دومبىرانىڭ قۇلاعىندا وينايتىن جاپوندىق فۋكي ياگي كىم؟

  استانا. قازاقپارات - «ونەر ۇلتقا بولىنبەيدى، كەرىسىنشە بىرىكتىرەدى. دەمەك مەن قولىما دومبىرا العاندا قازاقپىن»، - دەپ اعىنان جارىلدى جاپون ازاماتى فۋكي ياگي.

دومبىرانىڭ ۇنىنە عاشىق، ءجۇزى جىلى فۋكي ياگيدىڭ «مەن قازاقپىن» حالىقارالىق بايقاۋىندا قوناق رەتىندە كەلىپ قاتىسۋى قالىڭ كورەرمەندى ءتانتى ەتتى.

فۋكي ياگيدىڭ فەيسبۋك پاراقشاسىن ىزدەپ تاپتىق. الايدا ءوزى جايلى ماردىمدى ەشقانداي اقپارات جاريالاماپتى. ءوز ءومىرىن قۇپيا ۇستاۋدى ۇيعارعان 27 جاستاعى فۋكي ياگيدىڭ تەك 2010 -جىلى موڭعوليادا بارعان ساپارىندا قازاقستانعا دەگەن قىزىعۋشىلىعى ويانعانىن بىلەمىز. كوپ ۇزاماي قازاق ونەرىن، سالت- ءداستۇرىن زەرتتەۋ، زەردەلەۋ ءۇشىن قازاق ەلىنە ات تەرلەتىپ كەلگەن فۋكي ياگي كوپكە ۇلگى بولارلىق جان. سەبەبى ول بەس جىل بويى قازاق ونەرىن زەرتتەپ كەلەدى. قازاقشا ۇيرەنىپ قانا قويماي دومبىرانىڭ قۇلاعىندا شەبەر ويناۋدى مەڭگەرىپ العان جاپون ازاماتى قازاقتىڭ ءداستۇرلى اندەرىن ورىنداعاننان رۋحاني ءلاززات الادى ەكەن. «تاڭشولپان» باعدارلاماسىنا قوناق بولىپ كەلگەن ساتىندە فۋكي ياگي «قايران زاماندى» ورىنداپ بەرۋى بەكەر ەمەس. قازاق پەن جاپون حالقى ۇندەس كەلەدى، ءتىپتى جەتىگەن اسپابى جاپونداردىڭ كاتو اسپابىنا قاتتى ۇقسايتىنىن تىلگە تيەك ەتكەن بولاتىن. قازاق ءتىلى كۇردەلى ءتىل ەكەندىگىن مويىنداي وتىرا ول ەشقانداي ارنايى ءتىل كۋرستارىنا بارماعانىن اشىق ايتتى. بولاشاقتا جاپونياعا ورالعاندا فۋكي ياگي قازاق مادەنيەتىن ءوز ەلىندە ناسيحاتتاۋعا كۇش سالاتىنىن جەتكىزدى.

Qamshy.kz