جاس وسپىرىمدەر وليمپياداسى: كاراتەشى قازاقستان قورجىنىنا سوڭعى «قولانى» سالدى

استانا. قازاقپارات - بۋەنوس-ايرەستەگى جاس وسپىرىمدەر وليمپياداسى ءوز مارەسىنە جەتتى، دەپ حابارلايدى قازاقپارات.

ق ر ۇلتتىق وليمپيادالىق كوميتەتىنىڭ باسپا ءسوز قىزمەتى حابارلاعانداي، جارىستىڭ سوڭعى كۇنى جارىس الاڭىنا شىققان قازاقستاندىق كاراتەشى ءابىلمانسۇر باتىرعالي 2018-جىلعى جاس وسپىرىمدەر وليمپياداسىنىڭ قولا جۇلدەسىن يەلەندى.

68 كەلىگە دەيىنگى سالماق دارەجەسىندە سىنعا تۇسكەن جەرلەسىمىز جارتىلاي فينالدا بەلگيالىق كۆەنتي ماحاۋدەننەن جەڭىلىپ، وليمپيادانىڭ قولا جۇلدەگەرى اتاندى.

ءابىلمانسۇر وليمپياداداعى العاشقى كەزدەسۋىندە ارگەنتينالىق حۋان مارتينەس سالسەنچتى، كەيىن جاپوندىق كوتارو ناكامۋرانى جەڭگەن بولاتىن.

ماروككولىق ياسسين سەكۋريمەن وتكەن جەكپە-جەكتە قارسىلاستار تەڭ ءتۇسىپ، ەكى سپورتشى دا جارتىلاي فينالعا جولداما العان ەدى.

ەستەرىڭىزگە سالا كەتەيىك، وسىعان دەيىن حابارلاعانىمىزداي جارىستىڭ سوڭعى كۇنى تاعى ءبىر سپورتشىمىز، ناقتىراق ايتساق، بوكستان 64 كەلى سالماقتا ەل نامىسىن قورعاعان تالعات شايكەن كۇمىس جۇلدەنى جەڭىپ الدى. ول فينالدا رەسەيلىك يليا پوپوۆقا جول بەردى.

اۆتور: كۇنسۇلتان وتارباي