندا سول ساتتەردى اسا زور ساعىنىشپەن ەسكە الىپ ءجۇرمىن...
«انام ەكەۋى كەرەمەت گارمونيادا ءومىر ءسۇردى»
راحىمجان قاسىمعالي ۇلى وتاربايەۆ
- ۇيدە انام مەن اكەم ەكەۋى ۇزاق شاي ءىشىپ، كوپ اڭگىمەلەسەتىن. كەيدە اكەم تەمەكى شەگۋگە شىعىپ كەلەدى. سوسىن ەكەۋى قايتادان اس ۇيدە ۇزاق وتىرۋشى ەدى. جالپى اكەم شايدى وتە جاقسى كورەتىن جانە باپتاپ ىشەتىن. بالكىم، انام ەكەۋى اراسىنداعى جاس ايىرماشىلىقتىڭ اسەرى مە، اكەم ول كىسىنى قاتتى ەركەلەتەتىن. ۇلى رەتىندە مەن ونى سەزىنىپ ءوستىم. ەكەۋى وتە ءبىر عاجاپ گارمونيادا ءومىر ءسۇردى دەپ ايتسام بولادى.
انام ساۋلە ەر ادامدى سىيلاپ، جوعارى قوياتىن جانۇيادا وسكەن، سول سەبەپتى دە بولۋ كەرەك، قانداي جاعدايدا بولماسىن، اكەمنىڭ قاس- قاباعىنا قاراۋمەن بولدى. انام اكەم دەمالىپ جاتسا، ءۇي- ىشىندە تىنىشتىقتىڭ بولۋىن، مازاسىن الماۋىن قاتاڭ قاداعالايتىن. ەشقاشان ءبىر- ءبىرىنىڭ اتىن ايتقان ەمەس. كەرىسىنشە، «ماماسى»، «پاپاسى» دەپ قاتتى سىيلايتىن، ءبىرىن- ءبىرى وتە جاقسى كورەتىن. اكەم الىس- جاقىن ساپارلاردان «شىركىن، ۇيگە جەتسەم دەپ كەلە جاتتىم» دەپ ساعىنىپ ورالاتىن.
پەندە بولعان سوڭ، ونىڭ ۇستىنە شىعارماشىلىق ادامى بولعان سوڭ ءتۇرلى كوڭىل- كۇيدە بولاتىن شىعار، الايدا اكەمنىڭ وتباسىندا اشۋلانعان ءساتىن كورمەپپىن. كەيدە ۇيگە رەنجىپ كەلەتىنىن نەمەسە تەلەفونمەن بىرەۋلەرمەن قاتتى سويلەسىپ جاتقانىن كورەمىز. ءبىراق ول كوڭىل- كۇيدى وتباسىنا، ءتىپتى دە قاتىستىرعان ەمەس. كوڭىلدى كەزىندە ەركىنە باعىنا بەرمەيتىن شاشىن سۇق ساۋساعىمەن وراپ- وراپ جىبەرىپ، باسىن وزىنە عانا ءتان قيمىلمەن قوزعاپ قويىپ وتە اسەرلى اڭگىمەلەر ايتاتىن. كەيدە جازۋدان شارشاپ، ميىن تىنىقتىرعىسى كەلسە جەزدەلەرىمدى شاقىرىپ الىپ كارتا وينايتىن، قۇمار ويىن ەمەس، ادەتتەگى ويىن. ودان قالسا «كەتتىك بالام، كيىن» دەيدى، سوسىن ەكەۋمىز عانا بيليارد ويناۋعا كەتىپ قالاتىن كەزدەرىمىز دە بولاتىن.
«انام ءالى سەنە الماي ءجۇر...»
- اكەم مەنى كىشكەنتەي كەزىمنەن قاسىندا ەرتىپ ءجۇردى. ساپارلاردا جاعداي تاڭدامايتىن، ادامدارعا سالماق سالماۋعا تىرىساتىن. جولداستارى كوپ بولدى دەپ ايتا المايمىن. ماعان جىگىت بوپ، اينا الدىندا تۇرىپ شاشىمدى قايىرا باستاعان كەزىمدە: «بالام، جولداس كوپ بولار. ول جولدا كەزدەسىپ جولدا قالادى. دوستىققا ساق بول. اكەڭدە دوس از. سول ەسىڭدە بولسىن» دەپ ايتاتىن. راس ەكەن... اكەم ومىردەن وتكەلى سول ءسوزدى ءجيى ەسىمە الامىن...
