اقمولادا بيلەر كەڭەسى قۇرىلدى

None
None
كوكشەتاۋ. قازاقپارات - اقمولا وبلىسىنىڭ ءبىرجان سال اۋدانىندا بيلەر كەڭەسى قۇرىلدى، دەپ حابارلايدى قازاقپارات ءتىلشىسى وبلىستىق سوتتىڭ باسپا ءسوز قىزمەتىنە سىلتەمە جاساپ.

ءبىرجان سال اۋداندىق سوتىندا وتكەن شاراعا سوت ءتورايىمى گ. اناربەكوۆا، اۋداندىق ارداگەرلەر كەڭەسىنىڭ ءتوراعاسى ك. حامزين، ستەپنياك قالاسىنىڭ ارداگەرلەرى جانە قوعام بەلسەندىلەرى قاتىستى.

 كەزدەسۋدە سوت ءتورايىمى بيلەر كەڭەسىن قۇرۋ - بۇل ۇلتتىق قۇندىلىقتى جاڭعىرتۋ ەكەنىن ايتا كەلە، ەلباسىمىزدىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا قازاقتىڭ بيلەر كەڭەسىن ۇلتتىق قۇندىلىقتار رەتىندە تانىپ، ونى حالىق اراسىندا كەڭىنەن ناسيحاتتاۋ قاجەتتىگى ايتىلعانىنا توقتالدى.

«بيلەر كەڭەسىن قۇرۋ قازاقستان رەسپۋبليكاسى جوعارعى سوتىنىڭ «تاتۋلاسۋ: سوتقا دەيىن، سوتتا» جوباسىنىڭ باستاماسى، ونىڭ ماقساتى داۋلاردى جانە جانجالداردى سوتقا دەيىن رەتتەۋ. ءبىزدىڭ اۋداندا بيلەر كەڭەسى ازاماتتىق داۋلاردى شەشۋگە سەپتىگىن تيگىزۋى ءتيىس، ولاردى سوتقا جەتكىزبەي داۋلاسقان تاراپتاردى تاتۋلاستىرۋى كەرەك» ، - دەدى سوت ءتورايىمى.

كەزدەسۋگە قاتىسۋشىلار كەڭەستى ۇيىمداستىرۋ مەن قىزمەتى ماسەلەلەرىن تالقىلاپ، ونى قۇرۋ تۋرالى ۇسىنىستى قولدادى. بيلەر كەڭەسىنىڭ قۇرامىنا ۇسىنىلعان ۇمىتكەرلەردىڭ اراسىندا اۋداننىڭ قۇرمەتتى ارداگەرلەرى ساۋىتباي ءجۇسىپ، سەرىك باكىروۆ جانە تەمىربەك وماروۆ بار.

 بيلەر كەڭەسىنە قازاق بيلەر سوتى قىزمەتىنىڭ نەگىزگى پرينتسيپتەرىن، ونىڭ ىشىندە داۋلاسقان تاراپتاردى دانا شەشىمدەرمەن تاتۋلاستىرا الۋدى جاڭعىرتۋ بويىنشا ماڭىزدى ميسسياسى جۇكتەلەدى.

سوڭعى جاڭالىقتار