قازاقستاندا العاش رەت كيىك مۇيىزدەرى اشىق تۇردە جويىلدى

ورال. قازاقپارات - ورال قالاسى ماڭىندا كيىك مۇيىزدەرى مەن دەريۆاتتارى اشىق تۇردە جويىلدى، دەپ حابارلايدى قازاقپارات ءتىلشىسى.

قازاقستان بيوالۋانتۇرلىلىگىن ساقتاۋ اسسوتسياتسياسىنىڭ قوعاممەن بايلانىس مامانى مۇحيت سۇتتىبايەۆتىڭ ايتۋىنشا، كيىك ءمۇيىزىنىڭ زاڭسىز ساۋداسىنا قارسى مۇنداي شارا قازاقستاندا العاش رەت وتكىزىلىپ وتىر.

اتالمىش اسسوتسياتسيا بيىلعى اقپان ايىندا كيىك مۇيىزدەرى مەن دەريۆاتتارىن اشىق تۇردە جويۋ جونىندە بارلىق وبلىستاردىڭ ىشكى ىستەر باسقارمالارىنا حات جولداعان بولاتىن. سولاردىڭ ىشىندە بۇل ۇسىنىستى ءبىرىنشى بولىپ ب ق و ىشكى ىستەر دەپارتامەنتى قابىل الدى.

«الداعى ۋاقىتتا ب ق و- نىڭ وسى تاجىريبەسىن باسقا وبلىستارعا تاراتۋدى كوزدەپ وتىرمىز. بۇل مەملەكەتتىك ورگاندار جۇمىسىنىڭ اشىقتىعىن تانىتادى. سونىمەن قاتار سوڭعى كەزدە ۇستالعان براكونەرلەر اراسىندا قۇقىق قورعاۋ قىزمەتكەرلەرىنىڭ بولۋى وسى ماسەلەنىڭ وتە وزەكتىلىگىن كورسەتەدى. تاعى ءبىر قاداپ ايتاتىن جايت، كيىكتىڭ دەريۆاتتارى مەن مۇيىزدەرىن ساتۋعا، ودان ءتىپتى تابيعات قورعاۋ ماقساتىندا پايدا تابۋعا تىيىم سالىنعان»، دەدى م. سۇتتىبايەۆ.

ايتا كەتەيىك، شارا بارىسىندا 148 ءمۇيىز جويىلدى. جالپى، ءمۇيىزدىڭ ءار كيلوسىنىڭ «قارا بازارداعى» باعاسى 5 مىڭنان 9 مىڭعا دەيىنگى ا ق ش دوللارى ارالىعىندا. سوندا 148 ءمۇيىزدىڭ جالپى قۇنى شامامەن 68-75 ميلليون تەڭگەنى قۇرايدى.

وسىعان دەيىن باتىس قازاقستان وبلىسىندا زاڭسىز كيىك اۋلاۋمەن اينالىسقان براكونەر ۇستالعاندىعىن جازعانبىز.