اكەمنىڭ رايسا دەگەن قارىنداسى، بەكەجان دەگەن ءىنىسى اجەم شامسيا ومىردەن وتكەن سوڭ شەتىنەپ كەتكەن. ال ءوزى جالعىز بالا بولىپ وسكەن. ەت جاقىن تۋىستارى جوق. نەمەرە اپا جەزدەلەرى، اعالارى بولدى. سولارمەن ارالاستىق. سول كىسىلەردى بىلەمىن. اتىراۋدا توي كوپ. ءبارى كەلگەنىن قالايدى. اكەم تويعا بارعانىمەن، سوڭىنا دەيىن وتىرمايتىن. از ۋاقىتتان سوڭ ۇيگە كەپ شاي ءىشىپ، جازۋعا وتىراتىن. «داڭعازامەن بوسقا ۋاقىت ولتىرگەنشە، ءبىر بەت بولسا دا جازۋ جازعانىم جاقسى» دەيتىن ەدى.
اكەمنىڭ شىعارما جازعانداعى ءساتىن انام جاقسى بىلەدى. ول تۋرالى مەنەن گورى ول كىسى كوپ نارسە ايتادى.
انام اكەمنىڭ كەتكەنىنە ءالى كۇنگە دەيىن سەنە الماي ءجۇر... جالپى اكەم جازۋعا كىرىسپەس بۇرىن ويشا ۇزاق دايىندالاتىن. دەرەك- دايەگىن، شىعارمانىڭ فورماسىن، يدەياسىن ۇزاق ازىرلەيتىن، سوسىن جازىلۋ ءساتىن كۇتەتىن. سوسىن ويعا جيعان يدەياسىن، قاعازعا تەز تۇسىرەتىن. شىعارماسىن جازىپ بىتىرگەندە بالاشا قۋاناتىن، كەيدە بىزگە داۋىستاپ وقىپ تا بەرەتىن. اكەمنىڭ سويلەۋ ءتىلى قانداي باي بولسا، جازۋ ءتىلى ودان دا كوركەم، تاپقىر جانە وقىرماننىڭ سەزىمىنە قاتتى اسەر ەتەتىنىن سەزەمىن. انام جۋرناليست قوي. جازىپ بىتكەن شىعارماسىن وعان وقۋعا بەرەتىن. كەيدە انام ازداپ سىناپ تا قوياتىن. سول كەزدە اكەم «وسىنداي اقىلدى ايەل العان وزىمە دە وبال جوق» دەپ ازىلدەپ تە قوياتىن ەدى.
كەشەگى كەڭەس كەزىندە كىتاپتارى سان مىڭداعان تارالىممەن تاراعان جازۋشىلار قاۋىمى تاۋەلسىزدىكتىڭ العاشقى ساتتەرىندە قاتتى داعدارىپ قالدى عوي، كوپتەگەن قالامگەرلەر قيىن جاعدايلارعا تاپ كەلدى. سونداي كەزدە اكەم مەملەكەتتىك قىزمەتىمەن قوسا، شىعارماشىلىق كاسىبىن ءبىر ءسات تە اقساتقان جوق. سوڭعى جىلدارى شىعارماشىلىق ناسيحاتى ءۇشىن بارلىق شارۋاسىن جيىپ- تەرىپ قويىپ كىرىستى. شەتەل تىلدەرىنە اۋدارىلۋىنا مىقتاپ كۇش سالدى. الىس جانە جاقىن شەتەلدەردەگى ارىپتەستەرىمەن كەرەمەت دوستىق جانە ارىپتەستىك بايلانىس ورناتىپ، سونىڭ ناتيجەسىندە اكەمنىڭ شىعارمالارى قانشاما تىلدەرگە اۋدارىلدى.
ۇكىمەتكە قاراپ، الاقان جايىپ قالعان جوق، ءوزى بەل شەشىپ كىرىستى. ماسكەۋدەن ادەبي اگەنت ۇستادى. كەيدە وزىنە ءوزى ادەبي اگەنت بولدى دەۋگە دە بولادى. بۇدان بولەك، سوڭعى جىلدارى دراماتۋرگيادا وتە جەمىستى ەڭبەك ەتتى. الماتى مەن استاناداعى ءىرى- ءىرى تەاترلاردا، بارلىق وبلىستىق تەاترلاردا سپەكتاكلدەرى قويىلدى. قانشاما تاريحي تۇلعالارعا ارناپ دەرەكتى ولمەس پەسالار جازدى. مۇنىڭ بارلىعى اكەمنىڭ ەڭبەكقورلىعىن، شىعارماشىلىققا دەگەن جاۋاپكەرشىلىگىن، كۇرەسكەرلىگىن بىلدىرەدى.
