مەملەكەت وقىتقان دارىگەرلەردى اۋىلدارعا جىبەرەمىز - مينيستر

تۇركىستان. قازاقپارات - كەلەر جىلدان باستاپ مەملەكەت ەسەبىنەن وقىعان دارىگەر ماماندار جۇمىس ىستەۋ ءۇشىن اۋىلدارعا جىبەرىلەدى.

ولاردىڭ الەۋمەتتىك جاعدايلارى جاقسارىپ، جالاقىلارى 20 پايىزعا كوتەرىلەدى. بۇل تۋرالى ەلىمىزدىڭ دەنساۋلىق ساقتاۋ ءمينيسترى ەلجان ءبىرتانوۆ تۇركىستان وبلىسىنا جاساعان ساپارى بارىسىندا ايتىپ ءوتتى، دەپ حابارلايدى قازاقپارات ءتىلشىسى.

مەديتسينا قىزمەتكەرلەرىمەن باس قوسقان جيىندا مينيستر دارىگەرلەر مەن مەدبيكەلەردىڭ بىلىكتىلىگىن ارتتىرۋ، مەديتسينالىق قىزمەتتەردىڭ ساپاسىن جاقسارتۋ ماسەلەلەرىن ءسوز ەتتى. العاشقى مەديتسينالىق كومەك كورسەتۋدى دامىتۋ قاجەتتىگىن جەتكىزدى.

ءمينيستردىڭ سوزىنشە، بولاشاقتا تۇرعىندارعا دارىگەرلەر سمارتفوندار ارقىلى كەڭەس بەرىپ، ەم قابىلدايدى. كەلەر جىلدان باستاپ بارلىق جەردە مەديتسينالىق كارتالار مەن ازاماتتار تۋرالى اقپاراتتار، قۇجاتتاندىرۋ ەلەكتروندى تۇردە جۇرگىزىلەدى. ءاربىر ادامعا ەلەكتروندى پاسپورت جاسالىپ، مەديتسينالىق ەسەپتەر تەك ەلەكتروندى تۇردە قابىلدانادى. ەمحانالارداعى جۇكتەمەلەر دۇرىس ءبولىنىپ، تۇرعىندارعا جاقىن جەرلەردەن ۋچاسكەلىك دارىگەرلەر قىزمەت كورسەتپەك.

«بۇگىندە ءبىر ۋچاسكەلىك دارىگەرگە 2500-3000 ادامنان قارالادى. بولاشاقتا ول جۇكتەمەنى 1700 گە ءتۇسىرۋىمىز قاجەت. ارى قاراي 1500 گە جەتكىزەمىز. سوندا سىزدەردىڭ قولدارىڭىز بوسايدى. ەكىنشىدەن، ەلىمىزدە ۇلكەن-ۇلكەن ەمحانالار سالىنىپ كەتكەن. وندا 30-40 ۋچاسكەلىك دارىگەردەن وتىرادى. ول جەرگە حالىق الىستان كەلۋگە ءماجبۇر بولادى. ۋاقىت جوعالتادى، كەلۋگە قينالادى. سوندىقتان قالالىق جەرلەردە ۋچاسكەلىك دارىگەرلەردى بىرىكتىرىپ، حالىققا جاقىن جەرلەردەن قىزمەت كورسەتۋ جاعىن قاراستىرامىز. بۇدان بىلاي ۇلكەن ەمحانالار سالىنبايدى. ول ءۇشىن جەكەمەنشىك ارىپتەستىك اياسىندا جەكە دارىگەرلەردى تارتامىز. سوندا حالىق دارىگەرگە ءجيى قارالىپ، اۋرۋلاردى باقىلاۋعا مۇمكىندىك الامىز»، - دەدى مينيستر ەلجان ءبىرتانوۆ.

ونىڭ سوزىنشە، ەلباسىنىڭ تاپسىرماسى بويىنشا، بەس جىلدىڭ ىشىندە جالپى ىشكى ءونىمنىڭ 10 پايىز قاراجاتى دەنساۋلىق پەن ءبىلىم سالاسىنا بولىنبەك.

«ول بىزدەر ءۇشىن وتە ۇلكەن قولداۋ بولماق. ءبىز بۇل قاراجاتتى اۋىلدىق مەديتسيناعا، ونداعى ەمدەۋ مەكەمەلەرىنە ءبولۋىمىز قاجەت. كەرەك دەگەن زاماناۋي مەديتسينالىق قۇرالدارمەن قامتاماسىز ەتەمىز. ارنايى ستاندارتتار قابىلدانعان اۋىلدىق اۋرۋحانالاردى جەدەل-جاردەم قىزمەتىمەن قامتاماسىز ەتۋ بويىنشا مينيسترلىك تاراپىنان قاراجاتتار بولىنەدى»، - دەدى مينيستر.