ق ر جازۋشىلار وداعىنىڭ استانا فيليالىنا جاڭا باسشى كەلدى

استانا. قازاقپارات - اقىن داۋلەتكەرەي كاپ ۇلى قازاقستان جازۋشىلار وداعىنىڭ استانا قالاسىنداعى فيليالىنىڭ ديرەكتورى بولىپ تاعايىندالدى، دەپ حابارلايدى قازاقپارات ءتىلشىسى.

ايتا كەتسەك، بۇعان دەيىن قازاقستان جازۋشىلار وداعىنىڭ ەلوردالىق فيليالىن باسقارعان باۋىرجان قاراعىز ۇلى بۇل قىزمەتتە نەبارى التى اي - وسى جىلدىڭ ءساۋىرى مەن قىركۇيەگى ارالىعىندا بولدى. كەيىن ب. قاراعىز ۇلى مادەنيەت جانە سپورت ءمينيسترىنىڭ كەڭەسشىسى لاۋازىمىنا تاعايىندالدى.

داۋلەتكەرەي كاپ ۇلى 1977-جىلى 9- تامىزدا دۇنيەگە كەلگەن. ءال-فارابي اتىنداعى قاز م ۇ ۋ- دىڭ فيلولوگيا فاكۋلتەتىن (1995-1999)، ل. ن. گۋميليەۆ اتىنداعى ە ۇ ۋ- ءدىڭ ماگيستراتۋراسىن (2000-2002) بىتىرگەن. اتالمىش ۋنيۆەرسيتەتتىڭ PhD دوكتارانتى. حالىقارالىق، رەسپۋبليكالىق اقىندار ايتىسىنىڭ بىرنەشە دۇركىن جەڭىمپازى. «دارىن» مەملەكەتتىك جاستار سىيلىعىنىڭ لاۋرەاتى. ەكى دۇركىن مەملەكەتتىك ستيپەنديا يەگەرى. «شابىت» III حالىقارالىق شىعارماشىل جاستار فەستيۆالىنىڭ پوەزيا نوميناتسياسى بويىنشا گران-پري يەگەرى. «جىر ءتاڭىرى»، «ولەڭگە اركىمنىڭ-اق بار تالاسى»، «جاس اقىندار جىرلارىنىڭ انتولوگياسى»، «بايبەسىك تۇمالارى»، «تاۋەلسىزدىكتىڭ نۇرلى تاڭى»، «شابىت»، «جيدەباي»، «جانارتاۋ»، «ازاتتىق تاڭىنداعى ازات جىر» جانە تاعى دا باسقا قازاق اقىندارىنىڭ بىرىككەن جىر جيناقتارىندا ولەڭ-جىرلارى جاريالانعان.

«ءسۇتتى ءىڭىر»، (2007)، «بۇلدىرگەن اعىپ تۇسكەنشە» (2011) اتتى جەكە جىر جيناقتارى جارىق كورگەن.