قاراعاندىدا «دۇنيەگە كەلەر ءالى تالاي قاسىم» اتتى اقىندار بايقاۋى ءوتتى

قاراعاندى. قازاقپارات - قاراعاندىدا «شالقىما» كونسەرت زالىندا جىل سايىن وتەتىن «دۇنيەگە كەلەر ءالى تالاي قاسىم» اتتى اقىندار بايقاۋى ءوتتى، دەپ حابارلايدى ءوڭىر باسشىسىنىڭ رەسمي سايتى.

بايقاۋ حالىق اراسىندا «داۋىلپاز اقىن» اتانعان قاسىم امانجولوۆتىڭ ەسىمىمەن اتالىپ وتىر.

 وسى جىلدان باستاپ رەسپۋبليكالىق دەڭگەيدە ءوتىپ جاتقان بايقاۋعا قاتىسۋعا ەلىمىزدىڭ 16 ايماعىنان 18 بەن 40 جاس ارالىعىنداعى 70 ادام ءوتىنىش تاپسىرعان.

اقتىق كەزەڭگە قاتىسۋعا استانا، الماتى قالالارىنان، اقمولا، الماتى، باتىس قازاقستان، جامبىل، ماڭعىستاۋ، پاۆلودار، تۇركىستان، قاراعاندى وبلىستارىنان 17 ۇزدىك ۇمىتكەرلەر ىرىكتەپ الىندى.

بايقاۋعا قاتىسۋشىلار قاسىم امانجولوۆقا، سانانى جاڭعىرتۋ جانە ەركىن تاقىرىپتا جازىلعان 3 ولەڭدەرىن ۇسىندى. قازىلار القاسى تۋىندىلاردىڭ كوركەمدىك ساپاسى مەن ستيليستيكالىق وزگەشەلىگىنە نازار اۋداردى. بايقاۋدىڭ جەڭىمپازدارى مەن لاۋرەاتتارى ديپلومدارمەن جانە اقشالاي سەرتيفيكاتتارمەن ماراپاتتالدى.

بايقاۋدىڭ گران- پري سىيلىعىن قاراعاندى وبلىسىنىڭ تۇرعىنى جانىبەك ءالىمان ۇتىپ الدى. قازىلار القاسىنىڭ ءتوراعاسى، تانىمال اقىن، قازاقستان جازۋشىلار وداعىنىڭ مۇشەسى، «الاش» سىيلىعىنىڭ لاۋرەاتى عالىم جايلىباي جەڭىمپازعا ديپلوم مەن  500000 تەڭگەنىڭ سەرتيفيكاتىن تابىس ەتتى.

 قازىلار القاسى ءبىرىنشى ورىندى قاراعاندى وبلىسىنىڭ تۇرعىنى راۋان قابيدولدينگە تاعايىندادى.

 ەكىنشى ورىن - ماڭعىستاۋ وبلىسىنىڭ تۇرعىنى اسىلبەك جاڭبىربايعا جانە قاراعاندى وبلىسىنىڭ اقىنى جانات جاڭقاش ۇلىنا بەرىلدى. ءۇشىنشى ورىندا - تۇركىستان وبلىسىنان كەلگەن ارقالىق ءاماليات ۇلى، الماتى وبلىسىنىڭ تۋماسى مۇقتار كۇمىسبەك جانە جامبىل وبلىسىنىڭ تۇرعىنى حاميت ەسەمانوۆ. العاشقى ءۇش ورىنعا ديپلومدار مەن  350000،  250000 جانە  150000 تەڭگەنىڭ سەرتيفيكاتتارى تابىس ەتىلدى.

بايقاۋعا قاتىسقان باسقا اقىندارعا  30000 تەڭگە كولەمىندە جۇبانىش سىيلىقتارى بەرىلدى. بايقاۋ «رۋحاني جاڭعىرۋ» باعدارلاماسىنىڭ شەڭبەرىندە وتكىزىلدى. ۇيىمداستىرۋشى - قاراعاندى وبلىسىنىڭ تىلدەردى دامىتۋ جونىندەگى باسقارماسى.

 بايقاۋدىڭ ماقساتى مەن مىندەتى - قاسىم امانجولوۆتىڭ ادەبي مۇراسىن رەسپۋبليكامىزدىڭ شىعارماشىل جاستارى اراسىندا تانىمال ەتۋ، پوەزياداعى جاڭا ەسىمدەردى انىقتاۋ، ولاردىڭ شىعارماشىلىعىن قولداۋ، ەلىمىزدىڭ جەتىستىكتەرىن، تاريحي وتكەنى مەن كەمەل بولاشاعىن اسقاقتاتۋ.