تولىقمەترلى انيماتسيالىق «مۇزبالاق» فيلمى پروكاتقا شىقتى

 استانا. قازاقپارات - بۇگىننەن باستاپ ادام مەن بۇركىتتىڭ دوستىعى تۋرالى باياندايتىن تولىقمەترلى «مۇزبالاق» انيماتسيالىق فيلمى وتاندىق پروكاتقا شىقتى، دەپ حابارلايدى استانا قالاسى اكىمدىگىنىڭ رەسمي سايتى.

 فيلمدى ق ر مادەنيەت جانە سپورت مينيسترلىگىنىڭ تاپسىرىسى بويىنشا شاكەن ايمانوۆ اتىنداعى «قازاق فيلم» كينوستۋدياسى وندىرگەن. قىزىقتى وقيعاعا تولى فيلم رەجيسسەر- انيماتورلار - تۇردىبەك مايدان مەن تىلەك تولەۋعازىنىڭ بىرلەسكەن شىعارماشىلىق ەڭبەگىنىڭ جەمىسى.

 «ءبىز «مۇزبالاقتان» بۇرىن «تاستۇلەك» اتتى قىسقامەتراجدى انيماتسيالىق فيلمدى اياقتاعانبىز. سوسىن «قازاق فيلم» باسشىلىعى فيلمدى ءارى قاراي تولىقمەتراجدى ەتىپ جاساۋ تۋرالى ۇسىنىس ايتتى. سودان «مۇزبالاق» مۋلتفيلمىنىڭ سسەناريىن جازۋعا كىرىستىك، جاڭا كەيىپكەرلەر قوستىق جانە ەكشن جانرىندا تۇسىردىك»، - دەيدى تىلەك تولەۋعازى.

فيلمگە ادام بالاسىنىڭ بۇركىتتى قولعا ۇيرەتۋى ارقاۋ بولعان. وقيعا جەلىسى بويىنشا ادام مەن قۇس ءبىر- بىرىنە سەنىم بىلدىرە وتىرىپ، باۋىر باسادى. سونىمەن قاتار، فيلمدە قازاقتىڭ ساياتشىلىق ءداستۇرى دە سۋرەتتەلەدى.

«قازاق حالقى بەس جاسار بۇركىتتى مۇزبالاق دەيدى. قازاق قۇستىڭ جاس ەرەكشەلىگىنە قاراي ات قويعان عوي. فيلمنىڭ اتاۋىن دا وسى قۇستىڭ ناعىز بابىنا كەلگەن شاعىمەن اتتاس الدىق. جالپى الەمدەگى «ارىستان پاتشاسى»، «مۋلان»، «سپيريت» دەگەن فيلمدەردىڭ جاسالۋ مەرزىمى بەس جىل جانە ولاردىڭ كومانداسىندا مىڭداعان ادام جۇمىس جاسايدى»، دەيدى تۇردىبەك مايدان. ەكى جارىم جىل كولەمىندە جاسالعان بۇل فيلمگە 40-قا جۋىق كينەماتوگرافيانىڭ وسى جانرىندا ەڭبەك ەتىپ جۇرگەن وتاندىق ماماندار جۇمىلدىرىلعان.

 فيلمنىڭ ۇزاقتىعى ءبىر ساعات. «ءبىر ساعاتتىق مۋلتفيلمدە ولار قازاقتىڭ قۇسبەگىلىك ونەرىن جاندى ەرتەگىگە اينالدىرىپ، كىشكەنتاي كورەرمەندەرگە انيماتسيا تىلىمەن وتە كوركەم جەتكىزە بىلگەن. مۇندا ءبارى بار: جاقسى سسەناري، شەبەر ورىلگەن، تولاسسىز ديناميكاعا قۇرىلعان شىمىر دراماتۋرگيا، ۇلتتىق كەلبەتكە، قيمىل- قوزعالىسقا يە كەيىپكەرلەر، ەتنوگرافيالىق سۋرەتتەر، ۇلتتىق بولمىس پەن تانىمعا سۋارىلعان جاڭاشا، كۇردەلى رەجيسسەرلىك شەشىمدەر. «مۇزبالاق» - قازاق انيماتسيالىق كينو تاريحىنداعى حالىقتىق فولكلورعا مەيلىنشە سۋعارىلىپ، ۇلتتىق بوياۋى جوساعا قايناتقان اسىقتاي قانىق جاعىلعان تولىقمەترلى تۇڭعىش مۋلتفيلم»، دەيدى ونەرتانۋشى ەرلان تولەۋتاي.

فيلم قازاق تىلىندە جاسالىپ، ورىس تىلىنە دۋبلياجدالعان. ال فيلمگە ارنالىپ ارنايى ءتورت ساۋندترەك جازىلعان ونى ءانشى ءارى كومپوزيتور ۇشقىن جامالبەك جازىپ ءوزى ورىنداعان. فيلم پروكاتقا ەكى تىلدە شىعادى جانە ەلىمىز بويىنشا ءبىر اي شاماسىندا جۇرەدى.