الپىس جاسقا تولعان مەرەيتويى قارساڭىندا اتىراۋ قالاسىندا وبلىس اكىمى نۇرلان اسقار ۇلى نوعايەۆتىڭ تىكەلەي قولداۋىمەن «راحىمجان وتاربايەۆتىڭ ەكىنشى حالىقارالىق تەاتر فەستيۆالى» وتكەندىگىن بۇكىل ەل- جۇرت بىلەدى. جالپى اتىراۋ دۇركىن- دۇركىن وتكىزدى عوي فەستيۆالدى. ءوز ەلىمىزدىڭ داڭقتى تۇلعالارىن بىلاي قويعاندا، شەتەلدەن قانشاما كورنەكتى تۇلعالار قوناق بولىپ كەلدى. بۇكىل رەسپۋبليكانىڭ جەتەكشى تەاترلارى بۇرىن- سوڭدى اتىراۋ توپىراعىندا ءدال وسىلاي باس قوسقان ەمەس. اپتا بويى اتىراۋ حالقى تەاتر الەمىمەن، اكەمنىڭ ساحنالىق قويىلىمدارىمەن الاڭسىز تابىسىپ سۋسىندادى. اكەمنىڭ سوڭعى ءسات- ساعاتى سوعىپ ۋاقىتى كەلگەندە دە ءوڭىر باسشىسى ءوزى باستاپ قايعىلى قازانىڭ بۇكىل اۋىر- جەڭىل جۇمىسىن ءوز يىعىمەن كوتەردى. بۇكىل ەلدىڭ اعالارى جۇمىلدى، سول ءۇشىن مەن ول كىسىلەرگە قارىزدارمىن! ال، راحىمجان وتاربايەۆ سەكىلدى قازاق قالامگەرىنىڭ بالاسى بولۋ - مەن ءۇشىن ۇلكەن باقىت جانە سانسىز جاۋاپكەرشىلىك.
«ومىردەن كەتەرىن سەزگەن سياقتى...»
- اكەمنىڭ قوعامداعى بولىپ جاتقان ءتۇرلى جاعدايلارعا، ادامداردىڭ ءبىر- بىرىنە دەگەن قارىم- قاتىناسىنا، ادەبيەتكە دەگەن جەڭىل كوزقاراستارعا جالپى كوپ نارسەگە جۇرەگى، جانى اۋىردى. «قازاقستان- اتىراۋ» ارناسىنا بەرگەن سۇحباتىندا ايتقانداي، ءتىل ماسەلەسى، جاستاردىڭ جاعدايى، ءدىن تاقىرىبىن كوپ ۋايىمدايتىن. تاريحتى كەرەمەت ءبىلدى. ەكولوگيا، جەر ماسەلەسى قاتتى تولعاندىردى. ەكولوگيا دەمەكشى، ول و. سۇلەيمەنوۆ ايتقانداي العاشقى ەكولوگ جۋرناليست قوي. تالانتتى جاستارعا قاتتى قۋاناتىن. ءبىر جاقسى شىعارما نە ماقالا وقىسا اۆتورىنىڭ تەلەفونىن تاۋىپ الىپ قۇتتىقتايتىن. جانە ۇلكەن- كىشى دەمەي ءوزى شىعارعان «اق جايىق» جۋرنالىنا شىعارمالارىن جاريالاپ، سول اۆتورعا وتە جوعارى دەڭگەيدە قالاماقى بەرىپ، قولىنان كەلگەن كومەگىن ايامايتىن. مەن مۇنى ايقىن سەزىندىم.
ومىردەن وتەرىنەن از بۇرىن جەلتوقسان، قاڭتار ايلارىندا ەڭبەك دەمالىسىن الىپ ۇيدە بولدى. اناممەن ۇزاق سىرلاسىپتى. كوپ نارسە ايتقان ەكەن. ولار ءبىر- بىرىنە ءومىر بويى جاقىن بولعان سوڭ ءمان بەرمەپپىن. اكەم ومىردەن وتكەننەن كەيىن عانا «ءبارىن بىلگەن، سەزگەن ەكەن عوي» دەپ ويلايمىن. كەيدە اكەم ءوز ەنەرگياسىنا ءوزى ورتەنىپ كەتكەندەي سەزىلەدى...
