كورەيانىڭ ايگىلى رەجيسسەرى قازاقستاندا فيلم تۇسىرمەك

استانا. قازاقپارات - وڭتۇستىك كورەيانىڭ ايگىلى رەجيسسەرى كيم كي دۋك قازاقستاندا فيلم تۇسىرەتىن بولدى. بۇل تۋرالى قازاقستاندىق رەجيسسەر اقان ساتايەۆ ايتتى، دەپ حابارلايدى قازاقپارات.

 «1- حالىقارالىق Almaty Film Festival ءوزىنىڭ جەمىسىن بەرىپ جاتىر. بۇكىل الەمگە ايگىلى وڭتۇستىك كورەيانىڭ رەجيسسەرى كيم كي دۋك الماتىعا تاعى كەلدى. ونىڭ باستى ماقساتى - قازاقستاندا جاڭا فيلم ءتۇسىرۋ. مەن ماقتانىشپەن @astanafilmfund وسى جوباعا قاتىسۋشى بولعانىن ايتقىم كەلەدى»، - دەپ جازادى اقان ساتايەۆ ءوز پاراقشاسىندا.

قازاقستان رەجيسسەردىڭ حابارلاۋىنشا، كەشە ول كورەيالىق رەجيسسەرمەن كەزدەسۋ وتكىزىپ، ءتۇسىرىلىم پروتسەسى، اكتەرلاردى تاڭداۋ جۇمىسىن تالقىلاعان.

«ايتا كەتەرلىگى، فيلم قازاقستان رەتىندە تانىستىرىلادى. بارلىق ءتۇسىرىلىم جۇمىستارى الماتىدا ءبىزدىڭ اكتەرلاردىڭ قاتىسۋىمەن وتەدى. فيلم قازاقستان مەن ت م د ەلدەرىندەگى پروكات ءۇشىن ورىس تىلىندە تۇسىرىلەدى. حالىقارالىق كورەرمەندەردىڭ كوڭىلىنەن فيلم شىعار دەگەن ۇمىتتەمىن»، - دەيدى اقان ساتايەۆ.

 ايتا كەتسەك، كيم كي دۋك ايگىلى «پەتا» تريلەرىمەن ۆەنەتسيا كينوفەستيۆالىندە «التىن ارىستان» سىيلىعىن العان، سان- سەباستيانداعى حالىقارالىق كينوفەستيۆالدە توپ جارعان، بريۋسسەل حالىقارالىق فانتاستيكالىق فيلمدەر فەستيۆالىندە «التىن قارعا» سىيلىعىنا يە بولعان رەجيسسەر. «جابايى جانۋارلار»، «قۇس تور» وتەلى» «شىنايى وتىرىك» فيلمدەرى الەمنىڭ ءبىرقاتار تىلدەرىنە اۋدارىلىپ، كورەرمەننىڭ زور ىقىلاسىنا يە بولعان.

اۆتور: ايان بەكەن ۇلى