ساۋد ارابياسىندا جالعان سالافيزمنىڭ ۋاعىزشىسى ۇستالدى
استانا ءدىن پروبلەمالارىن زەرتتەۋ ورتالىعىنىڭ ساراپشىلارى بەرگەن مالىمەتتەرگە قاراعاندا، «نازراتۋللاح ءابۋ-ماريام» ۇزاق ۋاقىت بويى ينتەرنەتتە جالعان سالافيزمدى ۋاعىزداۋمەن اينالىسقان. ساۋد ارابياسىندا ءجۇرىپ ق ر جانە ت م د مەملەكەتتەرى ازاماتتارىنىڭ اراسىندا زاڭعا قايشى، جەرگىلىكتى جاماعاتقا بۇلدىرگىش ىقپالى بار ۋاعىزدار جۇرگىزگەن.
«بۇل ادام دەسترۋكتيۆتى يدەولوگيانى جاقتاعان ساۋد ارابياسىندا ءجۇرىپ، وزىمەن نانىم- سەنىمى ءبىر ادامدار ارقىلى قازاقستاندا سوقىر ءدىني كوزقاراستارىن بەلسەندى تۇردە تاراتىپ، ۇگىتتەگەن.
ونىڭ «قاسيەتتى جەردە» ۇستالۋى زاڭدى وقيعا بولدى. بۇل جاعداي ساۋد ارابياسى كورولدىگى پروگرەسشىل يسلامدى ۇستانا وتىرىپ، باسقا مۇسىلمان ەلدەرىمەن ورناتىلعان قارىم- قاتىناستاردى باعالايتىنىن دالەلدەيدى.
بۇرىن ءدىنارالىق ارازدىق تۋدىراتىن ۋاعىزدار تاراتقان ءابدۋحاليل ءابدۋجابباروۆتىڭ (شەيح «حاليل») ۇستالىپ، قازاقستانعا بەرىلۋى دە وسىنىڭ ايعاعى»، - دەيدى ورتالىق ماماندارى.