اكەمنىڭ اياقتالماي قالعان رومانى جازۋ ۇستەلىندە قالدى. شىعارماشىلىق جوسپارىن تاپ- تۇيناقتاي ەتىپ جاساپ، تەك جازۋى قالعان رومانى قالدى. «بوسقىندار» دەپ اتىن قويعان ەكەن. جاريالانباعان دۇنيەلەرىن ءبىز، جانۇياسى، بولاشاقتا وقىرمانعا ۇسىنامىز، ارينە. قازىردە باسپاگەرلەرمەن، زەرتتەۋشى ادەبيەتشىلەرمەن سويلەسىپ جاتىرمىز. ودان بولەك ابدەن ءيىنىن قاندىرىپ دايىنداپ، ماتەريالدارىن جيناعان ەكى- ءۇش رومان، پەساسى قالدى. اتتەڭ، الەمدىك ادەبيەتكە ۇلەس بولىپ قوسىلار شىعارمالارىمەن اكەممەن بىرگە ايىرىلىپ قالعانىمىز بىزگە وتە اۋىر. قارىنداسىم قاراكوز جۋرناليست قوي. اكەم قالامىمدى ۇستاپ قالار دەپ سەنگەن. مۇمكىن... اكە اماناتى سەكىلدى ماعان.
اكەممەن ەسىمدە قالعان ەرەكشە ءسات كوپ، وتە كوپ. سول سانامدا ساقتالىپ قالعان عاجاپ ەستەلىكتەردىڭ وزىنە ىشتەي شۇكىر ەتەمىن. ومىردەن وتەرىنەن تۋرا ءبىر جىل بۇرىن مەن ۇلدى بولدىم. تەلەفونمەن «پاپا، كەشىر!» دەسەم، «نە بولدى، بالام؟ » دەپ شوشىپ كەتتى. «مەن ءسىزدى اتا اتاندىردىم» دەپ ەدىم، قاسىنداعى ادامداردان سول بويدا ءسۇيىنشى سۇراپ، قاتتى قۋاندى. سول كۇنى استانا تەاترىندا «امىرەسىنىڭ» پرەمەراسى بولىپ جاتقان. ەرتەڭىنە ۇشىپ كەلدى. ءوزى جاھانگير دەپ اتىن قويدى. فاميلياسى - راحىمجان. سودان كۇندە تاڭەرتەڭ جاھانگيرىنىڭ ويانعانىن كۇتىپ وتىرىپ، ءبىر يىسكەپ جۇمىسىنا كەتەتىن. كەيدە كەشىگەتىن بولسا، اناما حابارلاسىپ، «ۇيىقتاپ قالماسىنشى» دەپ ەسكەرتەتىن. مىندەتتى تۇردە يىسكەپ، سويلەسىپ «ەندى ۇيىقتاتىڭدار» دەپ بىزگە بەرەتىن. ءوزى قارىن شاشىن، تىرناعىن الىپ، تۋرا مەنى باپتاعانداي باپتايتىن ەدى.
P. S.
«ادەمى قالامساپتار بار. كورگەندە - كوزىڭ، ۇستاعاندا قولىڭ قۋانادى. ءبىراق جازبايدى. سياسى ساپاسىز، ءيا تاۋسىلعان...». ءيا، كورنەكتى قالامگەردىڭ ءوزى ايتقانداي ونىڭ ادەمى قالامسابى كەنەتتەن جازباي قالدى. سول قالامساپتان ءتۇرلى جانرداعى ساپالى شىعارمالار ۇزدىكسىز اعىلىپ- توگىلىپ، ارناسىنان اسىپ جازىلىپ جاتىر ەدى، كەنەت توقتادى. قالام سياسى تاۋسىلعان جوق، ۇلكەن جۇرەك سوعىسىن توقتاتتى. سياسىنىڭ ساپاسىزدىعىنان ەمەس، يەسىنىڭ ءدام- تۇزى تاۋسىلعاندىقتان... ونىڭ بۇل ومىردەگى ميسسياسى بىتكەنمەن، قالامگەردىڭ ەكىنشى عۇمىرى باستالدى. ەندىگى جەردە كىتاپتان الىستاپ بارا جاتقان مەنىڭ زامانداستارىم، جاڭا بۋىن قازاق قالامگەرلەرىنىڭ، سونىڭ ىشىندە راحىمجان وتاربايەۆتىڭ وتتى شىعارمالارىمەن كەلەشەك داۋىرلەرگە قادام باسسا ەكەن دەگەن تىلەكتەمىز...
جازىپ العان ايزادا جايىق قىزى
http://anatili.kazgazeta.kz