داۋرەن ابايەۆ بايقوڭىر جايلى: قازاقستان عارىشىنىڭ داڭقتى پاراقتارى ءالى الدا

استانا. قازاقپارات - ق ر اقپارات جانە كوممۋنيكاتسيالار ءمينيسترى داۋرەن ابايەۆ «سويۋز ف گ» زىمىران تاسىعىشىنىڭ اپاتقا ۇشىراۋى مەن جالپى بايقوڭىر عارىش ايلاعىنىڭ قازاقستانعا پايداسى تۋرالى پىكىرىمەن ءبولىستى، دەپ حابارلايدى قازاقپارات ءتىلشىسى.

  «ەڭ الدىمەن، توتەنشە جاعدايلار كوميتەتى مەن ق ر قورعانىس جانە ايەروعارىش ونەركاسىبى مينيسترلىگى قوعامعا جەدەل تۇردە وسى وقيعا تۋرالى اقپارات بەرگەنىن ايتا كەتۋ كەرەك. جاعارمايدىڭ نەگىزگى سالماعى مەنىڭ بىلۋىمشە، 47-48 شاقىرىم بيىكتىكتە جانىپ كەتكەن. جەرگە تەك سۇيىقتىقتىڭ قالدىعى تۇسكەن. بۇل جەردە نەگىزىنەن كەروسين تۋرالى ايتىلىپ وتىر. انىقتالعانىنداي، زاتتەكتىڭ رۇقسات ەتىلگەن كونتسەنتراتسياسىنىڭ ارتىپ كەتۋ جاعدايى جوق. رادياتسيالىق احۋال دا قالىپتى. مەنىڭ بىلۋىمشە، توپىراققا لابوراتوريالىق زەرتتەۋ جۇرگىزىلۋدە. مۇنىڭ ءبارى دە حالىققا جاريالاناتىن بولادى»، - دەدى داۋرەن ابايەۆ «حابار» ارناسىنداعى «اشىق ديالوگ» باعدارلاماسىندا.

باعدارلامانى جۇرگىزىپ وتىرعان ءتىلشى بايقوڭىردىڭ پايداسى رەسپۋبليكامىزدىڭ مۇددەسىنە قانشالىقتى جۇمىس ىستەپ جاتقانى تۋرالى ەل ىشىندەگى كۇدىككە تولى اڭگىمەگە قاتىستى ءمينيستردىڭ پىكىرىن سۇرادى.

«بىلەسىز بە، بايقوڭىردان باس تارتۋ - قازاقستان ءۇشىن ۇلكەن ستراتەگيالىق قاتەلىك بولار ەدى. بۇل جەردە بىرنەشە سەبەپ بار. مەن رەسەيلىك تاراپ جىل سايىن جالعا العانى ءۇشىن تولەيتىن تولەمدى ەسەپكە الىپ، ونىڭ باس پايدا رەتىندە ايتىپ وتىرعان جوقپىن. بۇل - 40 ميلليارد تەڭگە شاماسىنداعى سوما. ول - ەڭ ماڭىزدى فاكتور ەمەس. بايقوڭىردىڭ ارقاسىندا جاھاندىق عارىش يندۋسترياسىندا جەتەكشى تەحنولوگيالارعا يە بولىپ وتىرمىز. بۇگىنگى تاڭدا قازاقستان سپۋتنيگى بار جەر جاھانداعى 37 مەملەكەتتىڭ ءبىرى بولىپ وتىر. سپۋتنيكتىك مالىمەتتەر نەگىزىندە كوپ سالانىڭ سيفرلاندىرىلۋى جۇزەگە اسىرىلادى»، - دەدى داۋرەن ابايەۆ.

 مينيستر ءوز سوزىندە اتاپ ايتقاندا، گەودەزيا، اۋىل شارۋاشىلىعى سيفرلاندىرىلىپ، وسى جۇمىستىڭ ءبارى بايقوڭىردا اتقارىلىپ جاتقانىن ايتا كەتتى.

«ءبىز بايقوڭىر ءوزىمىزدىڭ ۇلتتىق يگىلىگى ەكەنىن ۇمىتپاۋىمىز كەرەك. توقسانىنشى جىلدارى شىنىندا دا بايقوڭىردى جاۋىپ تاستاۋ كەرەك پە دەگەن ماسەلە دە كوتەرىلگەن. الايدا مەملەكەت باسشىسى بايقوڭىردى ساقتاي وتىرىپ، بارىنشا تابىستى تۇردە قولدانۋعا بارىن سالدى.

ءسوز سوڭىندا ايتارىم، بايقوڭىر - بۇكىل الەمگە بەلگىلى برەند. بايقوڭىردىڭ ارقاسىندا قازاقستان عارىشىنىڭ داڭقتى پاراقتارى ءالى دە الدا دەگەن ۇمىتتەمىن»، - دەدى داۋرەن ابايەۆ.

ەستەرىڭىزگە سالا كەتەيىك، 11 - قازاندا 14 ساعات 40 مينۋت 15 سەكۋندتا بايقوڭىر عارىش ايلاعىنىڭ گاگارين ستارت الاڭىنان وربيتاعا باسقارىلاتىن كولىكتىك «سويۋز مس-10» كەمەسىن الىپ شىعۋى ءتيىس «سويۋز ف گ» زىمىرانتاسىعىشى ۇشىرىلدى. ءبىراق ستارت بەرىلگەن سوڭ بىرنەشە مينۋتتان كەيىن روس كوسموس سايتىنداعى تىكەلەي كورسەتىلىم ءۇزىلىپ، ديكتور «زىمىران تاسىعىشتىڭ اپاتقا ۇشىراعانىن» حابارلاعان ەدى.

اۆتور: ايان بەكەن ۇلى