الماتى وبلىسىندا مادەنيەت، سپورت جانە تۋريزم سالاسىندا جەتىستىكتەر كوپ - مينيستر

تالدىقورعان. قازاقپارات - تالدىقورعانعا ەلباسى جولداۋىن ءتۇسىندىرۋ ءۇشىن ق ر مادەنيەت جانە سپورت ءمينيسترى ارىستانبەك مۇحامەدي ۇلى كەلدى.

ءمينيستردىڭ ايتۋىنشا، پرەزيدەنتتىڭ 5-قازانداعى حالىققا ارناعان جولداۋىنداعى ماقسات- مىندەتتەردىڭ باسىم بولىگى الماتى وبلىسىمەن تىكەلەي بايلانىستى، دەپ حابارلايدى قازاقپارات ءتىلشىسى.

سالتانات سارايىندا ءوڭىردىڭ مادەنيەت جانە سپورت سالاسى قىزمەتكەرلەرىمەن كەزدەسكەن مينيستر پرەزيدەنتتىڭ بۇل جولعى جولداۋى الەۋمەتتىك ماسەلەلەردى شەشۋگە باعىتتالعانىن ەرەكشە اتاپ ءوتتى. جالاقىنىڭ ءوسۋى، مۇعالىم مارتەبەسىنىڭ ارتۋى، ءومىر ءسۇرۋ ساپاسىن جاقسارتۋ ماسەلەلەرى تىكەلەي ەل تۇرعىندارىنا باعىتتالىپ وتىر، دەگەن ارىستانبەك مۇحامەدي ۇلى الماتى وبلىسىندا ءوز سالاسى بويىنشا اتقارىلىپ جاتقان يگى جۇمىستارعا توقتالدى.

«ءوڭىردىڭ مادەنيەت، سپورت جانە تۋريزم سالاسىندا جەتىستىكتەر كوپ. ءار ازامات ءوزىنىڭ جۇمىسىن ەرەكشە ءبىر ىنتامەن ىستەپ جاتسا، ارينە ول الماتى وبلىسىنان ەرەكشە كورىنىپ جاتادى. ونى مىسالى تۋريزم سالاسىنان اڭعارۋعا بولادى. بيىل ەلباسىنىڭ الاكولگە بارىپ، ايدىندى كول قازاقستاننىڭ ءىنجۋ مارجانىنا اينالۋى كەرەك دەگەن ۇندەۋ ايتتى. ناتيجەسىندە تۋريزم سالاسى جاندانىپ كەلەدى، الاكولگە 1 ميلليوننان استام تۋريست كەلدى. جاقىن ارادا قازاق دراما تەاترى اشىلايىن دەپ جاتىر. مۇنداي جاعدايدى ءبىز ماقتانىشپەن ايتۋىمىز كەرەك. سپورت سالاسىندا دا حالىقارالىق جارىستاردا توپ جارىپ جاتقان سپورتشىلار، تالانتتى جاستار كوپ. سول جاعىنان ءبىز تەك قانا العىسىمىزدى ءبىلدىرۋىمىز كەرەك»، - دەدى ارىستانبەك مۇحامەدي ۇلى.