اليك شپەكبايەۆ استا-توك توي جاسايتىن مەملەكەتتىك قىزمەتشىلەردى سىنعا الدى

استانا. قازاقپارات - مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى اليك شپەكبايەۆ مەملەكەتتىك قىزمەتشىلەردىڭ بالالارىنا توي جاساپ بەرۋىن «داڭعويلىق جارمەڭكەسىنە» تەڭەدى، دەپ حابارلايدى قازاقپارات.

«ءسان-سالتاناتى كەلىسكەن اۋقىمدى تويلاردىڭ بەينەبايانى الەۋمەتتىك جەلىدە ءجيى جاريالانادى. زال ءىشى تولعان گۇل. شوۋ-بيزنەس جۇلدىزدارى. 500-600 قوناق. كەيىنىرەك بۇل تويدى وڭىردەگى ءبىر باسقارما باسشىسىنىڭ قىزىنا نەمەسە ۇلىنا جاساپ بەرگەنى انىقتالادى. جانە بۇل تۇتاس ءبىر ۇردىسكە اينالدى. وسىنداي بەينەروليكتەر جەلىگە تارايدى جانە جۇرتشىلىقتى «اقشانى قايدان الدى؟» دەگەن ورىندى سۇراق مازالايدى. وسى جەردە تاعى ءبىر ماڭىزدى ماسەلە تۋىندايدى. قاتارداعى مەملەكەتتىك قىزمەتشىلەر دە باسشىلارىنان قالماي، مەرەكەنى ءالى جەتكەنشە دۇركىرەتىپ وتكىزۋگە تىرىسادى. بۇل ەندى داڭعويلىق جارمەڭكەسى ەمەي، نەمەنە»، - دەپ جازدى اليك شپەكبايەۆ الەۋمەتتىك جەلىدەگى پاراقشاسىندا.

ونىڭ ايتۋىنشا، كەيبىر مەملەكەتتىك قىزمەتشىلەر ءۇشىن بالالارىنىڭ ۇيلەنۋ تويىن نەمەسە ءوزىنىڭ مەرەيتويىن ۇلان-اسىر تويمەن اتاپ ءوتۋ ادەتكە اينالدى.

«ءتىپتى جانازا ءراسىمىن دە «لايىقتى دەڭگەيدە» وتكىزۋگە تىرىساتىندار بار»، - دەيدى ءتوراعا.

سونىمەن بىرگە، شپەكبايەۆ 2015 -جىلدان بەرى مەملەكەتتىك قىزمەتشىلەر اراسىندا ەتيكالىق ءتارتىپتى بۇزۋ وقيعالارىنىڭ %40 كە ازايعانىن اتاپ ءوتتى. ول مەملەكەتتىك قىزمەتشىلەردى وزگەرۋگە، قاراپايىم بولۋعا شاقىردى.

«قۇرمەتتى مەملەكەتتىك قىزمەتشىلەر، وزگەرۋ - ۋاقىت تالابى. قاراپايىم ءارى كىشىپەيىل بولۋىمىز كەرەك!»، - دەپ جازدى ول.