بريتانيادا تۇراتىن قازاقستاندىق الەمگە دەبيۋتتىك تۋىندىسىن ۇسىنباق

الماتى. قازاقپارات - تانىمال قازاقستاندىق سكريپكاشى عاليا بيسەنعاليەۆا ءوزىنىڭ دەبيۋتتىك تۋىندىسىن جازىپ، ونى بريتاندىق مۋزىكانتپەن بىرلەسىپ شىعارعان البومىنا ەنگىزدى، دەپ حابارلايدى قازاقپارات ءتىلشىسى.

19- قازاندا «Tulpar» («تۇلپار») سينگلىنىڭ الەمدىك تۇساۋكەسەرى وتەدى. بۇل تانىمال قازاقستاندىق سكريپكاشى عاليا بيسەنعاليەۆانىڭ العاشقى تۋىندىسى.

عاليا ءوز وتانىن ساعىنىپ، ۇلتتىق ميفولوگياعا جۇگىنگەن. ول ۇلى بريتانيادا ۇزاق ۋاقىت بويى جۇمىس ىستەپ، ەۋروپالىق تىڭدارماندارىن تۋعان ەلىنىڭ ءداستۇرى مەن مادەنيەتىمەن تانىستىرىپ ءجۇر.

«Tulpar» «EP ONE» اتتى البومعا كىرەدى، وندا سكريپكا مەن ەلەكتروندىق مۋزىكانىڭ ۇندەسكەن اۋەنىن تىڭداۋعا بولادى. 3 تۋىندىنى جاس دارىندى كومپوزيتور قىزدار شىعارعان.

البومنىڭ پرەزەنتاتسياسى 30- قاراشادا وتەدى. «EP ONE» البومىنداعى تۋىندىلار لوندونداعى Spitfire Audio ستۋدياسىندا باسىلعان.

عاليا بيسەنعاليەۆا - حالىقارالىق كونكۋرستاردىڭ لاۋرەاتى، لوندونداعى كوروليەۆا مۋزىكا اكادەمياسىن سكريپكا كلاسى بويىنشا ءتامامداعان. بىلتىر اكادەميا سكريپكاشى قىزعا Associate of Royal Academy of Music Award ماراپاتىن تابىس ەتكەن ەدى.

عاليانىڭ اتا-اناسى - كاسىبي مۋزىكانتتار. اكەسى - تانىمال قازاقستاندىق سكريپكاشى ساعادات بيسەنعاليەۆ (قازاقستاندىق سكريپكاشى- ۆيرتۋوز مارات بيسەنعاليەۆتىڭ اعاسى).