يننوۆاتسيالىق شەشىمدەر كونكۋرسىنىڭ جەڭىمپازدارى انىقتالدى
«بلوكچەين: ەلەكتروندىق ۇكىمەتكە ارنالعان يننوۆاتسيالىق شەشىم» جوباسىن ۇسىنعان IMD دۇنيەجۇزىلىك باسەكەگە قابىلەتتىلىك ورتالىعى (شۆەيتساريا) جانە «E-Practicum: پراكتيكالىق بىلىمگە ارنالعان ونلاين-پلاتفورما» جوباسىن ۇسىنعان Digital Solutions ltd. (قازاقستان) جەڭىمپاز اتاندى.
كونكۋرسقا 17 ەلدىڭ 46 وكىلى قاتىستى. اتاپ ايتقاندا، ا ق ش، ازەربايجان، بانگلادەش، ۆەنگريا، ەگيپەت، زامبيا، قازاقستان، قىرعىزستان، موڭعوليا، وڭتۇستىك افريكا رەسپۋبليكاسى، رەسەي، تاجىكستان، ۋكراينا، ۇلى بريتانيا، چەرنوگوريا جانە شۆەيتساريا.
2018-جىلعى كونكۋرستىڭ جەڭىمپازدارىن ەستونيا، بىرىككەن ۇلتتار ۇيىمىنىڭ دامۋ باعدارلاماسى جانە «زەردە» ۇلتتىق اقپاراتتىق-كوممۋنيكاتسيالىق حولدينگىنىڭ وكىلدەرىنەن تۋراتىن حالىقارالىق باعالاۋ كوميسسياسى انىقتادى.
استانا مەملەكەتتىك قىزمەت حابى باسقارۋشى كوميتەتىنىڭ ءتوراعاسى اليحان بايمەنوۆ: «قازىرگى زامانعى اقپاراتتىق تەحنولوگيالاردى دامىتۋ مەملەكەتتىك قىزمەت ءۇشىن جاڭا مۇمكىندىكتەر، سونىمەن بىرگە سىن-تەگەۋرىندەر تۋدىرادى. اشىق اقپاراتتىق قوعامدا ازاماتتار باسقا ەلدەردەگى مەملەكەتتىك ورگانداردىڭ جۇمىسىنان حاباردار بولادى، بۇل مەملەكەتتىك ورگاندار ءۇشىن كۆازي-باسەكەلەستىك ورتانى قالىپتاستىرادى. ازاماتتاردىڭ ءوسىپ كەلە جاتقان ۇمىتتەرىن قاناعاتتاندىرۋ ءۇشىن مەملەكەتتىك ورگاندار يننوۆاتسيالاردى قولدانۋ ءتيىس. بايقاۋدىڭ ماقساتى - مەملەكەتتىك قىزمەت سالاسىنداعى ەڭ وزىق يننوۆاتسيالىق شەشىمدەردى انىقتاۋ جانە ولاردى ودان ءارى پايدالانۋ ماقساتىندا حابتىڭ قاتىسۋشى ەلدەرى اراسىندا تاراتۋ»، - دەدى.
جەڭىمپازدارعا يننوۆاتسيالىق شەشىمدەردەردى جۇزەگە اسىرۋ جونىندە وقىتۋ كەيستەرى مەن ادىستەمەلىك نۇسقاۋلاردى ازىرلەۋ جانە ولاردى استانا حابىنىڭ قاتىسۋشى ەلدەرى اراسىندا تاراتۋ ءۇشىن جاعداي جاسالادى.
العاش رەت يننوۆاتسيالىق شەشىمدەر كونكۋرسىن استانا مەملەكەتتىك قىزمەت حابى مەملەكەتتىك باسقارۋدى دامىتۋ، مەملەكەتتىك قىزمەتتىڭ ساپاسىن ارتتىرۋ جانە مەملەكەتتىك مەكەمەلەردە يننوۆاتسيالار مەن شىعارماشىلىقتى ىنتالاندىرۋ بويىنشا باستامالاردى قولداۋ ماقساتىندا 2015-جىلى جاريالاعان بولاتىن.